بەلارۋس پرەزيدەنتى رەسەيگە جاقىن وداقتاسىنان ايىرىلۋى مۇمكىن ەكەنىن ەسكەرتتى
بەلارۋس مەملەكەتتىك اقپارات اگەنتتىگىنىڭ جازۋىنشا، لۋكاشەنكو 10 - قاڭتاردا: «ەگەر رەسەي جەتەكشىلىگى وسىنداي جولدى تاڭداپ الىپ، باتىس تاراپتاعى جالعىز وداقتاسىنان ايىرىلۋدى قالاسا، وزدەرى ءبىلسىن» دەگەن. سوڭعى كۇندەرى ەكى ەلدىڭ اراسىنداعى ەنەرگەتيكا داعدارىسى ۋشىعىپ تۇر.
بەلارۋس رەسەيدەن سۋبسيديا تۇرىندە مۇناي ونىمدەرىن ساتىپ الىپ، قايتا ەكسپورتتاپ كەلگەن. رەسەي بۇدان بىلاي ەكونوميكاسىنا تۇسكەن سالماقتى ازايتۋ ءۇشىن كورشىسىنە ساتاتىن مۇناي باعاسىن وسىرمەك.
مينسك ماسكەۋدىڭ بۇل جوسپارى جۇزەگە اسسا، الداعى التى جىل ىشىندە 11 ميلليارد دوللار تۇسىمنەن ايىرىلاتىنىن ايتىپ، رەسەيدەن تولەماقى تالاپ ەتتى.
10 - قاڭتاردا پرەزيدەنت لۋكاشەنكو بەلارۋستىڭ مۇناي ونىمدەرىمەن ساۋدا- ساتتىقتى بالتىق ەلدەرىمەن بىرگە جاساۋى مۇمكىن ەكەنىن ايتىپ تا قىر كورسەتكەن. ونىڭ سوزىنشە، مينسك مۇنايدى بالتىق ەلدەرىمەن بىرلەسە ساتىپ الىپ، نوۆوپولوتسك قالاسىندا وڭدەي الادى.
بەيسەنبىدەگى مالىمدەمەسىندە بەلارۋس پرەزيدەنتى «ماسكەۋدىڭ داعدارىستى پايدالانىپ، كورشى ەلدى قوسىپ العىسى كەلەتىنى» تۋرالى الىپقاشپا ءسوزدى تەرىستەپ:
«ەكى ەلدى بىرىكتىرۋ تۋرالى ءسوز بولۋى مۇمكىن ەمەس» دەپ مالىمدەگەن.
رەسەي مەن بەلارۋس تىعىز ەكونوميكالىق، ساياسي جانە اسكەري قارىم- قاتىناس ورناتۋدى كوزدەيتىن وداقتاس بولۋ تۋرالى كەلىسىمگە قول قويعان.
بەلارۋس پرەزيدەنتى لۋكاشەنكو مەن رەسەي پرەزيدەنتى ۆلاديمير پۋتين 2018 -جىلدىڭ سوڭىندا ەكى رەت كەزدەسكەن. ءبىراق ەنەرگەتيكا داعدارىسى شەشىلمەگەن. 2010 -جىلى رەسەيمەن اراسىندا وسىنداي داۋ تۋعاندا بەلارۋس ۋكرايناداعى پورتتار ارقىلى مۇنايدى ۆەنەسۋەلادان تاسىعان.
الەكساندر لۋكاشەنكو 10 ميلليون حالقى بار بەلارۋستى شيرەك عاسىرداي ۋاقىت بويى جەكە- دارا بيلەپ- توستەپ وتىر.
www.azattyq.org
