قازاقستاننىڭ نارىعىنا قىتايدىڭ كولىكتەرى ەنىپ، باعا ارزاندايتىنى تۋرالى سىبىس قانشالىقتى راس؟
بۇل تۋرالى 31- ارنا حابارلايدى.
قازاقستاننىڭ اۆتوكولىك سالاسى كاسىپورىندارىنىڭ مالىمەتىنشە، 2018-جىلدىڭ 11 ايىندا ەلدەگى كولىكتەر 7,6 پايىزعا قىمباتتاعان. جالپى العاندا، ەلىمىزدەگى كولىكتەردىڭ قۇنى 2014-جىلدان بەرى ۇدايى ءوسىپ كەلەدى. ال دۇنيەجۇزىلىك ساۋدا ۇيىمىنىڭ تالاپتارىنا ساي شەتتەن كەلەتىن قورلار ءۇشىن سالىقتى تومەندەتۋگە مىندەتتىمىز. الايدا مۇنداي بولماشى جەڭىلدىك كولىك باعاسىنىڭ ارزانداۋىنا سەبەپ بولا المايدى، دەيدى تاۋەلسىز اۆتوبيزنەس وداعىنداعىلار.
«بۇل كولىك قۇنىنىڭ تومەندەۋىنە شەشۋشى فاكتور ەمەس. سەبەبى ۋتيليزاتسيالىق جيناقتى ءالى ەشكىم اۋىستىرعان جوق. كولىكتى تىركەۋگە قويۋدى دا ەشكىم وزگەرتپەدى. ەۋرازيالىق وداقتىڭ ستاندارتتى تالاپتارى ءالى دە ءوز كۇشىندە. تاريفتىك جانە تاريفتىك ەمەس باقىلاۋ مەحانيزمى بولادى. ءدال وسى جاعدايدا كەدەندىك سالىق ازايعانىمەن، تاريفتىك ەمەس باقىلاۋ ءوز قالپىندا قالىپ وتىر»، - دەيدى قازاقستانداعى تاۋەلسىز اۆتوبيزنەس وداعىنىڭ ءتوراعاسى تەمىر جاركەنوۆ.
اتالعان وداقتىڭ مالىمەتىنشە، 2014-جىلى ەلىمىزدە 148 مىڭ جاڭا كولىك ساتىلسا، 2017-جىلى 42 مىڭ، 2018-جىلى 33027 كولىك ساتىپ الىنعان. ال اۆتوبولشەكتەردىڭ ءبىر كەلەسىن كەدەندىك راسىمدەۋ قۇنى 2014-جىلى 7-8 مىڭ تەڭگە بولسا، 2016 10-12 مىڭ تەڭگە بولعان. ال 2018-جىلى كەدەندىك راسىمدەۋ باعاسى 20 مىڭ تەڭگەگە كوتەرىلىپتى.
كەدەندىك شىعىندى كاسىپكەرلەردىڭ قالتاسى كوتەرە بەرمەيدى. سوندىقتان شەتەلدەن كولىك تاسىمالداۋشى ورتا جانە شاعىن كاسىپكەرلەردىڭ جۇمىسى توقتاپ تۇر. ال كولىك ساۋداسىنداعى ءىرى ويىنشىلار وزدەرىنە ءتيىمدى باعالاردى بەلگىلەيتىنى انىق. سونىمەن قاتار شەت مەملەكەتتەردەن كەلەتىن كولىكتىڭ باعاسى دوللار مەن رۋبلگە تاۋەلدى. وسى سەبەپتى 2019-جىلى ەلىمىزدەگى كولىك قۇنى ارزانداۋى ەكىتالاي.
