قازاقستاندا ءدىني ماسەلەلەر بويىنشا جاۋاپ بەرەتىن ورتالىق ىسكە قوسىلدى
«بۇگىن ەلىمىزدە 24 ساعات قىزمەت كورسەتەتىن Call ورتالىق اشىلدى. 87172333030 ءنومىرى بويىنشا ىسكە قوسىلعان ورتالىق جۇمىسىنا استانا قالاسىنىڭ 60 ءدىني قىزمەتكەرى جۇمىلدىرىلدى. وندا ءتۇرلى ءدىني ماسەلەلەر بويىنشا جاۋاپ ىزدەگەن جاماعاتقا قازاق جانە ورىس تىلدەرىندە قىزمەت كورسەتىلەتىن بولادى»، - دەلىنگەن باسقارما حابارلاماسىندا.
ودان بولەك، بۇگىننەن باستاپ استانا قالاسىنىڭ 10 مەشىتىندە «ءدىني اقپارات بەرۋ ورتالىعى» ءوز جۇمىسىن باستادى.
«حالىق سۇرانىسىن قاناعاتتاندىرۋ ماقساتىندا ىسكە قوسىلعان بۇل جوبا ءتۇرلى تۇيتكىلدى تاقىرىپتار بويىنشا (نەكە، تالاق، نەسيە، مۇراگەرلىك ت. ب.) كەڭەس سۇراعان جاندارمەن كوزبە-كوز كەزدەسىپ، سىرت كوزدەردەن تىس سۇحباتتاسۋعا قولايلى بولۋ ءۇشىن اشىلىپ وتىر»، - دەپ حابارلايدى ق م د ب.
اتالعان قىزمەت تۇرلەرىنىڭ اشىلۋىنا قازاقستان مۇسىلماندارى ءدىني باسقارماسىنىڭ ءتوراعاسى، ەلىمىزدىڭ باس ءمۇفتيى سەرىكباي قاجى وراز قاتىستى.
«ءبىزدىڭ 60 مامانىمىز ءتۇرلى سۇراقتارعا جاۋاپ بەرەدى، ونىڭ ىشىندە پسيحولوگ تا بار. سول سياقتى مۇندا تەك قانا دىنگە قاتىستى سۇراقتاردى قامتىمايدى. كەيدە ادامدار كۇيزەلىسكە ءتۇسىپ، ونىڭ ارتى سۋيتسيدكە اپارىپ جاتاتىن جاعدايلار بولادى. مىنە سول كەزدەردە وعان رۋحاني جاردەمشى بولىپ دۇرىس اقپارات بەرەتىن، ونىڭ كوڭىلىنە قۋانىش پەن جاقسى ءۇمىت ۇيالاتاتىن جۇمىس جاسالىناتىن بولادى»، - دەدى ول.
