مۇعالىمدەردىڭ قاي جاستان زەينەتكەرلىككە شىعاتىندىعى انىقتالدى
بۇل تۋرالى بۇگىن ەلورداداعى №59 -مەكتەپتە وتكەن قوعامدىق تىڭداۋ بارىسىندا ق ر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم دەپارتامەنتى ديرەكتورىنىڭ ورىنباسارى ساۋلە قابيمولدايەۆا ءمالىم ەتتى، دەپ حابارلايدى قازاقپارات ءتىلشىسى.
ونىڭ ايتۋىنشا، زاڭ جوباسى 6 ءبولىم مەن 21 باپتان تۇرادى.
«زاڭ جوباسىندا ماتەريالدىق- تەحنيكالىق قامتاماسىز ەتۋ، وقىتۋ قۇرالدارىمەن جابدىقتاۋ جونىندە نورما جازىلعان. ياعني، ءمۇعالىم، تاربيەشى مەكتەپكە ساباق بەرۋگە قاجەتتى قۇرال- جابدىقتاردى ءوز قاراجاتى ەسەبىنەن ساتىپ المايتىن بولادى. 8-باپتا ق ر زاڭناماسىندا كورسەتىلگەن جاعدايلاردان باسقا كەزدە پەداگوگتاردى وزدەرىنىڭ كاسىبي مىندەتتەرىمەن بايلانىستى ەمەس جۇمىستارعا تارتۋعا بولمايتىندىعى جازىلعان. زاڭنامامىزدا قاراستىرىلماعان ەسەپ ۇلگىلەرى مەن كەز كەلگەن اقپاراتتى ۇسىنۋىن تالاپ ەتۋگە دە، زاڭدا كوزدەلمەگەن تەكسەرۋلەردى جۇرگىزۋگە بولمايدى. ايتا كەتەرلىگى، اتالعان تارماقتى تالاپتارىن بۇزۋ اكىمشىلىك جاۋاپكەرشىلىككە تۇرتكى بولادى. بۇل ۇسىنىستار پەداگوگتارىمىزدان ءتۇسىپ وتىر»، - دەدى ول.
ونىڭ دەرەگىنشە، زاڭ جوباسىندا پەداگوگتاردىڭ كاسىبي قىزمەتتەگى اكادەميالىق ەركىندىگى مەن قۇقىقتارى دا جازىلعان.
«تاعى ءبىر قىزىق نورما جاس پەداگوگ جىگىتتەرگە قاتىستى - اسكەري قىزمەتتى وتەۋگە شاقىرىلۋىن كەيىنگە قالدىرۋ»، - دەدى ول.
سونىمەن قاتار ساۋلە قابيمولدايەۆانىڭ ايتۋىنشا، ۇستازدارعا عىلىمي قىزمەتپەن اينالىسۋعا شىعارماشىلىق دەمالىس بەرىلەدى. مۇنداي دەمالىس ۋاقىتىندا ءمۇعالىمنىڭ پەداگوگيكالىق ەڭبەك ءوتىلى مەن جالاقىسى ساقتالادى جانە ول 5 جىلدا ءبىر رەت كەمىندە التى ايعا بەرىلەدى.
مۇنان بولەك، جەرگىلىكتى اتقارۋشى ورگاندار پەداگوگ جالاقىسىن وڭىردەگى ورتاشا جالاقىدان تومەن ەمەس دەڭگەيدە بەكىتۋگە، ءتۇرلى ۇستەماقىلار تولۋگە، «ۇزدىك پەداگوگ» اتاعىنا يە ۇستازدارعا 300 ا ە ك- تەن كەم ەمەس كولەمدە سىياقى بەرۋگە قۇقىلى. سونىمەن قاتار پەداگوگتارعا باستاپقى جارناسىز جەڭىلدەتىلگەن نەسيەمەن باسپانا الۋ قۇقىعىنا الەۋمەتتىك كەپىل بەرىلەدى.
«30 جىلدىق جۇمىس ءوتىلى بولعان جاعدايدا بەكىتىلگەن زەينەت جاسىنا جەتكەن پەداگوگ زەينەتكەرلەرىككە شىعادى. بۇل ۇسىنىس تا ەلىمىزدىڭ بارلىق وڭىرلەرىنەن دەرلىك كەلىپ ءتۇستى»، - دەدى ول.
