سيريادان قازاقستانعا ورالعان بالالاردىڭ كۇنى نە بولادى
جاس جەتكىنشەكتەردىڭ ارى قارايعى ءومىرى جايلى ق ر ۇلتتىق قاۋىپسىزدىك كوميتەتىنىڭ دەپارتامەنت باسشىسى باقىتبەك راحىمبەرديەۆ ايتىپ بەردى، دەپ حابارلايدى قازاقپارات ءتىلشىسى.
«قايتا ورالعان بالالاردىڭ كەيبىرى سيريادا دۇنيەگە كەلگەن. ولاردى قۇجاتتاندىرۋ ماسەلەسىن سىرتقى ىستەر مينيسترلىگى مەن جەرگىلىكتى اتقارۋشى ورگاندار شەشەتىن بولادى. بۇل ءراسىم ءبىزدىڭ زاڭدارىمىزبەن ماقۇلدانعاندىقتان، ەشقانداي كەدەرگى جوق» ، - دەدى ول ق ر س ءى م- دە وتكەن باسپا ءسوز ءماسليحاتىندا.
سونىمەن قاتار، ۇ ق ك وكىلى بارلىق دەرلىك بالانىڭ اكەلەرى سول جاقتا كوز جۇمعانىن، بالالار انالارىمەن بىرگە ەلگە ورالعانىن اتاپ ءوتتى.
«ءتىپتى ءبىر بالانىڭ اناسى ءالى دە سول جاقتا قالعان. ال بالانىڭ ءوزى مۇندا جالعىز. قايتا ورالعان ازاماتتار - استانا جانە الماتى قالالارىنىڭ، سونداي- اق الماتى، باتىس قازاقستان، قاراعاندى جانە ماڭعىستاۋ وبلىستارىنىڭ تۇرعىندارى» ، - دەيدى باقىتبەك راحىمبەرديەۆ.
ۇ ق ك دەپارتامەنت باسشىسى سونداي- اق، ولاردىڭ بارلىعى دا 2012-2015 -جىل ارالىعىندا سيرياعا جەتكىزىلگەنىن اتاپ ءوتتى.
«قازىر 7 ازاماتتىڭ (6 ەر ادام مەن ءبىر ايەل) تەرروريستىك ۇيىمداردىڭ قىزمەتىنە ارالاسۋىنا بايلانىستى قىلمىستىق ءىس جۇرگىزىلىپ جاتىر» ، - دەدى باقىتبەك راحىمبەرديەۆ.
ەسكە سالا كەتسەك، بۇعان دەيىن ق ر ۇلتتىق قاۋىپسىزدىك كوميتەتىنىڭ دەپارتامەنت باسشىسى باقىتبەك راحىمبەرديەۆ «جۋسان» وپەراتسياسى بويىنشا سيريادان ەلىمىزگە قايتارىلعان ازاماتتاردىڭ جەتەۋىنىڭ ۇستىنەن قىلمىستىق ءىس قوزعالعانىن حابارلاعان ەدى. ونىڭ ايتۋىنشا، ۇ ق ك- دا سيريادان قاشپاق بولعان بىرنەشە قازاقستاندىقتىڭ ءولىم جازاسىنا كەسىلگەنى تۋرالى مالىمەتتەر بار.
