دەنيس تەن ءولىمى: وقيعا ورنىنا ءبىرىنشى بولىپ جەتكەن پوليتسەي سوت الدىندا جاۋاپ بەردى
ازامات نۇرپەيىسوۆ وقيعانىڭ قالاي وربىگەنىن ەگجەيلى-تەگجەيلى ايتىپ، ءوز كوزىمەن نە كورگەنىن جەتكىزدى دەپ حابارلايدى NUR. KZ.
المالى اۋداندىق پوليتسيا باسقارماسىنىڭ ءتارتىپ ساقشىسى وقيعا ورنىنان قاشىپ كەتكەن كۇدىكتىلەردىڭ ارتىنان جۇگىرە جونەلگەنىن العا تارتتى.
«2018-جىلى 19- شىلدە كۇنى ءبىز ارىپتەسىم ەكەۋمىز ورتالىق ستاديونداعى فۋتبول ويىنىنا قىزمەت بابىمەن كەتىپ بارا جاتتىق. قۇرمانعازى مەن ابىلايحان كوشەسىنەن ءوتىپ، بايسەيىتوۆا كوشەسىنە جەتپەي ءۇش جىگىتتىڭ جۇگىرىپ بارا جاتقانىن كوردىك.
قارا فۋتبولكادا بولعان جىگىتتىڭ قارا ءتۇستى Camry كولىگىنە سوعىلىپ قالعانىن كورىپ قالدىق. ول سپورت اۋلاسىنا قاراي جۇگىرىپ كەتتى. ونى اق فۋتبولكا كيگەن جىگىت قۋىپ جەتتى. سول ساتتە جاستار ويناپ جۇرگەن بولار دەپ ويلادىق.
الايدا ءۇشىنشى جىگىت اق فۋتبولكاداعى ازاماتتى ارتقى جاعىنان ۇستاپ العانىن كوردىم. بايسەيىتوۆا كوشەسىنەن ءوتىپ كەتكەننەن كەيىن ارىپتەسىمنەن كولىكتى توقتاتۋىن سۇراپ، وقيعا ورنىنا جۇگىردىم.
مەن جۇگىرىپ جەتكەندە اق فۋتبولكادا بولعان جىگىت جاراقاتى سالدارىنان سۇيەنىپ تۇردى. ارتىنشا ول ەكى بەتىمەن جەرگە قۇلاپ قالدى. مەن ونىڭ اياعىندا پىشاق جاراقاتى بار ەكەنىن بايقادىم.
ءبىراق مەن قاسىنا بارعاندا زارداپ شەككەن جىگىت ەسىن ءبىلىپ جاتتى.
سول ساتتە ەكى جىگىتتىڭ جۇگىرىپ بارا جاتقانىن كوردىم. وقيعا ورنىنا كەلگەن كۋاگەرلەر جەدەل جاردەم شاقىرىپ جاتقاندىقتان، جاڭاعى ەكى جىگىتتىڭ ارتىنان جۇگىردىم.
جولدان ءبىر ازاماتتى كەزىكتىرىپ، ول ەكى جىگىتتىڭ نازاربايەۆ كوشەسىنە قاراي قاشىپ بارا جاتقانىن ايتتى. مەن سول كوشەگە دەيىن جەتتىم. ءبىراق ولاردى تاپپاي قالدىم»، - دەدى نۇرپەيىسوۆ.
وكسانا تەن پوليتسەيگە نە سەبەپتى دەنيسكە العاشقى كومەك كورسەتپەي، كۇدىكتىلەردىڭ ارتىنان قاشىپ كەتكەنىن سۇرادى. وعان ءتارتىپ ساقشىسى بىلاي دەپ جاۋاپ بەردى.
«مەن ءوز قىزمەتتىك بورىشىمدى بارىنشا دۇرىس اتقارۋعا تىرىستىم. ءبىر ادامدى پىشاقتاعان ادامدار تاعى الدىنان شىققانداردى دا پىشاقتاپ كەتۋى مۇمكىن.
سول سەبەپتى، باسقالارعا زالالى ءتيىپ كەتپەس ءۇشىن ولاردىڭ ارتىنان جۇگىردىم. زارداپ شەككەن جىگىتتىڭ قاسىندا كۋاگەرلەر بولدى. ولاردان جەدەل جاردەم شاقىرىپ، العاشقى كومەك كورسەتۋىن سۇرادىم»، - دەدى پوليتسەي.
ايتا كەتەيىك، دەنيس تەننىڭ ولىمىنە كىنالى دەپ تانىلعان كۇدىكتىلەر وزىنە تاعىلعان ايىپپەن كەلىسپەي وتىر. ولار ءوز كىناسىن ءالى دە مويىنداعان جوق.
وعان قوسا، كۇدىكتىلەر مارقۇم بولعان مانەرلەپ سىرعاناۋشىنىڭ اناسىنان كەشىرىم دە سۇراماعان.
سونىمەن قاتار، بۇعان دەيىنگى سوتتا وكسانا تەن دەنيستىڭ ءولىمى تاپسىرىسپەن بولعانىنا سەنىمدى ەكەنىن ايتتى.
ودان بولەك، كۇدىكتى ارمان قۇدايبەرگەنوۆتىڭ قىلمىسىنان سوڭ تانىسىنان بەس مىڭ دوللار سۇراعانى بەلگىلى بولدى.
