قازاقستان الپينيستەرى الەمنىڭ ەڭ قاۋىپتى شىڭى - «جان العىش تاۋىن» باعىندىرماق
بۇل تۋرالى ق ر قورعانىس مينيسترلىگى ارميا ورتالىق سپورت كلۋبى سپورت كوميتەتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
K2 (نەمەسە شوگوري شىڭى) - ەۆەرەستتەن (8611 مەتر) كەيىنگى الەمنىڭ ەكىنشى شىڭى. الايدا وعان ورمەلەپ شىعۋ ەۆەرەستتەن دە كۇردەلى. بۇل - ەشبىر ادام قىستىگۇنى شىعۋعا باتپاعان الەمنىڭ سەگىز مىڭ مەترلىك شىڭى بولىپ ەسەپتەلەدى. تاۋ شىڭى پاكىستان مەن قىتاي شەكاراسىنداعى قاراقورىم تاۋلارىندا ورنالاسقان. الپينيستەر ورتاسىندا ول شىڭدى «جان العىش تاۋ» دەپ تە اتايدى ەكەن. سەبەبى، ونى باعىندىرماق بولعانداردىڭ 25 پايىزى جول ورتادا قازا بولعان.
حالىقارالىق ەكسپەديتسياعا تەك تاجىريبەلى الپينيستەر قاتىسادى. ونىڭ ساپىندا ق ر قورعانىس مينيسترلىگى ارميا ورتالىق سپورت كلۋبى سپورت كوميتەتىنىڭ جانىنداعى تاۋ دايارلىعى ورتالىعىنىڭ وفيتسەرى، اعا لەيتەنانت ۆاسيلي پيۆتسوۆ تا بار. ول - الپينيزم بويىنشا ەڭبەك سىڭىرگەن سپورت شەبەرى، «قۇرمەت» وردەنىنىڭ يەگەرى.
«قىس مەزگىلىندە K2 شىڭىن باعىندىرۋ يدەياسى مەنىڭ ويىمنان 2002-2003-جىلدارى قىسقى پولياك ەكسپەديتسياسىنىڭ قۇرامىندا بولعالى بەرى كەتپەگەن ەدى. ءبىزدىڭ كوماندا دەنە دايارلىعىن ۇنەمى شىڭداپ كەلەدى. بۇدان باسقا، بىرنەشە جىلدان بەرى جەرگىلىكتى 6-7 مىڭ مەترلىك شىڭدارعا شىعىپ ءجۇرمىز.
ول تاۋلاردىڭ كليماتى K2 شىڭىنا وتە جاقىن. ەكسپەديتسيا ەكى ايعا جۋىق ۋاقىتتى الادى. شىڭعا كوتەرىلۋدە «گيمالاي ءستيلىن» پايدالانۋ كوزدەلىپ وتىر. ياعني، ارالىق لاگەرلەردىڭ قاجەتتى سانى ورناتىلاتىن بولادى. بۇل، كومانداعا بيىكتىككە شىعۋ ءۇشىن اككليماتيزاتسيادان وتۋگە مۇمكىندىك بەرەدى»، - دەيدى ۆاسيلي پيۆتسوۆ.
ايتا كەتۋ كەرەك، بۇكىل ادامزات تاريحىندا اتالعان شىڭدى قىسقى ۋاقىتتا باعىندىرۋ بويىنشا بۇرىنعى الپينيستەر ءتورت مارتە وزدەرىن سىناپ كورگەن ەكەن. الايدا ول ەكسپەديتسيالاردىڭ بارلىعى ءساتسىز بولعان: توپتار تەك 7200-7650 مەترگە جەتىپ، ارى قاراي كەرى قايتۋدان باسقا امالى قالماعان. بۇل جولعى حالىقارالىق ەكسپەديتسيانى 2019-جىلدىڭ قاڭتارىنان باستاپ اقپانىنا دەيىن جۇرگىزۋ جوسپارلانىپ وتىر.
