ا ق ش اسكەري كەمەسى قارا تەڭىزگە كىردى
ا ق ش كەمەسى قاراشانىڭ سوڭىندا كەرچ بۇعازىندا رەسەي كۇشتەرى ۋكراينا اسكەري كەمەلەرىن تەڭىزشىلەرىمەن بىرگە ۇستاعاننان بەرى ءبىرىنشى رەت قارا تەڭىزگە ەنىپ وتىر.
رۋمىنيا مەن ا ق ش شەنەۋنىكتەرى دەسانت كەمەسى كونستانتا پورتىنا 7- قاڭتار كۇنى بارعانىن جانە ول جەردە 10- قاڭتارعا دەيىن بولاتىنىن ايتادى. بۇدان سوڭ ول رۋمىنيا فرەگاتىمەن بىرگە قارا تەڭىزدىڭ رۋمىنياعا تيەسىلى بولىگىندە اسكەري وقۋ-جاتتىعۋ وتكىزبەك. جاتتىعۋعا قانشا امەريكالىق اسكەر قاتىساتىنى بەلگىسىز.
ا ق ش اسكەري-تەڭىز كۇشتەرىنىڭ وكىلى ت ا س س اگەنتتىگىنە USS Fort McHenry كەمەسى قارا تەڭىزگە اسكەري كەمەلەردىڭ تەڭىزدەردە ءجۇرىپ-تۇرۋ ءتارتىبىن ايقىندايتىن حالىقارالىق مونترە كەلىسىمىنە ساي بارعانىن ايتادى.
25- قاراشادا رەسەي شەكاراشىلارى كەرچ بۇعازى ارقىلى ماريۋپولگە بارماق بولعان ۋكراينانىڭ ءۇش كەمەسىن ۇستاعان. رەسەي بيلىگى كەمەلەر رەسەيدىڭ قىرىم جاعالاۋىنداعى اۋماعىنا زاڭسىز كىرمەك بولدى دەپ سانايدى. كيەۆ بولسا رەسەي مەن ۋكراينا اراسىندا 2003-جىلى جاسالعان كەلىسىم بويىنشا ۋكراين كەمەلەرىنىڭ قارا تەڭىزدىڭ رەسەيگە تيەسىلى اۋماعىندا جۇرۋىنە بولاتىنىن ايتادى.
ءۇش كەمەدە بولعان 24 ۋكراين تەڭىزشىسى سوت سانكسياسىمەن ماسكەۋدەگى تەرگەۋ اباقتىسىنا قاماۋعا الىندى. ولار رەسەيدىڭ مەملەكەتتىك شەكاراسىن بۇزدى دەپ ايىپتالىپ وتىر. تەڭىزشىلەر وزدەرىن اسكەري تۇتقىنبىز دەپ سانايدى.
«ازاتتىق»
