قاراعاندىداعى كىسى ءولىمى: پوليتسيا گۋرۋريانعا ءوز ەركىمەن بەرىلۋگە كەڭەس بەرەدى
«بۇگىنگى كۇنى قاراعاندىدا بۇزاقىلىق ارەكەت جاساپ، 23 جاستاعى جىگىتتى ءولتىردى دەگەن كۇدىكپەن 8 ادام ۇستالىپ تۇتقىندالدى جانە كۇدىكتىلەردىڭ ءبىرى گۋرۋريانعا ىزدەۋ جاريالاندى. تەرگەۋ اياسىندا پوليتسيا توبى ونىڭ بولۋى مۇمكىن جەرىنە كەتتى. كۇدىكتىنىڭ بەرىلۋگە دايىن ەكەندىگى تۋرالى مالىمدەمەسى جەلىگە جاريالانۋىنا بايلانىستى وسىدان 2 كۇن بۇرىن ونىڭ تۋىستارىنا قىزمەتكەرلەرىمىزدىڭ بايلانىس دەرەكتەرى بەرىلگەن بولاتىن. الايدا وسى كۇنگە دەيىن ەشكىم بايلانىسقا شىققان جوق»، - دەدى الماس سادۋبايەۆ.
دەپارتامەنت باسشىسى ەلىمىزدىڭ ىشكى ىستەر مينيسترلىگى ءىستىڭ وبەكتيۆتى ءارى جان- جاقتى تەرگەلەتىندىگىنە كەپىل بەرەتىندىگىن اتاپ وتەدى. سونىمەن قاتار ازامات گۋرۋريانعا ءوز ەركىمەن پوليتسيا قىزمەتكەرىنە بەرىلۋگە كەڭەس بەرەدى.
«تەرگەۋ بارىسى قازاقستان رەسپۋبليكاسى ىشكى ىستەر مينيسترلىگىنىڭ ايرىقشا باقىلاۋىنا الىنعان»، - دەدى ول.
ەسكە سالساق، 1 - قاڭتار كۇنى قاراعاندىداعى «دريەۆنيي ريم» مەيرامحاناسىندا بولعان جانجال كەزىندە ءبىر جىگىت كوز جۇمعان بولاتىن. بيلىك اتالعان پروتسەستىڭ وبەكتيۆتى جانە بارىنشا اشىق وتەتىنىنە ۋادە بەردى.
ەستەرىڭىزگە سالا كەتەيىك، ينتەرنەتتە ءوزىن «نارەك گۋرۋريان» دەپ تانىستىرعان ەر ادامنىڭ ۆيدەو ۇندەۋى جاريالانعان. بۇعان دەيىن «قاراعاندىداعى جاپپاي توبەلەسكە قاتىستى» دەگەن كۇدىككە ىلىنگەن نارەك گۋرۋريان ەسىمدى ادامعا حالىقارالىق ىزدەۋ جاريالانعان بولاتىن.
ۆيدەوداعى ەر ادام «توبەلەسكە قاتىسقانىن، ءبىراق ەشكىمدى ولتىرمەگەنىن» مالىمدەدى. ول «ەگەر قاۋىپسىزدىك پەن اشىق تەرگەۋگە كەپىلدىك بولسا، قازاقستان بيلىگىنە بەرىلۋگە دايىن» ەكەنىن ايتتى.
«ىستەگەن ىسىمە جاۋاپ بەرۋگە دايىنمىن. ءبىراق بىرەۋدىڭ ءىسىن موينىما المايمىن. ەشكىمدى ولتىرگەن جوقپىن» دەدى ۆيدەوداعى ادام.
اۆتور: مارلان جيەمباي
