قايىرىمدى جاندار الماتى وبلىسىنداعى كوپ بالالى اناعا باسپانا سىيلادى
الماتى وبلىسىنداعى اقسۋ اۋدانىنداعى جانسۇگىروۆ اۋىلىنىڭ تۇرعىنى الماگۇلدىڭ وسىدان ءۇش اي بۇرىن جولداسى قايتىس بولعان، دەپ حابارلايدى قازاقپارات ءتىلشىسى.
«قارەكەت» قايىرىمدىلىك قورىنىڭ جۇمىس ىستەپ جاتقانىنا 1 جىلدان اسا ۋاقىت بولعان. وسى ۋاقىت ارالىعىندا قانشاما ءۇيسىز جۇرگەن جانۇيالارعا باسپانا الىپ بەرىپ، ساۋاپتى ءىس جاساپ كەلەدى. ءبىزدىڭ اقسۋ اۋدانىنىڭ تۇرعىنى الماگۇل قۇدياروۆا اتالعان قور ارقىلى تەگىن باسپاناعا قول جەتكىزگەن 55- ادام. ال جالپى قور 2018 -جىلى ەلىمىزدىڭ تۇكپىر-تۇكپىرىندەگى 60 ادامنىڭ باسپانالى بولۋىنا سەبەپشى بولدى»، - دەدى اقسۋ اۋداندىق اكىمدىگىنىڭ باسپا ءسوز قىزمەتىنىڭ وكىلى قۇرمەت دوسجانوۆا.
جىلدار بويى ارمانداعان باسپاناسىنا قول جەتكىزگەن الماگۇل ءتورت بالانىڭ اناسى. قازىر بەسىنشى بالاسىنا اياعى اۋىر.
«قايىرىمدىلىك قورىنا، حالقىما مىڭ العىسىمدى بىلدىرەمىن. قانشاما جىلدار بويى دالادا تەنتىرەپ ءجۇرىپ، باسپاناعا قولىمىز جەتتى. قۋانىشىمدا شەك جوق. قورعا اتسالىسىپ، دەمەۋشى بولعان بارشا جاماعاتقا العىسىمدى بىلدىرەمىن»، - دەدى الماگۇل قۇدياروۆا.
قۋانىشى ەسەلەنىپ جاتقان الماگۇل قۇدياروۆاعا 4 بولمەلى جەر ءۇيدىڭ كىلتىن قايىرىمدى جاندار سالتاناتتى تۇردە تابىستادى.
