شىمكەنت تۇرعىنى سيترۋستى جەمىستەر مەن بانان وسىرەدى

باعبان اسلان بەكتۇرعانوۆ تۋىسىمەن بىرگە بۇل ءىستى العاشىندا حوببي رەتىندە باستاعان ەكەن. جىلىجاي سالىپ، ليموننىڭ «مەيەر» دەگەن سورتىن ەگىپ كورەدى. قانداي ءىس باستاسا دا ناتيجەسىن كورمەيىنشە جانى تىنىش تاپپايتىن باعبان العاشقى ءونىمدى بەس جىل كۇتىپتى، بۇگىندە تۇراقتى كليەنتتەرى دە بار. ليمون ەرەكشە كۇتىمدى قاجەت ەتەدى دەگەن ول ءوز ءىسىنىڭ سىرىمەن دە بولىسە كەتتى. «ليمونعا قاتتى ىلعال اۋا كەرەك. مينۋس تەمپەراتۋراعا شىدامايدى، 1 گرادۋس جىلىلىقتان 50 گرادۋس ىستىققا دەيىن تۇرا بەرەدى. بۇنى توبەدەن جاڭبىرلاتۋ ءتاسىلى ارقىلى سۋارامىز، استىنان تامشىلاتۋ ءادىسىن قولدانامىز. بيىل وسى تالدان 220 دانا ليمون الدىق» ، - دەدى اسلان بەكتۇرعانوۆ.

باعبان بۇل كاسىپكە قىزىققاندار ءۇشىن ليمون كوشەتىن ساتىپ، ءتىپتى ونى كۇتۋدە ءوز كەڭەسىمەن دە ءبولىسىپ كەلەدى. كوشەت باعاسى كولەمىنە قاراي 2500 تەڭگەدەن باستالىپ، دايىن اعاشتارى 50-70 مىڭ تەڭگەگە دەيىن بارادى. جاس باعبان ەندى وسى كاسىپتى كەڭەيتىپ، ونىممەن تەك شىمكەنتتى ەمەس، كۇللى ەلدى قامتاماسىز ەتسەك دەگەن جوسپار قۇرىپ وتىر. تەك مەملەكەتتەن جەمىستىڭ بۇل تۇرىنە ەشبىر قولداۋ بەرىلمەيدى ەكەن.

"مەملەكەتتەن قولداۋ بولسا قانەكي، ارينە.. . وسىلاي ءوزىمىزدىڭ وتاندىق ءونىم ەتىپ، تەك شىمكەنتتى عانا ەمەس، كۇللى قازاقستاندى قامتاماسىز ەتەتىندەي ەتىپ ۇلكەن جىلىجاي سالۋعا ارەكەت جاساپ جاتىرمىز» ، - دەدى ول.

 شىمكەنت تۇرعىنىنىڭ باعىنان تەك ليمون ەمەس، سيترۋستى جەمىستەردىڭ وزگە دە تۇرلەرىن كەزدەستىرۋگە بولادى. ماسەلەن، اپەلسين مەن ماندارين، گرەيپفرۋت، ءتىپتى بانان دا بار. ءبىراق بۇل جەمىستەردەن ءالى ءونىم الا قويماپتى. اتالعان باقتان سيرەك كەزدەسەتىن دەكوراتيۆتى گۇلدەردى دە كورەسىز. بۇل ىسكە اناسى قولعابىس ەتەدى ەكەن. بۇدان وزگە تۇرعىن بالىقتىڭ «كارپ كوي» اتتى جاپونيالىق ءتۇرىن اسىرايدى. «الىستان كوز جانارىن الاتىن ءتۇرلى- ءتۇستى بالىقتى دا كوبەيتۋ جوسپاردا بار» ، - دەيدى اسلان بەكتۇرعانوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى