قادىر اقىننىڭ تەگىن قاتە جازىپ ءجۇرمىز بە؟
جان سىرىن جىرىمەن جەتكىزە بىلگەن اقىننىڭ كوزى ءتىرى بولعاندا 84 جاسقا تولار ەدى. وسى ورايدا قازاق ەلى قادىر تۇتقان اقىننىڭ تەگىن دۇرىس جازىپ ءجۇرمىز بە دەگەن ساۋالعا جاۋاپ ىزدەۋدى ءجون كوردىك. سەبەبى قادىر اقىننىڭ تەگى تۋرالى جازعاندا ءبىرى " ءالى" دەسە، ءبىرى "ءالي" دەپ جازادى. قادىر اقىننىڭ تەگى تۋرالى بەلگىلى اقىن ورازاقىن اسقار جازۋشى، جۋرناليست قالي سارسەنباي جانە جۇسىپبەك قورعاسبەكپەن بولعان سۇحبات كەزىندە ايتىپ وتكەن ەكەن. "حالىق ءسوزى" گازەتى مەن abai.kz cايتىندا جاريالانعان "قادىردان ءسوز قالعان با؟ " اتتى سۇحبات- اڭگىمەدە ورازاقىن اسقار بىلاي دەيدى:
- اتى- ءجونىن قادىر مىرزا ءالي دەپ دۇرىس ايتىپ وتىرسىڭ. ءوزى قايتىس بولعاننان كەيىن افوريزمدەرىن "ولكە" باسپاسى جيناقتاپ شىعارىپتى. وسى ۇلكەن كىتاپتىڭ باسىنان اياعىنا دەيىن قادىر مىرزا ءالى دەپ ءجۇر. ال 2004 -جىلى قوس- قوسىنان شىققان "جازمىش" پەن "يىرىمدە" دە، 2006 -جىلى شىققان "الماس جەردە قالماس" اتتى افوريزمدەر جيناعىندا دا قادىر مىرزا ءالي دەپ كورسەتىلىپتى. وسى كەيىنگى اتالعان كىتاپتىڭ ىشىنە ءوزى "قادىر مىرزا ءالي" دەپ قولتاڭبا قالدىرعان ەكەن. بۇل از بولسا، قادىردىڭ ءوزىنىڭ ايتقانى تاعى بار: "وسى مەن قاي جەرگە جازسام دا، قولجازبالارىمدا قادىر مىرزا ءالي دەپ جازامىن، ال گازەت- جۋرنالدارعا قادىر مىرزا ءالى دەپ شىعىپ كەتەدى. وسىنى قانشا ايتسام دا ۇقتىرا المادىم"، - دەپ. سول ەندى ەسىمە ءتۇسىپ وتىر. قادىر مىرزا ءاليدىڭ اتى- ءجونى دۇرىستاپ جازىلسا ەكەن دەگەندى الدىمەن ايتقىم كەلىپ وتىر. دەمەك، قادىر اقىننىڭ ءوزى ايتا كەتكەندەي تەگىن ءالي دەپ جازعانىمىز ءجون- اق بولار.
"قادىر - نايزاعايلى اقىن. ءداۋىردىڭ، ۋاقىتتىڭ ءوزى جاراتقان ومىرشەڭ اقىن. ونىڭ پوەزياسى - ءوزىمىز ءسۇيىپ وتىرعان ءداۋىر مىنەزدەس" - دەپ اقيىق اقىن مۇقاعالي ماقاتايەۆ ايتا كەتكەندەي، اقىننىڭ تەگىن دۇرىس جازۋ دا - قازاقتىڭ قارا ولەڭىنىڭ الدىنداعى ءبىر پارىزىمىز ىسپەتتى.
Massaget.kz
