ءدامدى كاۋاپتى قالاي دايىنداۋعا بولادى: باس اسپازدار جاسىرعان قۇپيا

سەبەبى، كاۋاپ ءپىسىرۋ ءسىز ويلاعانداي قيىن ەمەس. ول ءۇشىن بىرنەشە ەرەجەلەردى ۇستانۋ كەرەك. سوعان بايلانىستى Stan.kz اقپاراتتىق اگەنتتىگى سىزدەرگە ءدامدى كاۋاپتى قالاي دايىنداي كەرەكتىگى جايلى پايدالى كەڭەستەر ۇسىنادى.

كاۋاپ ءپىسىرۋ ءۇشىن قانداي ەت كەرەك

كاۋاپتىڭ ءدامدى جانە شىرىندى شىعۋى - دۇرىس تاڭدالعان جانە جاقسى مارينادتالعان ەتكە بايلانىستى.

ءداستۇرلى كاۋاپ قوي ەتىنەن جاسالادى. دەگەنمەن، ونىڭ اركىمگە ۇناي بەرمەيتىن ەرەكشە ءيىسى بار.

ال تاۋىق ەتىنەن جاسالعان كاۋاپ ارينە، كوپتەگەن ادامدارعا ۇنايدى، ويتكەنى ول نازىك جانە حوش ءيىستى بولادى. ونداي كاۋاپ دايىنداۋ ءۇشىن تاۋىقتىڭ ءتوس ەتىن نەمەسە سان ەتىن الساڭىز بولادى.

سونداي-اق، سيىر ەتىنەن كاۋاپ ازىرلەۋ ءۇشىن سۇيەكتەگى، ياعني ارقاسىنداعى جۋان جون ەتتى العان ءجون. سەبەبى، بۇل بۇلشىق ەتتەر جانۋاردىڭ قوزعالىسىنا تىكەلەي قاتىسپايتىندىقتان، جۇمساق جانە شىرىندى بولادى، دەيدى بەلگىلى باس اسپاز دانيل زنامەنسكي.

دەگەنمەن، قانداي ەت تاڭداساڭىز دا، ونىڭ جوعارى ساپالى ەكەنىن مىندەتتى تۇردە تەكسەرىڭىز. جاقسى ەت قولعا جابىسپايدى جانە ونى ساۋساقپەن شۇقىپ باسقان كەزدە پايدا بولاتىن شۇڭقىر تەز قالپىنا كەلەدى. جاقسى ەتتەن قاتتى جاعىمسىز ءيىس شىقپاۋى كەرەك، ءبىراق قانعا بويالىپ نەمەسە شىرىشتى قابىقپەن جابىلىپ تۇرۋى ءتيىس.

ەتتى ساتىپ العان كەزدە ونى قاعاز مايلىققا قويىپ كورىڭىز. ەگەر مايلىقتا قىزعىلت بەلگىلەر قالسا، وندا ەت حيميالىق وڭدەۋدەن وتكەن دەگەندى بىلدىرەدى.

ءبىراق، بۋى بۇرقىراعان جاس ەت پەن مۇزداتىلعان ەتتى قولدانۋدىڭ قاجەتى جوق. بۋى بۇرقىراعان جاس ەتتى جانۋاردى سويعاننان كەيىن ءۇش ساعات وتپەي السا، ودان دايىندالعان كاۋاپ قاتتى بولىپ قالادى. دەگەنمەن، مۇزداتىلعان ەتتەن ازىرلەسە دە كاۋاپ ويداعىداي شىقپايدى. ويتكەنى، مۇزداتىلعان ەتتى ءجىبىتۋ كەزىندە سۇيىقتىقتىڭ كوپشىلىگى اعىپ كەتەدى. ەڭ دۇرىسى سالقىنداتىلعان ەت بولماق.

ەتتى قالاي كەسۋ كەرەك

ەتتى ۇزىندىعى 3,5-4 سانتيمەتر ەتىپ قابىرعالارىمەن بىرگە تەكشە (كۋبيك) ءپىشىندى قىلىپ كەسەدى. ەگەر، كەسەكتەر كىشكەنتاي بولسا ولار كۇيىپ كەتەدى، ال ونداي كەزدە كاۋاپ قۇرعاق بولىپ قالادى. ەگەر ول تىم ۇلكەن بولسا، وندا ەت ۇزاق ۋاقىت پىسەتىن بولادى جانە ءتىپتى قۋىرىلماي قالادى.

ال كاۋاپتى تاۋىقتىڭ سان ەتىنەن جاسايتىن بولساڭىز، ەتىن سۇيەكتەن اجىراتىپ العان ءجون. وسىلاي اجىراتىپ الساڭىز ەتتى ءىسپاراعا (شامپۋر) ءتىزۋ جەڭىل بولادى، سودان كەيىن سۇيەكتەردى مۇجۋدىڭ دا قاجەتى بولمايدى.

كاۋاپتى سيىر ەتىنەن ازىرلەيتىن كەزدە ەتتەگى بارلىق تامىرلاردى الىپ تاستاۋ كەرەك. سەبەبى، ىستىق وتتا پىسىرگەن كەزدە ولار ءبىر جەرگە جينالىپ قالادى دا ەت شىرىنىن جوعالتادى.

كاۋاپتى قالاي مارينادتايدى

ماريناد ەتتى ودان ءارى شىرىندى جانە حوش ءيىستى ەتەدى. جاڭا، جاڭادان ساتىپ الىنعان ەتتى جاي عانا تۇزداپ، بۇرىش سەۋىپ ءپىسىرۋدى باستاي بەرۋگە بولادى. ءبىراق ەگەر ءسىز كاۋاپتى كەيىنىرەك دايىنداعىڭىز كەلسە، وندا ەتتى مارينادتاپ العان دۇرىس.

«ماريناد ەتتىڭ بارلىق قاسيەتتەرىن ءبىر نەمەسە ەكى كۇن بويى ساقتايدى»، - دەيدى بەلگىلى باس اسپاز دانيل زنامەنسكي.

مارينادتى كوبىنە پياز، ايران، تامات شىرىنى، سىرا نەمەسە جەمىس شىرىنى نەگىزىندە جاسايدى جانە دامدەۋىشتەرمەن دامدەيدى.

ءبىراق، اسپازدار مارينادقا سىركە سۋىن قوسپاۋعا كەڭەس بەرەدى. ول تالشىقتاردى قاتايتىپ جىبەرەتىندىكتەن، ەت قۇرعاق بولىپ قالادى. بىرىنشىدەن، سىركە سۋىن وتە قاتتى، ەسكىرگەن ەتتى جۇمسارتۋ ءۇشىن قوسادى. ەكىنشىدەن، سىركە سۋىن جانە دامدەۋىشتەردى ەسكى ەتتىڭ ءيىسىن شىعارماۋ ءۇشىن قولدانادى.

مانگالدى قالاي دايىنداعان دۇرىس

وتتىڭ ۇشقىندارى ۇشىپ كەتپەس ءۇشىن، جەل سوقپايتىن جەردى تابۋعا تىرىسىڭىز. قاۋىپسىزدىك ماقساتىندا مانگالدى قۇرعاق زاتتار مەن اعاش، قوقىس سياقتى جانعىش زاتتاردىڭ جانىنا قويماڭىز. سونداي-اق، مانگالدى بۇتاقتارى سالبىراپ تۇرعان اعاشتىڭ استىنا جانە عيماراتتاردىڭ جانىندا دا ورناتپاڭىز.

كاۋاپ دايىنداۋدا دۇرىس وتىن تاڭداۋ وتە ماڭىزدى. اعاش كاۋاپتىڭ دامىنە تىكەلەي اسەر ەتەدى.

مۇندا قىلقان جاپىراقتى اعاشتار كاۋاپ پىسىرۋگە جارامايدى. سەبەبى، جانعان كەزدە مۇنداي وتىننان شايىر بولىنەدى.

ەگەر ەت ونى ءسىڭىرىپ السا، ول وزگەشە دامگە يە بولادى. سونداي-اق بوياۋ نەمەسە لاك جاعىلعان اعاشتاردى دا الۋعا بولمايدى. مىسالى، ەسكى ورىندىقتاردىڭ اياقتارى. بۇلار ەتتىڭ دامىنە جانە ءسىزدىڭ دەنساۋلىعىڭىزعا تەرىس اسەر ەتەدى.

بارىنەن دە ەمەن، جوكە، قايىڭ جانە الما، المۇرت، شيە ءتارىزدى بارلىق جەمىس اعاشتارى مەن جاپىراقتى اعاشتار جاقسى جارايدى. سونىمەن بىرگە، وتىن قۇرعاق بولۋى كەرەك جانە تىم ۇلكەن بولماۋى ءتيىس، ايتپەسە ول ۇزاق ۋاقىت جاناتىن بولادى.

ەگەر دۇرىس وتىن ىزدەيتىن ۋاقىتىڭىز نەمەسە مۇمكىندىگىڭىز بولماسا، دايىن كومىر ساتىپ الىڭىز. ولاردى كەز-كەلگەن سۋپەرماركەتتەن تابۋعا بولادى. جانە قاپتاماسىندا «قايىڭ كومىرى» دەپ جازىلىپ تۇرعانىن العان ءجون. ورتاشا العاندا، كومىر 20-25 مينۋت جانىپ تۇرادى.

ال كومىر سالىنعان قاعاز قاپتامانى وت تۇتاتۋ ءۇشىن پايدالانساڭىز بولادى. وت جاعۋ ءۇشىن ەشقانداي حيميالىق زاتتاردى قولدانباڭىز. بۇل قاۋىپتى جانە كاۋاپ حيميا ساسىپ كەتەدى.

كاۋاپتى نەگە سالىپ پىسىرگەن ءجون

كاۋاپتى بارىنەن دە ءىسپارالارعا ءتىزىپ پىسىرگەن جاقسى. سونداي-اق، ەتتى تورلى گريلدە قۋىرۋعا بولادى، ءبىراق بۇل كاۋاپ دايىنداۋدىڭ ءداستۇرلى ءادىسى ەمەس.

«بۇرىشتىق ءىسپارالاردى پايدالانباۋدى ۇسىنامىن. كاۋاپ پىسىرگىڭىز كەلسە توت باسپايتىن بولاتتان جاسالعان ءىسپارالاردى قولدانىڭىز. سەبەبى، ونداي ءىسپارادا ەت تىعىز تۇرادى جانە قۋىرعان كەزدە اينالىپ كەتپەيدى»، - دەيدى باس اسپاز دانيل زنامەنسكي.

ەتتى ءىسپاراعا تىم قاتتى تىعىزداپ كىرگىزبەۋ كەرەك، ايتپەسە كاۋاپ بارلىق جاعىنان قۋىرىلماي قالادى. ءبىراق، ولاردى ءبىر-بىرىنەن الىستاتىپ تىعۋعا دا بولمايدى. سوندىقتان ەتتى ءبىر-بىرىنە ازداپ ءتيدىرىپ، اراسىندا ءىسپارا كورىنبەيتىندەي ەتىپ تىزبەكتەۋ كەرەك.

ەگەر كەسەكتەردىڭ ولشەمى ءارتۇرلى بولعان جاعدايدا، شەتىنە كىشكەنتايلارىن ورنالاستىرعان ءجون. ال ەتتى شىرىندى جاساۋ ءۇشىن ءار كەسەكتەن كەيىن كىشكەنە مايلاردى جانشۋ كەرەك. ەگەر ەتتەن ءبىر نارسە سالاقتاپ تۇرسا، وندا ول بولىكتەردى كەسىپ تاستاعان ءجون، ويتكەنى قۋىرۋ بارىسىندا ولار كۇيىپ، كومىرگە اينالادى.

ەتتى مانگالعا قاشان جانە قالاي قويۋ كەرەك

كاۋاپ جالىنسىز وتتا بۇقتىرىلۋى كەرەك. ەگەر كومىر اق كۇلمەن جابىلعان بولسا، وندا كاۋاپتى پىسىرە بەرۋگە بولادى. ەگەر قىزۋى از بولسا، وندا جالپاق زاتپەن مانگالدىڭ ۇستىنەن جەلپىڭىز.

سونداي-اق، كاۋاپتى پىسىرەر الدىندا كومىرگە گۇلشەتەن (روزمارين)، سالبەن (شالفەي) نەمەسە شىرعالجىڭنىڭ (ەستراگون) بىرنەشە بۇتاعىن تاستاڭىز. سوندا ەت حوش ءيىستى شوپتەردىڭ ءيىسىن سىڭىرەدى. ءبىراق، ەشبىر جاعدايدا ەتتى اشىق وتتا پىسىرۋگە بولمايدى.

ءىسپارالاردى مانگالعا تىعىز ورنالاستىرۋ كەرەك. ەت شىرىنىن ساقتاپ، قابىقپەن جابىلۋ ءۇشىن العاشقى 3-5 مينۋتتا ولاردى ءجيى اينالدىرىپ، اۋىستىرىپ تۇرۋ قاجەت. سودان كەيىن كاۋاپ بىركەلكى ءپىسۋ ءۇشىن ءىسپارانى ءار 2-3 مينۋت سايىن اينالدىرۋ كەرەك.

ال ەتتەن اققان مايدىڭ ارقاسىندا كومىر قايتا تۇتانىپ كەتۋى مۇمكىن. ەگەر كومىر قايتادان جانا باستاسا، ءىسپارالاردى شەتكە سىرعىتىپ، كومىردى ارالاستىرىپ، ءپىسىرۋدى جالعاستىرا بەرسەڭىز بولادى.

قاتتى الاۋدى سۋمەن نەمەسە قالعان مارينادپەن سوندىرۋگە بولادى. ول ءۇشىن سۇيىقتىقتى الدىن-الا بوتەلكەگە قۇيىپ، قاقپاعىن بىرنەشە ۇساق تەسىككە تەسىپ الىڭىز. قاجەت بولعان جاعدايدا، ءىسپارالاردى شەتكە جىلجىتىپ الگى سۇيىقتىقتى كومىرگە قۇيىڭىز.

كوپتەگەن زاڭدىلىقتارعا قاراماستان، كاۋاپتىڭ ۇستىنەن تۇزدىق قۇيۋ مىندەتتى ەمەس. بۇل ەتتىڭ شىرىندى بولاتىنىنا كەپىلدىك بەرمەيدى.

كاۋاپتى قانشا ۋاقىت ءپىسىرۋ كەرەك

ورتاشا العاندا، كاۋاپ 15 تەن 25 مينۋتقا دەيىن ۋاقىتتا دايىندالادى. بارلىعى كومىردىڭ تەمپەراتۋراسىنا جانە تابيعي جاعدايلارعا بايلانىستى. مىسالى، جاز مەزگىلىندە ەت تەز پىسەدى.

كاۋاپتىڭ پىسكەن-پىسپەگەنىن تەكسەرۋ ءۇشىن ەتتىڭ ەڭ قالىڭ بولىگىن كەسىڭىز دە، ازداپ باسىڭىز. ەگەر ەتتەن ءتۇسسىز شىرىن بولىنسە، وندا كاۋاپتى ءىساپارادان الاتىن ۋاقىت كەلدى. ال ەگەر شىرىننىڭ ءتۇسى قىزىل بولسا، وندا ەتتى تاعى ءبىراز ءپىسىرۋ قاجەت.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى