دەنيس تەننىڭ اناسى ۇلىنىڭ تاپسىرىسپەن ولتىرىلگەنىنە سەنىمدى ەكەنىن ايتتى
«اينانى ءبىرىنشى بولىپ قۇدايبەرگەنوۆ شەشكەن. ولاردىڭ جاۋاپتارىنا قاراساق، سول جەردە ون مينۋتتاي ءبىر نارسەنى كۇتكەن. ەكى اينانىڭ شەشىلۋ ۋاقىتىنىڭ اراسى 15 مينۋت. ول كەزدە قياسوۆ پىشاقتى جەرگە تاستاپ، ويناپ وتىرادى. مۇنى قياسوۆتىڭ ءوزى جاۋاپ بەرۋ بارىسىندا ايتتى. 14:52 دە دەنيس مەيرامحانادان شىعىپ، كولىككە قاراي بارادى. سول كەزدە قياسوۆ پەن قۇدايبەرگەنوۆ اينا شەشىپ جاتقان.
ال تولىبايەۆانىڭ جاۋابىنا سۇيەنسەك، قياسوۆ بەلگىسىز سەبەپپەن تۇرعان ورنىنا قايتا ورالادى. سول ساتتە دەنيس ءوز كولىگىنە قۇلاعىندا قۇلاققابىمەن ءان تىڭداپ بارا جاتقان. تولىبايەۆا ونىڭ كولىك يەسى ەكەنىن قايدان ءبىلدى سوندا؟ ول تۇك بايقاماستان، كولىگىنە جاقىندادى. سول كەزدە دەنيس قۇدايبەرگەنوۆتى كورەدى. ول ءوز كەزەگىندە شەشىپ تاستاعان كولىكتىڭ ايناسىن دەنيستىڭ قولىنا ۇستاتتى.
قانداي ۇرى ءوزى قولدى ەتكەن نارسەسىن ونىڭ يەسىنە قايتارىپ بەرەدى. وعان قوسا، ونىمەن ۇرىسا باستايدى. قۇدايبەرگەنوۆ دەنيسكە نە دەگەنىن بىلمەيمىن. ءبىراق ونىڭ سوزىنەن كەيىن ۇلىم اشۋلانىپ كەتەدى. ارتىنان قۇدايبەرگەنوۆ قاشپاق بولىپ، ءوتىپ بارا جاتقان كولىكتىڭ ۇستىنە قۇلايدى. سودان كەيىن ول ءبىرتۇرلى ارەكەت جاساعان. قۇدايبەرگەنوۆ دەنيستىڭ كولىگىنەن اينالىپ ءوتىپ، سپورت الاڭىنا قاراي باردى. دەمەك، ونىڭ قاشقىسى كەلمەگەن.
ولاردىڭ ارتىنان پىشاقپەن ويناپ تۇرعان قياسوۆ جۇگىرىپ باردى. تولىبايەۆا سول ساتتە قورقىپ كەتىپ، وقيعا ورنىنان كەتىپ قالادى. نەدەن قورىقتى؟ سوندا ءىستىڭ نەمەن اياقتالاتىن بىلگەنى مە؟ ولاردىڭ سپورت الاڭىنا قاراي بارعانىنا بىرنەشە سەبەپ بولۋى مۇمكىن. بىرىنشىدەن، اعاش كوپ بولعان سوڭ، قىلمىس كورىنبەسىن دەگەن شىعار. ەكىنشىدەن، مۇمكىن ول جەردە ءبىر ادام تۇرعان شىعار. ۇشىنشىدەن، سول ءسات جان-جاققا كورىنەتىندىكتەن، بىرەۋ قىلمىستى تاماشالاپ تۇرسىن دەگەن بولار»، - دەدى وكسانا تەن.
مارقۇمنىڭ اناسى بۇل وقيعانىڭ ۇرلىق ەكەنىنە سەنبەيتىنىن ايتتى.
«مەن بۇل ويعا بارلىعىن ساراپتاپ بولعاسىن كەلدىم. ولار، ءتىپتى اينانى دا الىپ كەتپەگەن. ماقسات باسقا بولعان. دەنيستە انا اينالاردان دا قىمبات نارسە بولدى. ءاميان، قۇلاققاپ، نوۋتبۋك جانە تاعى دا باسقا باعالى زاتتار بولدى. ولار ەشتەڭە الىپ كەتپەدى. سەبەبى، ولار تەك قانا ءولتىرۋ ءۇشىن باردى دەپ ويلايمىن»، - دەدى دەنيستىڭ اناسى.
