الماتى وبلىسى ۇيعىر اۋدانىنا بارىپ دەمالاتىن تۋريستەر سانى ارتىپ كەلەدى
تاقتايداي تەگىس جولمەن شالعاي جەرلەرگە جەتۋ اناعۇرلىم جەڭىلدەي تۇسكەن. الماتىدان شونجىنىڭ ىستىق سۋلارىنا دەيىنگى ارالىق شامامەن 300 شاقىرىم بولادى. ەسكى جولدىڭ بويىندا اۋىلدار كوپ ءارى تار ەدى. باتىس ەۆروپا- باتىس قىتاي حالىقارالىق ترانزيتتىك كولىك جولى ءبىراز ۋاقىتتى ۇنەمدەۋگە مۇمكىندىك بەرەدى. ەڭ باستىسى تۋريستەر ءۇشىن جايلى. مينەرالدى سۋدىڭ قاسيەتىن باعالايتىن ادامدار جۇما كۇنى تۇندەلەتىپ كەلە باستايدى.
كەنجەمۇرات دۇكەنبايەۆ، قالا تۇرعىنى:
- ءۇش جارىم ساعاتتا جەتىپ كەلدىك. تاماشا. دەمالىس ءۇيىنىڭ دەڭگەيىن الىپ قاراساق ەشكىمنەن كەم ەمەس. دەڭگەيى جوعارى. مىنە كافەسى تۇر. ماگازينى بار. كەڭەيتىپ جاتىر. قاراسام مىنا ەۆروپانىڭ ستاندارتىمەن سالىنىپ جاتىر.
جازدىڭ جايماشۋاق كۇندەرىن ساعىنعان ادامدار الىستان ات ارىلتىپ كەلىپ وسى ىستىق سۋعا ءتۇسۋدى ءجون كورەدى. قازىر قاڭتار ايى. ال مىنا باسسەيندەگى سۋدىڭ تەمپەراتۋراسى 40+ گرادۋستى كورسەتىپ تۇر. جەر استىنان شىعاتىن مينەرالدى سۋعا كۇز ايلارىنان باستاپ جاز كەلگەنگە دەيىن تۇسۋگە بولادى. شونجىنىڭ ىستىق سۋى سارى اعاش شيپاجايىنىڭ سۋىنىڭ قۇرامىنا ۇقساس، دەيدى ماماندار. اعزاعا دا، بۇلشىق ەت پەن ءسىڭىردى قىزدىرۋعا دا پايدالى.
ولگا بۋتاريەۆا، دەمالىس ورنىنىڭ اكىمگەرى:
- تۋريستەر مەرەكە جانە دەمالىس كۇندەرى وتە كوپ كەلەدى. مىسالى، ءبىزدىڭ قوناقۇيىمىزدىڭ 120 نومەرىنىڭ بارلىعى بوس بولمايدى. قازاقستاندى ايتپاعاندا پولشا، امەريكا، رەسەي مەن باسقا مەملەكەتتەردەن تۋريستەر ءجيى كەلىپ تۇرادى.
اكىمدىك قىزمەتكەرلەرىنىڭ ايتۋىنشا بۇگىندە اۋداندا 40 تان استام دەمالىس ورنى جۇمىس ىستەپ تۇر. الداعى ۋاقىتتا دا اۋداندا بىرنەشە دەمالىس ورىندارى پايدالانۋعا بەرىلەدى دەگەن جوسپار بار. شاعىن كاسىپ بولعانىمەن ماڭىزى زور. بيۋدجەتكە قوسىمشا سالىق تۇسسە، اۋىل تۇرعىندارى ءۇشىن تۇراقتى جۇمىس كوزى.
www.24.kz
