قازا تاپقان ايەلگە حات
بار-جوعى 25 جاسىندا. ريچارد فەينمان ارلينگە 13 جاسىنان عاشىق بولادى. 19 جاستا نەكەلەرى قيىلىپ، ءبىراق، توي كۇندەرىندە-اق ارلين قاتتى سىرقاتتانىپ جۇرەدى. فەينمان بار جاعدايىن جاساۋعا تىرىسقانىمەن، نەكەلى جارى كوز الدىندا، ءوز قولىندا جان تاپسىرادى.
عالىمدى سۇيىكتىسىنىڭ قازاسى قاتتى مازالاپ، اۋىر مۇڭنىڭ استىندا قالدىرىپ كەتسە كەرەك.
1946-جىلدىڭ قازانىندا، ارادا 16 اي وتكەندە، فەينمان ايەلىنە ارناپ حات جازادى، ءبىراق ول حات 43 جىلدان سوڭ عالىمنىڭ قازاسىنان كەيىن، سارعايعان كونۆەرت ىشىنەن تابىلعان.
الگى حات كوپ ۋاقىت قالتادا كوپ بۇكتەلىپ، كوپ ۇستالعاندىقتان، كونەرىپ كەتىپتى.
«قىمباتتى ارلين، مەن سەنى قاتتى قاستەرلەيمىن، جانىم. ساعان مۇنى ەستۋدىڭ قانشالىقتى ۇنايتىنىن بىلەمىن، ءبىراق، مۇنى سەنى قۋانتۋ ءۇشىن عانا جازىپ وتىرعانىم جوق. جازىپ وتىرعان سەبەبىم، بۇدان مەنىڭ كۇللى جان سارايىم جىلۋعا بولەنەدى ەكەن. ساعان حات جازباعانىما كوپ ۋاقىتتىڭ ءجۇزى بولىپتى - شامامەن ەكى جىلداي. دەگەنمەن، مەن سەكىلدى بىربەتكەي پراگماتيكتى كەشىرەتىنىڭدى دە بىلەمىن. ساعان جازۋدىڭ ەش ماعىناسىز ەكەنىن دە ويلانىپ الدىم. ەندى مەن، مەنىڭ قىمباتتى جارىم، بۇرىندارى كوپ كەيىنگە قالدىرىپ كەلگەن، بۇرىندارى سولاي بولعان ءبىر نارسەنى جاساۋىم ءتيىس.
مەن سەنى سۇيە بەرگىم كەلەدى. ءسۇيىپ ءاردايىم قالا بەرگىم كەلەدى. سەنى ءسۇيۋ دەگەندى اقىلمەن ءتۇسىندىرۋ قيىن، ارينە، ءبىراق كوز جۇمعان كۇنىڭنەن باستاپ مەن سەنى قورعاشتاپ، ءالى كۇنگە دەيىن قامقورلىق جاساعىم كەلىپ تۇرادى. سەن مەنى ءسۇيىپ، قول استىنداعى قامقورلىققا العانىڭدى قالايمىن.
سەنىمەن بىرگە ءوز قيىندىقتارىمدى ءبولىسىپ، سەنىمەن بىرگە ورتاق ىستەرمەن شۇعىلدانعىم كەلەدى. ءدال قازىرگى ۋاقىتقا دەيىن بۇل ويلار مەنىڭ باسىما كىرمەپتى. ال ءبىز بولساق بىرگە كوپ نارسەنى تىندىرا الار ەدىك: كيىم تىگۋدى، قىتاي ءتىلىن مەڭگەرۋدى، كينوپروەكتور ساتىپ الۋدى. ال قازىر، مۇنى جاساي الارمىن با؟ جوق.
سەنسىز جاپادان جالعىز قالىپپىن. بارلىق قۇيتىرقى ويىم مەن سوراقى ءىس-ارەكەتىمنىڭ باستى ولشەمى ءوزىڭ بولىپسىڭ... بىلەسىڭ بە، سەن اۋىرعاندا، مەن سەنەن وزىمە كەرەك نارسەنى، ءوزىڭ تارتۋ ەتكىڭ كەلگەن نارسەنى الا المايتىنىمدى ويلاپ، ويعا شومۋشى ەدىم. ۋايىمداۋ قاجەتسىز ەدى. وندا تۇرعان ەشقانداي مۇقتاجدىق جوق بولاتىن. ساعان ۇنەمى جاي عانا بار بولعانىڭ ءۇشىن سۇيەتىنىمدى ايتۋشى ەدىم عوي.
ءدال قازىر دە مەن سونى، سول سوزدەرىمدى ەش ۋاقىتتا تۇسىنبەگەندەي ءتۇيسىندىم. ماعان ەش نارسە بەرە الماسسىڭ، ال مەن سەنى ەش ۋاقىتتا وزگە ايەلدى سۇيە المايتىنداي، سۇيە المايتىنداي قاتتى سۇيەمىن. سولاي بولا بەرۋىن جانە قالايمىن. ويتكەنى، ءتىرى بولماعان كۇننىڭ وزىندە، سەن سول تىرىلەردەن الدەقايدا ارتىقسىڭ.
مەنى اقىماق دەپ ايتارىڭدى، كەرىسىنشە، باقىتتى بولۋىمدى، جولىڭا تۇرماۋىمدى وتىنەتىنىڭدى بىلەمىن. وسى ەكى جىل ىشىندە مەندە ءبىر دە ءبىر ايەل بالاسى بولىپ كورمەپتى (سەنەن باسقا، ارينە، قىمباتتىم)، سەن بۇعان بالكىم تاڭعالاتىن دا شىعارسىڭ. مۇنى جانە مەنى ەش وزگەرتە المايسىڭ جانە مەن دە ولاي جاساي المايمىن. مەن ەش نارسەنى تۇسىنبەيمىن. تۇسىنگىم دە كەلمەيدى. كوپ قىزدى جولىقتىردىم، ىشىندە سۇيكىمدىلەرى دە كەزىكتى، سەبەبى، مەنىڭ دە جالعىز قالا بەرگىم كەلمەيتىن كەزدەر بولاتىن، ءبىراق مەن ءبىر-ەكى كەزدەسۋدەن كەيىن ولاردىڭ ءوزىم ءۇشىن بوس ورىن ەكەنىن ءتۇسىندىم. مەن ءۇشىن تەك سەن بارسىڭ. سەن عانا.
مەنىڭ قىمباتتى ايەلىم، مەن سەنى قاتتى قاستەرلەيمىن. مەن ءوز ايەلىمدى جاقسى كورەمىن. مەنىڭ ايەلىم قازا تاپقان.
ريچ
PS: بۇل حاتتى ساعان جونەلتپەگەنىم ءۇشىن، مەنى كەشىرە گور - مەن سەنىڭ جاڭا مەكەنجايىندى بىلمەيمىن».
massaget.kz
