پاۆلودار وبلىسىندا بيدايدان سۋسىن وندىرەتىن فەرما ىسكە قوسىلدى
جۇگەرى، كۇنباعىس، قىزىلشا، ءسابىز، بيدايدىڭ ءپىسىپ جەتىلگەنىن كۇتۋدىڭ قاجەتى جوق. ءبىر قىزىعى، ەشقانداي تەرمووڭدەۋدەن وتپەگەن ءونىم تۇرلەرى نارىقتا سۇرانىسقا يە. ال بيدايدىڭ جاس وسكىندەرىنەن شىرىن الىنادى.
قىس مەزگىلىندە قيار مەن قىزاناق وسىرەتىن جىلىجايلارعا كوزىمىز ابدەن ۇيرەنگەن. ال بيدايدى شيكىزات تۇرىندە ءوسىرىپ، ودان پايدالى سۋسىن جاساۋ تەحنولوگياسى نارىق ءۇشىن تىڭ جاڭالىق دەۋگە بولادى.
قارلىعاش قاسيەتوۆا:
- بيدايدىڭ جاس وسكىندەرىنەن الىناتىن شىرىننىڭ ادام اعزاسىنا پايداسى زور ەكەن. ونىڭ قۇرامى ءتۇرلى دارۋمەندەرگە، مينەرالدارعا وتە باي. قازاقستاندا العاش رەت وسى باعىتتا جۇمىس ىستەيتىن جاسىل فەرمادا تامشىلاتىپ سۋارۋ ءادىسى قولدانىلادى. بيداي ءدانى تەز كوكتەيدى. يننوۆاتسيالىق تەحنولوگيانىڭ ارقاسىندا توپىراق پەن تىڭايتقىشتار قولدانىلمايدى. تەك سۋ مەن جارىق قاجەتتى مولشەردە بولۋى كەرەك. ءبىر جۇيەكتەن ايىنا 30 كەلى ءونىم جينالادى.
بۇگىندە جاسىل فەرمانىڭ نەگىزگى ءونىمى بيداي ساباعىنان جاسالاتىن «ۆيتگراسس» شىرىنى بولىپ وتىر.
رەنات نايمان، تەحنولوگتىڭ كومەكشىسى:
- بۇل بيدايدى ءوسىرۋ تەحنولوگياسى وتە قيىن دەپ ايتا المايمىن. بيدايدى 7 كۇن وسىرەمىز. ءبىرىنشى 6 ساعات ونى سۋدا ۇستايمىز، جىلى سۋدا. ءبىر تاۋلىك تۇرعاننان كەيىن تامىرى جارىلىپ شىعادى. بۇل تەرمووڭدەۋدەن وتپەگەن شيكى ءونىم. جاسىل جەلەك ءبۇر جارىپ نەمەسە كوكتەپ شىعا باستاعان ساتتەن - اق اس مازىرىنە پايدالانا بەرۋگە بولادى.
بيدايدىڭ وسكىندەرىنەن الىناتىن تابيعي سۋسىن ادامنىڭ كۇش قۋاتىن ارتتىرادى ەكەن.
تاتيانا يۆاكينا، «جاسىل فەرما» جوباسىنىڭ جەتەكشىسى:
- ادامنىڭ ءىش قۇرىلىسىن تازالاۋعا ارنالعان ءونىم. ازعادا جينالىپ قالعان زياندى زاتتاردى شىعارادى. بۋىن، ۇيقى بەزىنىڭ جۇمىسىن جاقسارتادى. جالپى ادامنىڭ يممۋنيتەتىن كوتەرۋ ءۇشىن دە پايدالانۋعا بولادى.
«جاسىل فەرما» جوباسى «اتامەكەن» كاسىپكەرلەر پالاتاسى ارقىلى جۇزەگە اسىپ وتىر. تىڭ باستامانىڭ كەلەشەگى بار. سوندىقتان قارجىلاندىرۋ بويىنشا قيىندىقتار تۋىنداماپتى.
انۋار قالىشبەكوۆ، پاۆلودار اۋدانى «اتامەكەن» كاسىپكەرلەر پالاتاسى فيليالىنىڭ ديرەكتورى:
- شىعىنى از جوبا. ويتكەنى اۋا رايىنا، بەلگىلى ءبىر ماۋسىمعا تاۋەلدى ەمەس. تەك جاڭا تەحنولوگياعا سۇيەنەدى. بۇل جەردە توپىراق قولدانىلمايدى. نەگىزگى ءونىم بيدايمەن قاتار فەرمادا 25 ءتۇرلى وسىمدىك ءتۇرى وسىرىلەدى. ولاردىڭ الدى قالاداعى مەيرامحانالارعا ساتىلا باستاعان. كەلەشەكتە جىلىجاي ونىمدەرى ەل نارىعىنا جول تارتپاق.
www.24.kz
