بيىلعى جىل قازاقستاندىق پاراليمپياداشىلار ءۇشىن تابىستى بولدى
دەگەنمەن، جەتىستىكتەردەن دە قۇر الاقان ەمەسپىز. اسىرەسە، پاراليمپياداشىلاردىڭ ناتيجەلەرى ءبىرشاما كوڭىلگە دەمەۋ بولىپ وتىر. «SPORTINFORM» س ا ا قازاقستاندىق پاراليمپياداشىلار 2018 -جىلدى قالاي وتكىزگەنىن ەسكە الۋدى ۇسىنادى.
پحەنچحان-2018
پحەنچحانداعى قىسقى پاراليمپيادا ويىندارىنا قازاقستان اتىنان التى سپورتشى، سونداي- اق ءبىر سپورتشى- گيد باردى. دەگەنمەن، سپورتشىلاردىڭ شاعىن قۇرامى تاريحي ناتيجەلەرگە جەتۋگە كەدەرگى بولعان جوق. ەڭ الدىمەن، الەكساندر گەرليتس 20 ك م قاشىقتىققا ەركىن ادىسپەن شاڭعى جارىسىندا ءتورتىنشى ورىن الدى. بۇل، قازاقستان ءۇشىن سوڭعى 14 جىلداعى پاراويىندارداعى ەڭ جوعارى ناتيجە. 1994 -جىلى ليۋبوۆ ۆوروبيەۆا پاراليمپيادادا كۇمىس مەدال العالى بەرى، ءبىزدىڭ سپورتشىلار ول ناتيجەنىڭ ماڭايىنا جولاي الماپ ەدى.
ءبىراق گەرليتستىڭ ناتيجەسىنەن كەيىن اراعا ەكى كۇن سالىپ 45 جاستاعى الەكساندر كوليادين 1,5 ك م قاشىقتىققا كلاسسيكالىق ادىسپەن شاڭعى جارىسىندا قازاقستان تاريحىنداعى تۇڭعىش پاراليمپيادا «التىنىن» جەڭىپ الدى. وسى ناتيجە جالپىكوماندالىق ەسەپتە 20-ورىنعا كوتەرىلۋگە، ال جۇلدەگەرلەرگە الەمدەگى ەڭ جوعارى سىياقى الۋ مۇمكىندىگىن بەردى. ەسكە سالا كەتەيىك، «التىنعا» بىزدە 250000 دوللار، ال ءتورتىنشى ورىن ءۇشىن 30000 دوللار بەرىلەدى. الەمنىڭ باسقا بىردە- ءبىر مەملەكەتى مۇنداي سىياقى تولەمەيدى.
جاكارتا-2018
پاراليمپياداشىلاردىڭ جەڭىستى جولى يندونەزيادا وتكەن پاراازيادا ويىندارىندا دا جالعاستى. ازيادا-2018 قازاقستان سپورتى تاريحىندا ەڭ ناشار دودا بولعانىن ايتا كەتەيىك. ونىڭ قورىتىندىلارى بويىنشا، وتاندىق سپورتشىلار العاش رەت قۇرلىقتا ۇزدىك بەستىككە كىرە الماي، توعىزىنشى ورىندى قاناعات تۇتتى.
ال پاراليمپياداشىلار، كەرىسىنشە، تاعى ءبىر رەكوردقا قول جەتكىزدى. سپورتتىڭ توعىز ءتۇرى بويىنشا سىنعا تۇسكەن ولار 33 مەدال جەڭىپ الدى. بۇل قازاقستاندىق سپورتشىلاردىڭ قۇرلىقتىق ويىندارداعى ەڭ جاقسى ناتيجەسى. بۇعان دەيىن 2014 -جىلى 24 مەدالمەن شەكتەلگەن ەدىك.
بۇدان تىس، سپورتتىڭ ءتورت تۇرىنەن العاش رەت ۇزدىك ۇشتىككە ىلىندىك. قولا مەدال جەڭىپ العان قازاقستاننىڭ پاراليمپيادالىق ۆولەيبول قۇراماسى كوماندالىق سپورت تۇرلەرى تاريحىندا العاش رەت مەدالعا قول جەتكىزدى.
وسى ناتيجەلەر وزدىگىنەن كەلمەگەنىن ايتا كەتكەن ءجون.
