استانانى ۆاشينگتون سياقتى سالعىم كەلىپ ەدى - مەملەكەت باسشىسى
بۇل تۋرالى وتاندىق ب ا ق وكىلدەرىنە سۇحبات بەرگەن ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
كەزدەسۋ بارىسىندا «ەگەمەن قازاقستان» گازەتىنىڭ باسقارما ءتوراعاسى دارحان قىدىرالى ەلباسىدان: «ءوزىڭىز اتاپ وتكەندەي، بيىلعى جىلدىڭ ەڭ باستى ايشىقتى وقيعاسى استانامىزدىڭ 20 جىلدىعىن جۇرت بولىپ جۇمىلىپ، اتاپ وتتىك. ەلىمىزدىڭ ەلورداسىنىڭ الار اسۋى ءالى الدا دەپ ەسەپتەيمىز. ەل ەڭسەسىن تىكتەگەن ەلوردامىزدىڭ دامۋ بارىسىندا، ءسىزدىڭ پىكىرىڭىزشە، قانداي ەرەكشەلىكتەردى ايرىقشا اتاپ وتەر ەدىڭىز؟»، - دەپ سۇرادى.
«مۇنىڭ ەڭ تەرەڭ استارىن تۇسىنەتىن ۋاقىت كەلدى. ەڭ باسىندا ءبىز مۇنى ايتا المادىق، جاعداي ءارتۇرلى بولدى. ەلدىڭ ىشىندە جۇرتىمىزدىڭ ءوزى ءبىرىڭعاي ەمەس ەدى. سول كەزدەگى دەپۋتاتتاردىڭ اراسىندا ءبىزدىڭ ۇلتتىڭ سانى ازداۋ بولدى. ءبىر جاعىنان سونىڭ ءبارىن ەسكەرىپ، ەكىنشى جاعىنان قيىن-قىستاۋ جاعدايدا ەلگە جاڭا جول سىلتەۋ ءۇشىن وسىنداي جاڭالىق كەرەك بولدى. ارينە، مەن باستاعان كەز وتە قيىن ەدى»، - دەپ ەسكە الدى مەملەكەت باسشىسى.
ەلباسى ەلوردامىزدى كوشىرەر الدىندا وزگە مەملەكەتتەردىڭ استانانى اۋىستىرۋ تاريحىنا ءجىتى نازار اۋدارعانىن باسا ايتتى.
«قازاقستاننىڭ ءدال كىندىك ورتاسى - جەزقازعان. جەزقازعاندى وزدەرىڭىز دە بىلەسىزدەر، باسىندا ول جەرگە دە، ۇلىتاۋعا دا باردىم. ەش نارسە جوق. جول دا، تەمىر جول دا، ەنەرگەتيكا دا، ەشتەڭە دە جوق. قاراعاندىنى دا قارادىم. 20 جىلداي تەمىرتاۋدا جۇمىس ىستەدىم، جاقسى بىلەمىن. كومىردىڭ ورتاسىنا، ەكولوگياسى قيىن جەرگە اپارۋ قيسىنسىز. سۋى دا جوق. كوكشەتاۋعا بارساق، شەتكە شىعىپ كەتەمىز. اقتوبەگە بارساق باتىسقا كەتىپ قالامىز. سوندىقتان ويلانا كەلە 4 جولدىڭ تورابى رەتىندە اقمولانى تاڭدادىق. دەگەنمەن، بولارى بولدى، استانا قۇرىلدى. قازىر دالادا 20 گرادۋس اياز بولىپ تۇر عوي. ونىڭ ەشقانداي جامانشىلىعى جوق. ءبىر جەردە ىستىق، ءبىر جەردە سۋىق. ءوزىمىزدىڭ ەلىمىز، جەرىمىز. قازاقستاننىڭ ءتورى، سارىارقانىڭ ورتاسى، اتا-بابامىزدىڭ تابانى تيگەن، قونىستانىپ، مالىن ورىستەتكەن جەرى»، - دەدى ق ر پرەزيدەنتى.
نۇرسۇلتان نازاربايەۆ ەل استاناسىن سارىارقا تورىنە اۋىستىرۋدىڭ پايداسى وراسان بولعاندىعىن باسا ايتتى.
«حالىق كوپ قونىستانعان وڭتۇستىكتەن سولتۇستىككە قاراي كوشى-قون كۇشەيدى. بۇل جاقتا جەر دە، جۇمىس تا بار. ال ول جاقتا جەر دە، جۇمىس تا جوق. قازىر دە كوشىپ جاتىر. قازىر تۇركىستان وبلىس ورتالىعى بولعاننان كەيىن استانانىڭ تۇرعىندارى «ەندى شىمكەنتتىكتەر تۇركىستانعا باراتىن بولدى عوي» دەپ قالجىڭدايتىن كورىنەدى»، - دەدى ەلباسى.
ق ر پرەزيدەنتىنىڭ دەرەگىنشە، بۇگىندە استانا تۇرعىندارىنىڭ سانى 1,2 ميلليوندى قۇرايدى. ال 2030-جىلعا قاراي 2 ميلليون ادامعا جەتۋى ىقتيمال.
«جالپى مەن ۆاشينگتون سياقتى 5-8 قاباتتى ۇيلەرى بار، تەك شەنەۋنىكتەر عانا تۇراتىن قالا بولسا دەپ ويلاپ ەدىم. مىنا كەڭ دالادا بيىگىرەك ءۇي بولماسا، ەشتەڭە كورىنبەي قالادى. سوندىقتان، ساۋلەتشىلەر بوي بەرمەي، كوتەرەيىك دەپ سالدى. قازىر 230 مەترلىك «ءابۋ دابي» سالىنىپ جاتىر. ول پوستكەڭەستىك كەڭىستىكتەگى ەڭ بيىك عيمارات بولماق»، - دەدى مەملەكەت باسشىسى.
