سوڭىنا دەيىن سەنبەپ ەدىك - ارىستانبەك مۇحامەدي ۇلى سامال ەسلياموۆانىڭ جەڭىسى جايلى
«كانن فەستيۆالىننەن سامال ەسلياموۆانىڭ باستى جۇلدەنى جەڭىپ الۋى وسى جىلدىڭ ايتۋلى جەتىستىكتەرىنىڭ ءبىرى بولدى. ءتىپتى مىناداي جاعداي بولدى - جۇما كۇنى ەدى، ال ءبىز مۇنداي ءىرى جەتىستىكتى مەملەكەت باسشىسىنا بىردەن جەتكىزۋىمىز كەرەك بولاتىن. البەتتە، مەملەكەت باسشىسى قۋانا- قۋانا يەگەردى قۇتتىقتايدى. ءبىراق، كۇتتىك. تەك كەلەسى اپتانىڭ سەيسەنبىسىندە عانا پرەزيدەنت اكىمشىلىگىنە سامال ەسلياموۆانىڭ كانن فەستيۆالىندە باستى جۇلدەنى العانى تۋرالى اقپاراتتى جەتكىزدىك. باسشىلىقتىڭ ءبارى دە نەلىكتەن ارادا 5 كۇن وتكەننەن كەيىن اقپاراتتى بەرىپ جاتىرسىزدار دەپ ايتىپ جاتتى. شىنىن ايتايىن، ءوزىم سەنبەپ ەدىم. جۇما، سەنبى، جەكسەنبى - ەۋرونيۋستى، بارلىق ارنالاردى كورىپ وتىرمىز. ءبىر ويىم - بالكىم، ول كورەرمەندەردىڭ كوزايىمى اتانعان شىعار، بالكىم تورەشىلەردىڭ سىيلىعىنا يە بولدى ما دەدىم. سەبەبى، ءبىزدىڭ اكتريسانىڭ باستى جۇلدەنى الۋىنا سەنبەپ ەدىم. ءتىپتى بۇكىل مينيسترلىك بولىپ جاڭالىقتى باقىلاپ وتىردىق» ، - دەدى مينيستر ۇكىمەتتىڭ باسپا ءسوز ورتالىعىندا وتكەن بريفينگ بارىسىندا.
ارىستانبەك مۇحامەدي ۇلىنىڭ ايتۋىنا قاراعاندا، جۇما كۇنى ۆەدومستۆو كانن فەستيۆالىنىڭ ۇيىمداستىرۋشىلارىنا ساۋال حات جولداعان. ول حاتقا اقپاراتتى رەسمي سايتتان كورۋگە بولاتىنى تۋرالى جاۋاپ كەلگەن.
«تەك سەيسەنبىدە تولىق سەنىمدى بولعان كەزدە عانا اقپاراتتى جولدادىق. بۇل وتە جوعارى جەتىستىك. پوستكەڭەستىك ەلدەردىڭ ىشىندە كانن فەستيۆالىنىڭ مۇنداي جۇلدەسىن بىردە- ءبىر اكتەر العان ەمەس. ول جۇلدەنى كەرەك دەسەڭىز جاسقانباي ونەر سالاسىنداعى نوبەل سىيلىعىنا تەڭەۋگە بولادى. نوبەل سىيلىعىن ادەبيەت ءۇشىن بەرەتىنىن ەسكەرسەك، ونەر سالاسىنداعى ەڭ جوعارعى جەتىستىك كانن فەستيۆالىنىڭ جۇلدەسى» ، - دەدى ارىستانبەك مۇحامەدي ۇلى.
مينيستر 2019 -جىلدىڭ 6 - قاڭتارىندا سامال ەسلياموۆا مەن رەجيسسەر سەرگەي دۆورتسيەۆوي لوس- انجەلەسكە ۇشاتىنىن حابارلادى.
ايتا كەتسەك، جاقىندا «ايكا» فيلمى امەريكالىق «وسكار» كينوسىيلىعىنىڭ شورت- پاراعىنا ەنگەن بولاتىن.
البەتتە، مينيستر اتاپ وتكەندەي، بيىلعى جىل قازاق اكتريساسى سامال ەسلياموۆانىڭ كانن فەستيۆالىن باعىندىرۋىمەن ەستە قالارى انىق.
سامال 71 - كانن كينوفەستيۆالىندە ءوز اتالىمى بويىنشا ۇزدىك دەپ تانىلعان بولاتىن. اكتريسا رەسەيلىك رەجيسسەر سەرگەي دۆورتسيەۆويدىڭ «ايكا» اتتى كارتيناسىندا باستى ءرولدى سومداعان.
