اقبوتا نۇر تۇسكەن «جالعىز جاۋقازىن» سەريالى كورەرمەنگە جول تارتادى
«جالعىز جاۋقازىن» دەپ اتالاتىن كارتينادا باستى ءرولدى اقبوتا نۇر جانە داۋرەن ايدارقۇلوۆ سومدايدى. تەلەحيكايا كورىنىستەرى نەگىزىنەن الماتى مەن الماتى وبلىسىندا تۇسىرىلگەن.
وقيعا جەلىسى داۋلەتتى وتباسىنىڭ جالعىز قىزى ايسۇلۋدىڭ تاعدىرى ارقىلى ءوربيدى. ايسۇلۋ تۇرمىسقا شىعايىن دەپ جاتقاندا اتا- اناسىنىڭ قازاسىنا سۇيگەن جىگىتى ارسەننىڭ كىنالى ەكەندىگىن بىلەدى. ارسەننىڭ كوزدەگەن باستى ماقساتى - بايلىق ەكەنىن كەش ۇققان جەتىم قىز تابان استى نە ىستەرىن بىلمەي، ا ح ا ج بولىمىنەن قاشىپ شىعىپ، باس ساۋعالاپ، ناعاشى اجەسى تۇراتىن اۋىلعا كەتەدى. بۇدان ءارى ونىڭ ومىرىندەگى قيلى كەزەڭدەر مەن بۇرالاڭ ساتتەر الما- كەزەك اۋىسىپ وتىرادى.
«فيلمنىڭ «جالعىز جاۋقازىن» دەپ اتالۋى بەكەر ەمەس. بۇل بۇكىل تۋىستان، دۇنيەدەن ايرىلىپ، جالقىز قالعان قىزدىڭ تاعدىرىن سۋرەتتەيتىن تۋىندى. ول اۋىلعا بارىپ، فيلمنىڭ سوڭىندا جەڭىسكە جەتەدى مە جەتپەيدى مە دەگەن ماسەلە ءسوز بولادى» - دەيدى كارتينا پروديۋسەرى اقىلبەك دوسجانوۆ.
«تەلەسەريالداعى باستى كەيىپكەر ايسۇلۋدىڭ ءرولىن سومداپ، بولمىسىن اشۋ ءۇشىن ۇلكەن جۇرەك كەرەك»، - دەيدى رەجيسسەر. سوندىقتان وسى كەيىپكەردى وينايتىن اكتريسانى تابۋ دا وڭاي بولماعان.
«بۇل سەريالعا دايىندىق ءۇش اي ءجۇردى. ويتكەنى باستى كەيىپكەر ايسۇلۋدى تابۋ ءۇشىن وتە ۇزاق ۋاقىت كەتتى. كوپتەگەن قىزدار ىرىكتەۋگە قاتىستى» - دەيدى رەجيسسەر تورەبەك بەيسەبايەۆ.
شىعارماشىلىق ۇجىمنىڭ شەشىمىمەن بۇل ءرول بەلگىلى ءانشى ءارى اكتريسا اقبوتا نۇرعا بۇيىرىپتى. كورەرمەن اكتريسانى «گلامۋر دليا دۋر»، «توي ليۋبوي سەنوي» فيلمدەرىنەن جاقسى تانيدى.
«وسى ۋاقىتقا دەيىن مەن مەلودراماعا تۇسكەن ەمەسپىن. بۇل سەريال مەن ءۇشىن ۇلكەن تاجىريبە بولۋدا. مەن ومىردە قالجىڭباس، ءازىلقوي، كۇلىپ جۇرەتىن اداممىن، ال بۇل سەريالدا مۇڭلى، ىشىندە قايعىسى بار ادامدى وينايمىن» - دەيدى اقبوتا نۇر.
سەريالداعى قاتىگەز ارسەننىڭ ءرولىن جاس اكتەر اقبەرەن جۇمابايەۆ وينايدى. اقبەرەننىڭ ايتۋىنشا ومىردە ول وتە مەيىرىمدى ادامداردىڭ ءبىرى. الايدا كينودا ۇنەمى جاعىمسىز كەيىپكەرلەردى سومدايدى ەكەن.
«بۇل - وتە ءبىر سۇمىرايدىڭ ءرولى. ارسەن ادام ولتىرگىش، قاتىگەز جان. بۇل ءرول ماعان جاقىن دەپ ايتا المايمىن، ءبىراق جات دەپ تە ايتۋعا كەلمەيدى. ويتكەنى مەن جاعىمسىز كەيىپكەرلەردى سومداپ كەلە جاتىرمىن. نەگە ەكەنىن بىلمەيمىن، قانشا جاعىمدى ءرول ويناعىم كەلسە دە، رەجيسسەردىڭ كوزقاراسى سونداي ما الدە ماعان سونداي ءرول تۇسەدى مە، بارلىعى مەنەن جاعىمسىز كەيىپكەردى كورەدى. سوندىقتان امال جوق، جاعىمسىز كەيىپكەردى سومداپ كەلە جاتىرمىن»، - دەيدى اكتەر.
سونىمەن قاتار اكتەردىڭ ايتۋىنشا بۇل تاربيەلىك ءمانى بار دۇنيە بولادى. «بۇل جوبادا سسەناريستەردىڭ ويى - سەنگىش، اڭقاۋ، ومىردە كىرشىكسىز تازا ادامدار مەن پاسىق، قولىنان قاتىگەزدىك كەلەتىن ادامداردى اجىراتا كورسەتۋ. بۇل سەريالدىڭ تاربيەلىك ءمانى بار دەپ ويلايمىن. كورەرمەننىڭ كوڭىلىن كوتەرىپ، رەيتينگ جيناۋ ءۇشىن جاسالعان دۇنيە ەمەس. حالىققا وي سالاتىن شىعارما بولادى دەپ ويلايمىن» - دەيدى اكتەر اقبەرگەن جۇمابايەۆ.
تاعى تۋىندىدان سەرىكباي احمەت ۇلى، باقىتجان الپەيىسوۆ، داۋرەن ايدارقۇلوۆ، ساكەن راقىشيەۆ، اقزەر سەگىزبايەۆا جانە ت. ب. كورەسىزدەر.
