رينات زايىتوۆ: ديماش قازاقتى الەمگە تانىتىپ جۇرگەن جوق، ول قىتاي ساياساتىنىڭ قۇربانى
اقىن ديماشتى قىتاي ساياساتىنىڭ قۇربانى دەيدى.
«تالانت پەن ۇلتقا قىزمەت ەتەتىن ادامدى اجىراتا ءبىلۋ كەرەك. ەكەۋى مۇلدە ەكى بولەك. مەن ديماشتى «سەندەي انشىلەردەن قورقامىن» دەپ سىناعاندا ءبىزدىڭ جاستاردىڭ ونىڭ سوڭىنان ەرەتىنىن ءبىلدىم. ال ديماشتىڭ قازىرگى وبرازىن كىم قالىپتاستىردى؟ قاي ۇلت قالىپتاستىردى؟ قىتاي قالىپتاستىردى ما؟ ولار ءبىزدىڭ بالانى بىزگە قارسى پايدالانىپ جاتىر. مەن وسىلاي بولاتىنىن بىلگەنمىن. ول بولعان پراكتيكا. ءبىراق ديماش قازاقستاندا جۇرگەن كەزىندە، مىسالعا «ساز الەمىندە» جۇرگەندە ءبىر ادام ونى قولىنان جەتەكتەپ، سول جەرگە بارسىن دەپ سۇيرەدى مە؟ جوق، جارق ەتىپ شىققان كەزدە ءبىز ماقتانۋعا ءمازبىز. ءبىزدىڭ بالا، ءبىزدىڭ بالا دەيمىز. ەگەر ءبىزدىڭ مينيسترلىكتىڭ باسى ىستەيتىن بولسا ونى «سلاۆيان بازارىنان» كەيىن قازاقستاننىڭ وپەرالىق پاسپورتى رەتىندە پايدالانىپ، كەرىسىنشە قويۋى كەرەك ەدى. ديماش قۇدايبەرگەنوۆ قازىرگى ۋاقىتتا تازا قىتاي ساياساتىنىڭ قۇربانى» - دەيدى اقىن.
سونداي-اق قازاقتىڭ اتىن الەمگە تانىتىپ جۇرگەن تالانتتار تۋرالى دا ويىن بىلدىرگەن.
«قازاقتى دۇنيە جۇزىنە تانىتىپ جۇرگەن ەرلان رىسقالي، قانات يسلام، قازاقتىڭ شاپانىن برەندكە اينالدىرعان گەننادي گولوۆكين. ديماشتى بۇل قاتارعا قاي جاعدايدا قوسامىز؟ ەگەر ديماش ءبىر كونسەرتىندە شىعىپ، ميكروفونىن جەرگە تاستاي سالىپ، «مەنىڭ ۇلتىمدى وسى مەملەكەت قورلاپ جاتقاندا مەن بۇل جەردە ءان ايتپايمىن» دەگەن ەرلىك جاسايتىن بولسا ءبىز سول كەزدە ديماشقا ەسكەرتكىش قويساق تا ارتىق ەمەس» - دەيدى رينات زايىتوۆ.
