رەسەي دىبىستان دا ۇشقىر جاڭا زىمىران كەشەنى سىناقتان ءساتتى وتكەنىن مالىمدەدى
كرەملدىڭ باسپا ءسوز قىزمەتى زىمىران ورىنبور وبلىسىنان ۇشىرىلىپ، كامچاتكا ولكەسىندەگى شارتتى نىساندى اتىپ تۇسىرگەنىن حابارلادى.
ۆلاديمير پۋتين وتكەن اپتادا قورعانىس مينيسترلىگىنىڭ قورىتىندى جيىنىندا سويلەپ، رەسەيدىڭ جاڭا يادرولىق زىمىراندارى «سوعىسقۇمار جانە باسقىنشىلىق سارىنداعى لەپىرمە سوزگە ۇيىرلەردى ويلانتاتىنىن» ايتقان. پۋتين ول كەزدە «سارمات» قۇرلىقارالىق بالليستيكالىق زىمىرانى سىناقتان ءساتتى وتكەنىن، ال دىبىستان دا ۇشقىر جاڭا «اۆانگارد» زىمىران كەشەنى ەندىگى تۇراقتى شىعارىلىپ جاتقانىن مالىمدەگەن.
قازان ايىندا سوچيدە وتكەن فورۋمدا پۋتين رەسەيدىڭ جاڭا قارۋ- جاراقتارى بارىن، سوندىقتان وزگە ەلدەرمەن سوعىسۋدان قورىقپايتىنىن مالىمدەگەن. پرەزيدەنتتىڭ سوزىنشە، رەسەي ءوزى ءبىرىنشى بولىپ يادرولىق قارۋ قولدانبايدى، ءبىراق جاۋاپ رەتىندە يادرولىق سوققى جاساۋعا دايىن. «ءبىز ازاپ شەگۋشى رەتىندە جۇماققا بارامىز. ال ولار ارام قاتادى. سەبەبى ولار تاۋبەسىنە كەلىپ ۇلگەرمەيدى» دەگەن پۋتين.
ا ق ش ەسەپ پالاتاسىنىڭ 25 - جەلتوقساندا جاريالاعان ەسەبىندە ا ق ش- تا قازىر رەسەي مەن قىتاي دايىنداپ جاتقان دىبىستان دا ۇشقىر قارۋعا قارسى تۇراتىن قورعانىس جۇيەسى جوعى ايتىلعان. الايدا، باياندامادا رەسەيدە مۇنداي قارۋدىڭ قولدانىسقا ەنگىزىلگەنى تۋرالى مالىمەت جوق.
www.azattyq.org
