استانادا ايازدى كۇندەرى «تەگىن تاكسي» جۇمىس ىستەيدى
«نۇر- استانا» مەشىتىنىڭ باستاماسىمەن ايالدامالاردا قوعامدىق كولىكتەردى كۇتىپ قالعان قالا تۇرعىندارى ءتيىستى مەكەن- جايلارىنا تەگىن جەتكىزۋ ناۋقانى جۇزەگە اسىرىلۋدا. مەشىتتىڭ ۇستازى يلياس وتاروۆتىڭ ايتۋىنشا، اكسياعا قاتىساتىن اۆتوكولىكتەر ارنايى لوگوتيپپەن بەلگىلەنەدى.
«ءبىزدىڭ ناۋقانىمىزدىڭ باستى ماقساتى - ايازدى كۇندەردە كومەككە مۇقتاج ادامداردى قولداۋ. «نۇر استانا» مەشىتىنىڭ تۇراعىندا اكسياعا قاتىسۋعا نيەت بىلدىرگەن كولىك يەلەرىنە تۇرعىنداردى جەتكىزۋ ەرەجەلەرى جازىلعان بروشيۋرالاردى تاراتىپ، ولاردى تۇسىندىرەمىز. «استانا - مەيىرىمدى قالا» لوگوتيپىن جاپسىرامىز. بۇل اۆتوكولىكتەردى تۇرعىندار بىردەن بايقايتىن بولادى. كومەك قولىن سوزۋعا دايار جۇرگىزۋشىلەر سانى كۇن سايىن ارتاتىنىنا سەنىمدىمىن»، - دەيدى يلياس وتاروۆ.
«استانا - مەيىرىمدى قالا» جوباسى اياسىندا «نۇر استانا» مەشىتىنىڭ قىزمەتكەرلەرى الداعى كۇندەرى حالىقتىڭ الەۋمەتتىك وسال توپتارىنا جاتاتىن وتباسىلارعا كومىر جەتكىزۋ شارالارىن قولعا الادى دەپ كۇتىلۋدە.
ەسكە سالايىق، بۇگىن قازاقستان مۇسىلماندارى ءدىني باسقارماسى ءتوراعاسىنىڭ ءبىرىنشى ورىنباسارى، نايب ءمۇفتي ناۋرىزباي قاجى تاعان ۇلىنىڭ باستاماسىمەن «حازىرەت سۇلتان» رەسپۋبليكالىق مەشىتى «استانا - مەيىرىمدى قالا» جوباسى جۇزەگە اسىرىلا باستادى.
اكسيا اياسىندا كوشەلەردە جۇمىس ىستەپ جۇرگەن استانا قالاسىنىڭ كوممۋنالدىق قىزمەتتەرىنىڭ جۇمىسشىلارىنا ىستىق تاعامدار مەن شاي تاراتىلدى. رەسپۋبليكالىق مەشىتتىڭ مالىمەتى بويىنشا، «استانا - مەيىرىمدى قالا» جوباسى قىس بويى وتكىزىلەتىن بولادى. الداعى ۋاقىتتا وعان ەلوردانىڭ بارلىق مەشىتتەرى قوسىلادى.
ايتا كەتەيىك، استانادا ايازدى اۋا رايىنىڭ تۇراقتانعانىنا بىرنەشە كۇن بولدى. اۋا تەمپەراتۋراسى 40 - گرادۋسقا دەيىن تومەندەدى. مەكتەپتەر مەن كوللەدجدەردەگى ساباقتار دا وسى سەبەپتەرگە بايلانىستى ۋاقىتشا وتكىزىلمەيتىن بولدى.
