تۇركىستان وبلىسى تاريحي فيلم تۇسىرۋدەن كوش باستاپ تۇر
اعىمداعى جىلدىڭ 19 - قاراشاسىندا «كيەلى تۇركىستان جانە تۇركى دۇنيەسىنىڭ رۋحاني جاڭعىرۋى» اتتى عىلىمي- تەوريالىق حالىقارالىق كونفەرەنتسيا وتكىزىلدى، دەپ حابارلايدى قازاقپارات ءتىلشىسى.
وبلىستىق اكىمدىك باسپا ءسوز قىزمەتىنىڭ مالىمەتىنشە، يۋنەسكو- نىڭ «ۇلى جىبەك جولى ەسكەرتكىشتەرى» اتالىمى بويىنشا الەمدىك مادەني مۇرالار تىزىمىنە ەنگەن ورتاعاسىرلىق 8 ەسكەرتكىش (ساۋران قالاشىعى، تۇركىستان، سيداق، قاراسپان، جۋانتوبە، كۇلتوبە، وتىرار و ا ز يسىنىڭ ەسكەرتكىشتەرى، ءبورجار قورعانى) تۋرالى العاش رەت دەرەكتى فيلم ءتۇسىرىلدى. تاريحي- مادەني مۇرالارىمىزدى ناسيحاتتاپ، جاستارعا پاتريوتتىق تاربيە بەرۋ ماقساتىندا تۇسىرىلگەن «كونە جەتىگەننىڭ سىرى» اتتى 10 سەريالى تەلەحيكايا رەسپۋبليكا كورەرمەندەرىنە ۇسىنىلدى. «كيەلى قازىعۇرت» ، «وتىراردى قورعاۋ» اتتى تاريحي- انيماتسيالىق فيلمدەر رەسپۋبليكالىق جانە جەرگىلىكتى تەلەارنالاردان كورسەتىلگەن.
ودان بولەك، تۇركىستان وبلىسى مەن قازاقستاننىڭ كيەلى جەرلەرى كارتاسىنا ەنگەن نىساندار تۋرالى اعىلشىن، قىتاي، قازاق جانە ورىس تىلدەرىندە ارنايى روليكتەر جانە «Ontustik TourAudio» موبيلدى قوسىمشاسى ازىرلەنگەن. تۋريستەر ءجيى باراتىن 35 تۋريستىك نىساندا جانە 100 مونۋمەنتتىك ونەر ەسكەرتكىشتەرىنە QR كودتار ورناتىلعان.
سونىمەن قاتار، ۆيرتۋالدى 3 بەينەروليك ازىرلەنىپ، VR قۇرال جابدىعى ارقىلى 360 گرادۋستا كيەلى ورىندى تامشالاۋعا مۇمكىندىك جاسالعان. وبلىستاعى قاسيەتتى، كيەلى ورىندار مەن تۋريستىك ماڭىزى بار ەسكەرتكىشتەرگە 21 باعىتتا تۋريستىك مارشرۋتتار اشىلعان. بۇل - ءتۋريزمدى دامىتۋعا سەرپىن بەرەتىن جۇمىستار بولىپ وتىر.
بۇدان بولەك، وڭىردە «رۋحاني جاڭعىرۋ» باعدارلاماسى شەڭبەرىندە ناقتى جۇمىستار اتقارىلعان. سونىڭ ىشىندە «رۋحاني جاڭعىرۋ» باعدارلاماسىنىڭ «قازاقستاننىڭ كيەلى جەرلەر گەوگرافياسى» ارنايى جوباسى بويىنشا تۇركىستان وبلىسىنان 24 نىسان رەسپۋبليكالىق، 60 تاريحي- مادەني ەسكەرتكىش وبلىستىق تىزىمگە ەنگىزىلگەن.
سونداي- اق، وڭىردە كيەلى ورىنداردى رەتكە كەلتىرۋ مەن دامىتۋ ءۇشىن اعىمداعى جىلى وبلىس بيۋدجەتىنەن 686 ميلليون تەڭگە قارجى ءبولىندى. دەمەۋشىلەر تاراپىنان قۇنى 208,4 ميلليون تەڭگەنىڭ جۇمىستارى اتقارىلعان. اتاپ ايتقاندا، قوجا احمەت ياساۋي كەسەنەسى اۋماعىن جانە كۇلتوبە قالاشىعىن قالپىنا كەلتىرۋ، ۋكاشا اتا كەسەنەسىنە باراتىن اۆتوكولىك جولى، اۆتوتۇراق جانە ورىندىقتار ورناتۋ، اپپاق يشان مەشىتىنىڭ شاتىرىنا كۇردەلى جوندەۋ جۇمىستارى جۇزەگە اسىرىلۋدا. سونىمەن قاتار، وتىرار قالاشىعىنىڭ قاقپاسىن قايتا قۇرۋ، ىرگەلەس اۋماعىن اباتتاندىرۋ، كوگالداندىرۋ جوباسىنا وبلىستىق بيۋدجەتتەن 28,8 ميلليون تەڭگە ءبولىنىپ، قۇرىلىس جۇمىستارى باستالعان.
