قازاقستان جازۋشىلار وداعىنىڭ ءتوراعاسى ازىلكەش تۇرسىنبەك قاباتوۆتى قاتاڭ سىنعا الدى
اقىنعا ازىلكەشتىڭ ساحناداعى سويلەۋ مانەرى مەن شۇلدىرلەگەن ءتىلى ۇناماي قالعان. بۇل ويىن Facebook جەلىسىندەگى پاراقشاسىندا جەتكىزگەن. ۇلىقبەك ەسداۋلەت جازباسىن «قازاقستان» تەلەارناسىنىڭ باسشىسى ەرلان تىنىمباي ۇلىنا قاراتا جازعان.
«ءتىلىمىزدى بوتەن سوزبەن بىلعاۋىن توقتاتسىن. شۇلدىرلەمەي، قويىرتپاقتاماي سويلەسىن. ۇلتتىق ارنانى اركىمنىڭ ويلانباي سويلەپ، جۇرتتى كۇلدىرگەننىڭ ءجونى وسى ەكەن دەپ، وزگە ءتىلدى وڭدى-سولدى بەزەي بەرەتىن، قازاقشانى بەلدەن باسىپ، ويىنا كەلگەندى ايتا بەرەتىن ورىنعا اينالدىرۋعا بولمايدى. ءتىلدىڭ قاسيەتى مەن ساحنانىڭ كيەسى بار ەكەنىن ەستەن شىعارماسىن. ەفيرگە شىعادى ەكەن - انا ءتىلىمىزدى قۇرمەتتەۋى كەرەك! ءتىپتى ەسترادانىڭ ەڭىرەگەن جۇلدىزى بولسا دا! ءتىلى ەندى شىققانداردى قويىپ، مەكتەپ جاسىنداعى ۇرپاقتاردان ۇيات! ءتىل تازالىعىنا ءار ونەر ادامى جاۋاپتى. ەگەر ونىڭ ءازىل-قالجىڭىنسىز ۇلتتىق ارنا كۇن كورە المايتىن بولسا، جاتتايتىن ءماتىنىن تازا قازاق تىلىنە كوشىرىپ بەرەتىن ساۋاتتى رەداكتور بولگەندەرىڭ دۇرىس. جاقىندا تۇرسىنبەك ءىنىمىز كوشەدەگى جارنامالاردىڭ ءتىلى مەن اۋدارماسىن ولتىرە سىنادى. ايىزىم قانىپ، ريزا بولىپ كوردىم! تاقىرىبىن تاپقان ەكەن دەپ قۋاندىم. ەندى كوشەمەن قاتار ءوزىنىڭ ءتىلىن دە تۇزەگەنى ءجون بولار ەدى» - دەيدى اقىن.
دەرەككوز: Reactor
