پۋتين مەن لۋكاشەنكو نەگە كەلىسە المادى؟
كەيىنىرەك ەكى ەل باسشىلارىنىڭ جاڭا جىل الدىندا «شەگەرۋگە بولمايتىن» ماسەلە بويىنشا تاعى كەزدەسەتىنى بەلگىلى بولدى. ساراپشىلار «ەكى ەل پرەزيدەنتى قانداي ماسەلەدە كەلىسە المادى؟» دەگەن سۇراققا جاۋاپ ىزدەيدى.
ەكى ەل پرەزيدەنتىنىڭ كەزدەسۋىنەن كەيىن باسپا ءسوز كونفەرەنسياسى بولماعان. جۋرناليستەر كەلىسسوز باستالعان كەزدە عانا قاتىسقان. سوندىقتان كەلىسسوز بارىسى جايلى تولىق اقپارات جوق.
ۆلاديمير پۋتين جۋرناليستەر كوزىنشە «ەكى ەل اراسىنداعى قارىم- قاتىناس جاقسى دامىپ جاتىر» دەپ ايتقانمەن كەلىسە الماعان ماسەلەلەر بارىن دا مويىنداعان: «ەگەر كەلىسسەك، ءتىپتى جاقسى» دەگەن. ال لۋكاشەنكو «ماسەلەلەردى جاڭا جىلعا قالدىرمايىق» دەپ ۇسىنىس جاساعان.
كەلىسسوزگە قاتىستى ازىرگە رەسەيدىڭ قارجى ءمينيسترى انتون سيلۋانوۆ رەسمي تۇسىنىكتەمە بەردى. ونىڭ ايتۋىنشا، 2020 -جىلعا قاراي ەكى تاراپ گاز باعاسىن قالىپتاستىرۋ مەحانيزمىنە قاتىستى «ۇسىنىستار ازىرلەۋى» ءتيىس. بۇعان قوسا، ەكى جاق «ينتەگراتسيا جانە داۋلى ماسەلەلەر بويىنشا ۇسىنىستاردى دايىندايتىن جۇمىس توبىن قۇرۋعا» كەلىسكەن. سيلۋانوۆتىڭ سوزىنشە، كەلىسسوز بارىسىندا ەكى تاراپ پوزيتسياسىنىڭ جاقىنداۋى بايقالعان.
ساراپشىلار سوڭعى ۋاقىتتا شيكىزات باعاسىنا بايلانىستى ەكى ەل اراسىنداعى قارىم- قاتىناس ۋشىعا باستاعانىن ايتادى. بۇعان دەيىن رەسەي كەلەسى جىلدان باستاپ بەلارۋسقا ەكسپورتتالاتىن مۇناي- گاز باعاسىنىڭ وزگەرەتىنىن مالىمدەگەن. ماماندار مۇناي باعاسى وزگەرسە، 2019 -جىلى بەلارۋس 300 ميلليون دوللار شىعىنعا باتادى دەپ بولجايدى.
كرەملدەگى كەزدەسۋگە دەيىن الەكساندر لۋكاشەنكو بۇعان قاتىستى تالاي رەت مالىمدەمە جاساپ، اقىرىندا «رەسەي بەلارۋستى جاۋلاپ الۋعا تىرىسىپ وتىر» دەپ ايىپتاۋعا دەيىن بارعان. سامميت قارساڭىندا ەكى ال اراسىندا بۇرىنعىداي «باۋىرلاستىقتىڭ» قالماعانىن دا ايتقان. ال رەسەي شەنەۋنىكتەرى مينسكىنىڭ ساۋدادا «لايىقسىز» ارتىقشىلىقتارعا يە بولعىسى كەلەتىنىن ايتقان.
بەلارۋس پرەزيدەنتى باسپا ءسوز قىزمەتىنىڭ وكىلى ناتاليا ەيسمونت كەشە جۋرناليستەرگە ەكى پرەزيدەنتتىڭ جاڭا جىل الدىندا «شۇعىل ماسەلە بويىنشا» شەشىم قابىلداۋ ءۇشىن تاعى كەزدەسەتىنىن حابارلادى.
ەۋروپالىق ترانسفورماتسيا ورتالىعىنىڭ ديرەكتورى اندرەي ەگوروۆ شيكىزات باعاسىنا بايلانىستى تاراپتار ناقتى كەلىسە الماعاندىقتان جاڭا جىل الدىندا تاعى كەزدەسۋگە ءماجبۇر بولىپ وتىرعان سياقتى دەيدى.
- بەلارۋس- رەسەي قاتىناسىندا شەشىمدەردى قابىلداۋدىڭ بارلىعى پرەزيدەنتتەردىڭ ەركىنە تاۋەلدى. مۇنداي كەزدەسۋلەر ادەتتە ءوزارا كيكىلجىڭدەرگە نۇكتە قويىپ، جاڭا شارتتار بويىنشا كەلىسىمگە جەتەلەيدى. ال ناقتى جاعدايدا بۇل بولعان جوق. ازىرگە رەسەيدىڭ بەلارۋسقا قىسىم جاساۋىنا، ال بەلارۋستىڭ قارسىلاسۋىنا مۇمكىندىگى بار. ءوزارا كەلىسىمدى جىلدامداتاتىن سىرتقى وقيعالار دا بولىپ جاتقان جوق. [سوندىقتان] مۇنداي جانجال جالعاسا بەرەدى دەپ ويلايمىن، - دەيدى ساراپشى.
www.azattyq.org
