ترامپ ساۋد ارابياسىن سيرياعا قارجىلاي كومەك بەرۋگە كوندىردى
- ساۋد ارابياسى ا ق ش- تىڭ ورنىنا سيريانى قالپىنا كەلتىرۋگە قاجەت قاراجاتتى بولۋگە كەلىستى. كوردىڭىزدەر مە؟ سيريادان 8 مىڭ شاقىرىم قاشىقتىقتا ورنالاسقان ا ق ش ەمەس، كورشى باي قۋاتتى مەملەكەتتىڭ كومەكتەسكەنى دۇرىس ەمەس پە؟
اق ءۇي باسشىسىنىڭ بۇلايشا ماساتتانۋىنا سەبەپ بار. وپوزيتسيالىق جۋرناليست حاشاگدجيدىڭ ولىمىنە قاتىستى جانجال ەستەرىڭىزدە بولار. كەي ساراپشىلاردىڭ پايىمداۋىنشا، ساۋد ارابياسىنا سانكسيا سالعىزباعان دونالد ترامپ ماسەلەنىڭ ءتۇيىنىن ءوز پايداسىنا شەشتى. ياعني اقشاسى اسىپ تاسىعان باي مەملەكەتتى سيرياعا قارجى بولۋگە كوندىرگەن.
ال ەۋروپانىڭ تاياۋ شىعىستاعى جاعدايعا كوزقاراسى بولەك. جۋىردا عانا ەۋروپارلامەنت ساراپتامالىق بايانداما جاريالادى. وندا تاياۋ شىعىس پەن سولتۇستىك افريكا ايماعىندا ەۋروپانىڭ ىقپالى ءالسىز ەكەنىن ايتىلادى.
ەۋروپالىق پارلامەنتتىڭ بايانداماسىنان ءۇزىندى: «ساياسي جانە قارجىلاي ينۆەستيتسيا قۇيعانىنا قاراماستان ەۋرووداق تاياۋ شىعىس پەن سولتۇستىك افريكا ايماعىندا ساياسي- ەكونوميكالىق ىقپالعا يە بولا المادى. سول ايماقتاعى مەملەكەتتەر ونى وزگەرىس اكەلەتىن قوزعالىس كۇشى رەتىندە قاراستىرۋىن الدەقاشان توقتاتقان. وسىعان بايلانىستى ەۋروپالىق پارلامەنت بۇل جاعدايعا الاڭداۋشىلىق بىلدىرەدى».
اراب كوكتەمىنەن كەيىن ەۋروپا بۇل ايماقتا دەموكراتيا جەلەۋىمەن ويىنداعىسىن جاسايمىن دەسە كەرەك. الايدا بۇل وي ىسكە اسپاعان سىڭايلى. «اسىرەسە سيرياعا قاتىستى ماسەلەدە ۇتىلىپ وتىر» دەيدى رەسەي ساراپشىسى.
ۆياچەسلاۆ ماتۋزوۆ، ر ف اراب ەلدەرىمەن دوستىق جانە ىسكەرلىك قاتىناس قوعامىنىڭ پرەزيدەنتى:
«ەۋروپانىڭ بۇل الاڭداۋشىلىعى دەموكراتيا ورناتۋدىڭ ۇمتىلىسى دەۋ قيىن. كەرىسىنشە، بۇل - اراب الەمىن جويۋدىڭ ارەكەتى. ولار ونى تۋنيس پەن ەگيپەتتە ىسكە اسىرۋعا تىرىسقان. كەيىن سيرياعا كىرىستى. الايدا سيريالىق اسكەر مەن ونىڭ ساياسي قۇرىلىمى توتەپ تۇردى. بۇل رەتتە سيرياعا رەسەيلىك اسكەر مەن اۋە- عارىشتىق كۇشتەرى كومەككە كەلدى».
ەستەرىڭىزگە سالساق، فرانسيا پرەزيدەنتى ەممانۋەل ماكرون دونالد ترامپتىڭ اياقاستى شەشىمىن سىناعان ەدى. ول، تەرروريزم قاۋپى ءورشىپ تۇرعان مىنا زاماندا، سودىرلارمەن كۇرەستى ءبىر ساتكە دە توقتاتپايتىنىن جەتكىزدى. سوندىقتان فرانسۋز اسكەرىنىڭ ايماقتا قالاتىنىن قاداپ ايتتى. سوندىقتان سيرياداعى جاعداي جۋىردا رەتتەلە قويماسى انىق. دەگەنمەن، ا ق ش اسكەرىنىڭ سيريادان كەتۋى وڭ وزگەرىس سانالادى.
www.24.kz
