تۇركىستاندا تۋريزمدى دامىتۋعا ۇلەس قوسقان ۇزدىكتەر ماراپاتتالدى

وبلىس اكىمىنىڭ ورىنباسارى ەربول تاسجۇرەكوۆ اتالعان سالانىڭ وڭىردە جىلدان جىلعا قارقىندى تۇردە دامىپ كەلە جاتقانىن ايتىپ، تۇركىستانداعى ءتۋريزمدى دامىتۋعا قىزمەت ەتىپ جۇرگەن 18 جەڭىمپاز ازاماتتى ون اتالىم بويىنشا ماراپاتتادى، دەپ حابارلايدى قازاقپارات ءتىلشىسى.

اتاپ ايتقاندا، «تۋريستىك دەستيناتسيانى دامىتۋعا قوسقان ۇلەسى ءۇشىن» اتالىمىن تۇلكىباس اۋدانىنىڭ اكىمدىگى السا، «تۋريزم سالاسىنىڭ دامۋىنا قوسقان ۇلەسى ءۇشىن» نوميناتسياسى كەڭەسباي يسمايلوۆ پەن ەلەنا كەرحەر، عاني نازاربەكوۆ پەن روزا شۇكەنوۆالار يەلەندى. ال «تاريحي- مادەني ءتۋريزمدى دامىتۋعا قوسقان ۇلەسى ءۇشىن» ماراپاتىن «ازىرەت سۇلتان» ، «وتىرار» ، «ورداباسى» قورىق- مۇراجايلارىنىڭ ۇجىمى ەنشىلەسە، «ەكولوگيالىق ءتۋريزمدى دامىتۋعا قوسقان ۇلەسى ءۇشىن» اتالىمىن «اقسۋ- جاباعىلى» مەن «قاراتاۋ» قورىقتارى، «سايرام- وگەم» ۇلتتىق جانە «سىرداريا- تۇركىستان» وڭىرلىك پاركتەرى يەلەندى.

سونداي- اق، مەرەكەلىك باسقوسۋدا «ۇزدىك تۋريستىك ۇيىم» - «جاڭا تالاپ گرۋپ» ج ش س- نە، «ۇزدىك قوناق ءۇي» - «حاناكا» ، «ۇزدىك ساناتورلى- كۋرورتتىق مەكەمە» - «اراي دە ليۋكس» شيپاجايىنا، «ۇزدىك دەمالىس ايماعى» - «الماتاۋ» دەمالىس ايماعىنا، «ۇزدىك مەيرامحانا» اتالىمى «Sky» مەيرامحاناسىنا جانە «ۇزدىك گيد- ەكسكۋرسوۆود» اتاعى يسمايل ومارالييەۆكە تابىستالدى.

ايتا كەتەيىك، بيىل تۇڭعىش رەت وتكىزىلىپ وتىرعان شارانى ەندىگى كەزەكتە جىل سايىن ءداستۇرلى مەرەكەگە اينالدىرۋ جوسپارلانىپ وتىر. بۇل جۇمىستار، ءوز كەزەگىندە وڭىردە ءتۋريزمدى دامىتۋعا سەپتىگىن تيگىزىپ، قىزمەت كورسەتۋ ساپاسىن جاقسارتپاق. ساپالى تۋريستىك ءونىم قالىپتاستىرۋعا وڭ اسەر ەتىپ، وبلىستىڭ تۋريستىك يندۋسترياسىنىڭ باسەكەگە قابىلەتتىلىگىن ارتتىرادى دەپ كۇتىلۋدە.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى