ەلىنە بارۋدان قورقىپ جۇرگەن فۋتبولشى
ول - اعىلشىننىڭ «مانچەستەر سيتي» كلۋبىندا وينايتىن برازيليالىق فەرناندينو.
نەگە قورقىپ جۇرگەنىن بىلەسىز بە؟ ول ءۇشىن اڭگىمەنى ارىدەن باستاۋ كەرەك. ءبارىڭىز بىلەتىندەي، بيىل رەسەيدە فۋتبولدان الەم چەمپيوناتى ءوتتى. ال سول جارىستاعى فاۆوريتتەردىڭ ءبىرى برازيليا قۇراماسى ەدى. ءوز توبىنان ءبىرىنشى ورىنمەن شىعىپ، 1/8 فينالدا مەكسيكامەن كەزدەستى. ولار ءۇشىن بۇل ويىن قيىن سوقپادى. كورشى قۇرلىقتاعى قارسىلاستارىن 2:0 ەسەبىمەن ۇتتى. 6 - شىلدە كۇنى پەنتاكامپەوندار (برازيليا قۇراماسىنىڭ لاقاپ اتى) قازاندا بەلگيا قۇراماسىمەن وينادى. شيرەك فينالداعى وسى ويىندا ءبىز ايتقان فۋتبولشى فەرناندينو ءوز قاقپاسىنا گول سوعىپ الدى. بۇرىشتامادان اسىرىلعان دوپتى ءساتسىز قايتاردى. فۋتبولشىنىڭ باسىنا تيگەن دوپ ءوز قاقپالارىنىڭ تورىنەن تابىلدى. برازيليا قۇراماسى مەن جانكۇيەرلەرىنىڭ وزەگىن وكىنىش ورتەدى. ءبىرىنشى تايم اياقتالعانشا بەلگيا ەكىنشى گولىن سوعىپ، برازيليا قۇراماسىنىڭ مىسىن باستى. ەكىنشى تايمدا ءبىر دوپقا ەسەپ ايىرماسىن قىسقارتقانمەن، تارازى باسىن تەڭەستىرە المادى. بەلگيا جارتىلاي فينالعا شىعىپ، برازيليا ەلىنە قايتتى.
ءيا، وسى ويىننان كەيىن فەرناندينوعا جانكۇيەرلەر قىرىن قاراي باستادى. شىنىمەن- اق رەنجىدى. «سول ءبىر اۆتوگول بولماعاندا» - دەپ بارماقتارىن شاينادى. ءتىپتى فۋتبولشىعا الەۋمەتتىك جەلى ارقىلى قوقان- لوققى كورسەتكەندەر دە از بولمادى. وتباسىنا ءتىل تيگىزگەندەر دە كوپ بولدى. جارتىلاي قورعاۋشى ويلانا كەلە جاقىندا ۇلتتىق قۇرامادا ويناماۋ جايلى شەشىم قابىلداعان كورىنەدى.
- مەن ونىمەن جەكە سويلەستىم. ءبىزدىڭ كوماندا فەرناندينو سەكىلدى مىقتى، تاجىريبەلى، كاسىبي ويىنشى بارىن ماقتان تۇتادى. مەن ۇلتتىق قۇراماعا ناشار ويىنشىلاردى شاقىراتىن ەسەك ەمەسپىن. ول ءالى دە ويلانادى دەپ ويلايمىن. ءبىز ونى ءارقاشان قولدايمىز، - دەيدى برازيليا قۇراماسىنىڭ باس جاتتىقتىرۋشىسى تيتە. سونداي- اق برازيليالىق مامان ويىنشىنىڭ ەلگە كەلمەۋ جايىن دا ايتا كەتكەن.
- فەرناندينو - ۇلتتىق قۇراماعا ءبىرىنشى شاقىراتىن ويىنشىم. ءبىراق ونىڭ وتباسى جانكۇيەرلەر تاراپىنان قىسىمعا ۇشىرادى. تۋىستارىنا مۇندا كەلمەيتىنى جايلى دا ۋادە بەرىپتى، - دەپ جازادى El ESpanol. فۋتبول تاريحىندا وسى سەكىلدى وقيعالار از ەمەس. ۇلتتىق قۇرامادا نەمەسە كوماندادا ءساتسىز ويناعاندارعا جانكۇيەرلەر تاراپىنان قاۋىپ از بولماعان. ءبىر عانا اندرەس ەسكوباردىڭ تاعدىرىن ايتا كەتسەك بولادى. 1994 -جىلعى الەم چەمپيوناتىندا كولۋمبيالىق اياقدوپشى اندرەس ەسكوبار بايقاۋسىزدا ءوز قاقپاسىنا گول سوعىپ الادى. ناتيجەسىندە ا ق ش- قا قارسى وتكەن سول ويىندا قارسىلاستارى 2:1 ەسەبىمەن جەڭىسكە جەتەدى. بۇعان كولۋمبيالىق فاناتتاردىڭ بارلىعى اشۋلانعان. ۋمبەرتو مۋنوس ەسىمدى كۇزەتشى فۋتبولشىنى كوشەدە كورىپ قالىپ، 6 رەت اتىپ مەرت قىلعان. ءوز قاقپاسىنا ابايسىزدا سوعىپ العان گولىنىڭ ايىبىن ومىرىمەن وتەدى. وكىنىشتى- اق.. .
فۋتبول فاناتتارى قىزۋقاندى بولىپ كەلەدى. اندرەس ەسكوبار دەمەكشى، كولۋمبيالىقتار بيىل دا بىرنەشە فۋتبولشىلارىنا كىنا تاقتى. سەبەبى بيىلعى الەم چەمپيوناتىنىڭ 1/8 فينالىندا انگلياعا ەسە جىبەردى. وندا دا ويىن سوڭىنداعى پەنالتي سەرياسىندا. سول 11 مەترلىك نۇكتەدەن ءمۇلت كەتكەن ماتەۋس ۋريبە مەن كارلوس باككانى جەرلەستەرى «سەندەرگە اندرەس ەسكوباردىڭ كەبىن كيگىزەمىز» دەپ الەۋمەتتىك جەلى ارقىلى قورقىتىپ- ۇركىتكەن دەسەدى. ءتىپتى ولارعا «ءتىرى قالعىلارىڭ كەلسە، كولۋمبيا توپىراعىنان جىراق كەتىڭدەر» دەپ شارت قويعانى جايلى دا كەي باسىلىمدار جازعان بولاتىن.
Massaget.kz
