مۋزىكا مەكتەپتەرىن وڭتايلاندىرمايمىز - ەرلان ساعاديەۆ
«قالا دەڭگەيىندە بەلگىلى ءبىر شەشىمدەر بولعان. ونىمەن ۆيتسە- ءمينيسترىمىز (ەلميرا سۇحانبەرديەۆا - اۆت. ) اينالىسىپ جاتىر. بىلۋىمشە، مۋزىكا مەكتەپتەرىن وڭتايلاندىرمايتىن بولدى. نەگىزى، ونداي جوسپار بولعان دا جوق. مۋزىكا مەكتەپتەرى سياقتى مەكەمەلەردى باسشىلىق دەڭگەيىندە بىرىكتىرۋگە قاتىستى وي بولدى.
ماسەلەن، ءبىر ديرەكتور ءۇش مەكتەپتى باسقارادى. ماعان سولاي بايانداعان بولاتىن. ءبىراق مەن ءوزىم «ءبىر مەكتەپ جابىلدى، يا بولماسا، جۇمىس ورىندارى قىسقاردى» دەگەندى ەستىگەن جوقپىن. مۋزىكا مەكتەپتەرىن ەشكىم وڭتايلاندىرمايدى»، - دەدى ە. ساعاديەۆ قازاقپارات تىلشىسىنە بەرگەن سۇحباتىندا.
ق ر ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا مۋزىكا مەكتەپتەرىن وڭتايلاندىرۋ شارالارىن تۇسىندىرگەن بولاتىن. ونىڭ ايتۋىنشا، مۋزىكا مەكتەپتەرىن جاستار سارايى سياقتى ءبىر مەكەمە رەتىندە ۇيىمداستىرۋ شارالارى قولعا الىندى. ءسويتىپ، اتالعان مەكەمەلەردى وڭتايلاندىرۋ جوسپارلانىپ وتىر.
«جاستار سارايىنىڭ باسشىسى ءوز باعدارلاماسىن ۇسىنۋى قاجەت. مۋزىكا مەكتەپتەرىن قالاي دامىتادى جانە تاعىسىن تاعى. بۇل رەتتە بارلىق جۇمىس ورىندارى ساقتالادى. ۇجىمداردى ەشكىم تاراتپايدى. مۇعالىمدەر دە باياعى جۇمىسىندا قالا بەرەدى. ءقازىر الماتى مەن استانادا وسى ماسەلەگە قاتىستى شۋ شىعىپ جاتىر عوي. نەگىزى، بۇنىڭ ءبارى - مۋزىكالىق مەكتەپ باسشىلارىنىڭ نارازىلىعى. سەبەبى ونداي جاعدايدا باسشىلىق اۋىسادى. ال مۇعالىمدەر تولىعىمەن قالادى. وقۋشىلاردىڭ سانى دا قىسقارمايدى»، - دەدى ە. سۋحانبەرديەۆا جۋرناليستەرگە بەرگەن سۇحباتىندا.
ۆيتسە-ءمينيستردىڭ سوزىنە قاراعاندا، ەكى- ءۇش مەكەمەگە ءبىر باسشىنى قويۋ سياقتى وڭتايلاندىرۋ شارالارى ورتا ءبىلىم بەرۋ سالاسىندا دا بار تاجىريبە. ەندى وسىنداي تاجىريبە استانا قالاسىندا قولعا الىندى.
«ءبىر ديرەكتور ەكى- ءۇش مۋزىكالىق مەكتەپتى باسقارادى. ءبىز ماسكەۋ قالاسىنداعى مەكتەپتەردىڭ تاجىريبەسىن نەگىزگە الىپ وتىرمىز. ول جاقتا ۇزدىك ءبىر مەكتەپكە سوعان جاقىن نە جانىندا ورنالاسقان ەكى- ءۇش مەكتەپ قارايدى. سول سياقتى مۋزىكالىق مەكتەپتەردىڭ باسشىلىعىن وڭتايلاندىرۋ شارالارى دا اتقارىلىپ جاتىر. ال بۇل شاراداعى نەگىزگى ماقسات - ونداي مەكەمەلەردى ىرىلەندىرۋ، ياعني، ءبىر مىقتى مەكەمە اياسىندا توپتاستىرۋ»، - دەيدى ە. سۋحانبەرديەۆا.
