كاددافيدىڭ ۇلى پۋتيننەن قولداۋ سۇرادى
بۇل تۋرالى Bloomberg اگەنتتىگى ءوز دەرەككوزىنە سىلتەمە جاساپ حابارلادى. دەرەككوزدىڭ سوزىنشە، سايف ءال- يسلام رەسەي پرەزيدەنتىنە حات جولداعان.
Bloomberg دەرەككوزى كىشى كاددافي حاتىن جەلتوقساندا رەسەي سىرتقى ىستەر ءمينيسترىنىڭ ورىنباسارى ميحايل بوگدانوۆپەن كەزدەسۋىندە بەرىپ جىبەرگەنىن ايتادى.
سايف ءال- يسلام حاتىندا رەسەيدەن ساياسي قولداۋ كورسەتۋىن سۇرايدى. ول ماسكەۋ ليۆياداعى ءتۇرلى ساياسي كۇشتەر اراسىندا كەلىسسوز جۇرگىزۋدە ارا اعايىن بولا الادى جانە وزىنە قارجىلاي قولداۋ كورسەتەدى دەپ ۇمىتتەنەدى.
رەسەي سىرتقى ىستەر مينيسترلىگى بۇل اقپاراتقا تۇسىنىك بەرۋدەن باس تارتتى. Bloomberg دەرەككوزى رەسەي ازىرگە قاي كانديداتتى قولدايتىنىن شەشپەگەنىن ايتادى.
ليۆيادا 2019 -جىلدىڭ باسىندا بۇۇ باستاماسىمەن پرەزيدەنت سايلاۋى وتەدى دەپ جوسپارلانىپ وتىر. بۇعان دەيىن سايلاۋ جەلتوقساندا وتەدى دەلىنگەن ەدى. پالەرمودا رەسەي پرەمەر- ءمينيسترى دميتري مەدۆەديەۆ پەن ليۆيا ارمياسىنىڭ باس قولباسشىسى حاليفا حافتار قاتىسقان كونفەرەنسيادا سايلاۋ مەرزىمىن اۋىستىرۋ تۋرالى كەلىسىم جاسالعان. حافتار ماسكەۋمەن بايلانىس ورناتۋدى قولدايدى جانە پرەزيدەنت سايلاۋىنا باستى كانديداتتاردىڭ ءبىرى سانالادى.
سايف ءال- يسلام 1972 -جىلى تريپوليدە تۋعان. ليۆيا مەن شۆەيتساريادا وقىعان. 1990 - جىلداردىڭ سوڭى مەن 2000 -جىلداردىڭ باسىندا ليۆيادا ليبەرالدىق رەفورمالار جۇرگىزۋگە شاقىرعان. ۇلى بريتانيامەن اراداعى ساۋدا قارىم- قاتىناسىن قالپىنا كەلتىرۋ جونىندەگى كەلىسسوزگە قاتىسقان. 2011 -جىلى مۋاممار كاددافي بيلىكتەن تايدىرىلعان سوڭ ليۆيا وتپەلى ۇلتتىق كەڭەسىنە قارسى قوزعالىستى باسقارعان. ءبىراق ۇزاماي وتپەلى ۇكىمەت جاقتاستارى ونى قولعا تۇسىرگەن. 2015 -جىلى كىشى كاددافي ءولىم جازاسىنا كەسىلگەن. ءبىر جىلدان سوڭ باق وعان راقىمشىلىق جاسالىپ، بوستاندىققا شىققانىن حابارلاعان. 2018 -جىلى ناۋرىزدا سايف ءال- يسلام كاددافي پرەزيدەنتتىككە كانديداتۋراسىن ۇسىنعان.
www.azattyq.org
