اناسىنىڭ قىزىلشاعا قارسى ەكپە سالدىرماۋى قۇرساقتاعى بالاسىنا اسەر ەتەدى
«ءبىر جاسقا تولماي قىزىلشامەن اۋىرعان سابيلەر انا قۇرساعىندا قاجەتتى يممۋنيتەتتى الا الماعان. دەمەك، انالارى دەر كەزىندە ەكپە سالدىرماعان. ارينە، 90-جىلدارى ۆاكسينانىڭ جەتىسپەۋشىلىگى بايقالدى، بارلىعىنا جەتپەدى. ال قازىر انالاردىڭ سالعىرتتىعىنان بالالار زارداپ شەگىپ وتىر. بولاشاق انالار وسىعان ءمان بەرۋى كەرەك» ، - دەدى ج. بەكشين ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سونداي- اق، ج. بەكشين ەكپە سالدىرماۋ قۇقىعى بەرىلگەن ەۋروپاداعى جاعدايدى ەرەكشە اتاپ ءوتتى.
«ءبىز ۇلگى ەتەتىن ەۋروپادا قازىر 70 مىڭنان استام جاعداي تىركەلىپ وتىر. ەكپەگە قاتىستى ەركىندىك وسىنداي جاعدايعا اكەپ سوقتى. قازىر فرانسيادا قىزىلشاعا قارسى ەكپە مىندەتتەلدى. يتاليا دا وسى ساياساتتى ۇستانۋعا كوشتى. ءبىزدىڭ ەلىمىزدە جىل سايىن 4-4,5 مىڭ ادام ەكپەدەن باس تارتادى. ەسكى كوزقاراسپەن نەمەسە ءدىني سەبەپتەرمەن ەكپە سالدىرمايتىندار ءجيى كەزدەسەدى. بۇلاي ورتا عاسىرعا كەتىپ قالۋدىڭ قاجەتى جوق» ، - دەدى باس سانيتارلىق دارىگەر.
دەگەنمەن، دارىگەرلەر جۇرگىزگەن ءتۇسىندىرۋ جۇمىستارىنان كەيىن مىڭداعان تۇرعىن ەكپە سالدىرۋعا كەلىسىم بەرگەن.
«جىل باسىنان بەرى 2,5 مىڭ قازاقستاندىق ءوز پىكىرىن وزگەرتىپ، ەكپە سالدىرۋعا كەلىسىم بەردى. بۇل جۇمىستى جالعاستىرا بەرمەكپىز. ەكپەنىڭ قاجەت ەكەنىن حالىققا دۇرىس ءتۇسىندىرۋ ماڭىزدى» ، - دەپ ءوز ءسوزىن تۇيىندەدى جانداربەك بەكشين.
