ءانشى «امىرە» «التىن كىتاپقا» ەندى
بيىل «التىن كىتاپ» 11 جاڭا ەسىممەن تولىقتى. ونىڭ ىشىندە - جاس كوشباسشىلار، جۋرناليستەر، ونەركاسىپ جانە اگروونەركاسىپ ماماندارى، جاس عالىمدار، سپورتشىلار، دارىندى ارتىستەر، ۇستازدار مەن كاسىپكەرلەر بار. ولار وبلىس اكىمى ارحيمەد مۇحامبەتوۆتىڭ قولىنان ماراپات الدى.
«ءبىز جىلدىڭ قورىتىندىسىن شىعارىپ، قوستانايلىق ەڭ ۇزدىك جاستارعا قۇرمەت كورسەتىپ وتىرمىز. ولاردىڭ قول جەتكىزگەن جەتىستىكتەرى، ەڭبەكتەگى تابىستارى، جوعارى ناتيجەلەرى لايىقتى باعالارىن الىپ، ەسىمدەرى «وبلىس جاستارىنىڭ التىن كىتابىنا» ەنگىزىلەدى. ەلباسى ءارقاشان جاستار وكىلدەرىنە ەرەكشە كوڭىل بولەدى. مەملەكەت باسشىسى 2019 -جىلدى جاستارعا ارناۋى بەكەر ەمەس. ءبىزدىڭ وبلىستا جاستاردىڭ ساپالى ءبىلىم الىپ، قالاعان ماماندىقتارىن مەڭگەرۋلەرىنە، ماقساتتارىنا جەتۋلەرىنە قاجەتتى جاعداي جاسالىپ وتىر. وسى ماقساتتا ەكونوميكا، سپورت، مادەنيەت، كاسىپكەرلىك سالالارىندا زاماناۋي نىساندار سالىنۋدا. جاستار ساياساتىن دامىتۋعا دەگەن مەملەكەتتىك قارجىلاندىرۋ كولەمى دە جوعارى. «ديپلوممەن - اۋىلعا!»، «جاستار تاجىريبەسى»، «ەڭبەك» سياقتى باعدارلامالار ءۇشىن مەملەكەتتىك بيۋدجەتتەن قوماقتى قارجى بولىنۋدە. مۇنداي قولداۋلار جاستاردى تابىسقا جەتەلەيدى»، - دەدى ايماق باسشىسى.
بيىلعى بايقاۋعا 110 ۇمىتكەر قاتىسىپ، ولاردىڭ اراسىنان تەك 11 ى ىرىكتەلىپ الىندى. ۇزدىك شىققاندار قارجىلاي سىياقىمەن جانە ارنايى گراموتامەن ماراپاتتالدى. قازاقستاننىڭ ەڭبەك سىڭىرگەن قايراتكەرى، جەرلەسىمىز سۇندەت بايعوجين ماراپاتتاۋ ءراسىمىنىڭ قۇرمەتتى قوناعى بولدى.
قوستانايلىق جاس ءانشى، «امىرە» ەسىمىمەن تانىمال ەرنار سادىربايەۆ تا «وبلىستىڭ التىن كىتابىنا» ەندى. ەسكە سالساق، ول بيىلعى «سلاۆيان بازارى» حالىقارالىق بايقاۋىندا ءبىرىنشى ورىندى يەلەنگەن بولاتىن.
«وبلىس جاستارىنىڭ التىن كىتابى» جوباسى 2005 -جىلدان باستاپ ىسكە اسىرىلۋدا. وسى كۇنگە دەيىن كىتاپقا 195 جەڭىمپازدىڭ ەسىمى ەندى. «توبىل» فۋتبول كومانداسىنىڭ كاپيتانى نۇربول جۇماسقاليەۆ بۇل كىتاپقا №1 بولىپ تىركەلگەن ەدى.
