جاڭاجىلدىق ويىنشىقتاردى قالاي تاڭداۋ كەرەك: دەنساۋلىق مينيسترلىگى كەڭەستەرىن بەردى

«ويىنشىق - بالا ءومىرىنىڭ اجىراماس سەرىگى. الايدا، اتا- انالار كوپ جاعدايدا زيانسىز كورىنەتىن ويىنشىقتاردان قانشالىقتى ءقاۋىپ بارىن اڭعارا بەرمەۋى ىقتيمال. بۇگىنگى تاڭدا قاپتاماسىندا قازاق جانە ورىس تىلىندە ماركاسى جوق، جارقىن ءتۇستى ءارى جاعىمسىز ءيىسى بار ويىنشىقتاردى ءجيى كەزدەستىرۋىڭىز مۇمكىن. مۇنداي ويىنشىقتار قايدا وندىرىلگەنىن تابۋ مۇمكىن ەمەس دەسە دە بولادى. وسى سەبەپتى ويىنشىقتاردى تاڭداۋعا كەلگەندە وتە جاۋاپتى بولۋ كەرەك. ەڭ باستىسى، ويىنشىقتار بالالاردىڭ دەنساۋلىعىنا زيان كەلتىرمەۋى ءتيىس»، - دەلىنگەن كوميتەتتىڭ حابارلاماسىندا.

قوعامدىق دەنساۋلىق ساقتاۋ كوميتەتى ويىنشىقتاردى تاڭداۋ بارىسىندا كەلەسى كەڭەستەرگە قۇلاق اسۋدى سۇرايدى:

- ەڭ الدىمەن، ماركاداعى جازۋدى وقۋىڭىز كەرەك. ول جازۋ تولىققاندى، سەنىمدى، ناقتى بولۋى ءتيىس ءارى وڭاي وقىلۋى قاجەت. ماركادا كەلەسى اقپاراتتار جازىلۋى كەرەك: ويىنشىقتىڭ اتاۋى، شىعارىلعان ەل، اتاۋى مەن ءوندىرۋشىنىڭ مەكەنجايى، يمپورتەرى، ولارمەن بايلانىسقا شىعۋ اقپاراتتارى، ءوندىرۋشىنىڭ تاۋارلى بەلگىسى، ويىنشىق نەمەسە پيكتوگرامما ساي كەلەتىن بالا جاسى، نەگىزگى قۇرىلىمدى ماتەريال، ويىنشىقتاردى باپتاپ ۇستاۋ امالدارى، شىعارىلعان مەرزىمى (اي، جىل)، قىزمەت ەتۋ مەرزىمى جانە جارامدىلىق مەرزىمى، ساقتاۋ شارتتارى؛

- ويىنشىق ازىرلەنگەن ماتەريال تازا بولۋى كەرەك. ءۇش جاسقا دەيىنگى بالالارعا ارنالعان ويىنشىقتاردا مىنا ماتەريالداردى قولدانۋعا تىيىم سالىنادى: تابيعي تەرى، بىلعارى، اينەك، فارفور، تۇكتى رەزەڭكە، كارتون جانە قاعاز، ولشەمى 3 م م بولاتىن تولتىرىلعان تۇيىرشىك. ويىنشىقتىڭ قورعانىستى- دەكوراتيۆتى جابىندىسى بەرىك بولۋى قاجەت؛

- وتكىر ءارى جاعىمسىز ءيىس بولماۋى ءتيىس؛

- تىم اشىق ءتۇستى بولماۋى كەرەك، ويىنشىقتىڭ كوزگە تىم جارقىن ءتۇسى بالانىڭ كورۋ قابىلەتى مەن جۇيكە- پسيحيكالىق جاعدايىنا كەرى اسەر ەتۋى مۇمكىن؛

- داۋىسى قاتتى، ءوتىمدى ءارى جەدەل كەلەتىن ويىنشىقتار بالانىڭ ەستۋ قابىلەتىنە كەرى ىقپالىن تيگىزۋى ىقتيمال. مۇنداي ويىنشىقتار بالالاردىڭ شوشىنۋ اۋرۋىنا اكەلۋى دە مۇمكىن. داۋىسى جايلى ءارى اۋەزدى ويىنشىقتاردى تاڭداپ الىڭىز؛

- ويىنشىقتاردى مۇقيات قاراپ شىعۋ قاجەت، بارلىق بەكىتكىشتەر مەن بايلانىستىرعىشتاردى تەكسەرىپ الىڭىز؛

- ويىنشىق پەن ونىڭ قۇرامداس بولىكتەرى بالانى تۇنشىقتىرۋى مۇمكىن قوسىندىلاردان تۇرماۋى ءتيىس. ويىنشىقتار كىشكەنتاي بالا جۇتىپ قويمايتىنداي ءىرى بولعانى ابزال. ويىنشىقتاردىڭ بالاعا قانداي جاستا ۇسىنىلاتىنى جازىلادى، ەگەر «3 جاستان باستاپ» دەگەن بەلگى بار بولسا، وندا ول ويىنشىقتا وتە كىشكەنتاي بولشەكتەر بولۋى مۇمكىن. بالا كەيدە ساۋساقتارىن تىعىپ قىزىق كورەتىندىكتەن، ويىنشىقتىڭ وتكىر جيەكتەرى جانە قيعاشتارى، تار ساڭىلاۋلارى بولماۋى ءتيىس؛

- ساپا مەن قاۋىپسىزدىكتى راستايتىن قۇجاتتى (سايكەستىك سەرتيفيكاتىن) ءارقاشان ساتۋشىدان سۇراڭىز. ولاي بولماعان جاعدايدا ويىنشىقتاردى ساتىپ الماعان ابزال؛

- ويىنشىقتاردى مامانداندىرىلعان دۇكەندەردەن ساتىپ الۋ كەرەك. ول دۇكەندەردە ءتيىستى سەرتيفيكات بولادى. بازارلاردا نەمەسە بەلگىسىز ساۋدا ورىندارىنداعى ويىنشىقتاردان گورى سەرتيفيكاتى بار دۇكەندەر الدەقايدا ءقاۋىپسىز.

ال، ەندى جاڭاجىلدىق شىرشانى بەزەندىرۋگە ارنالعان ويىنشىقتار تۋرالى بولەك ايتا كەتسەك. ۇيدە ءسابي بولسا، وندا ول ويىنشىقتار دا بەلگىلى ءبىر تالاپتارعا ساي بولۋى كەرەك:

- ويىنشىقتاردىڭ الدىمەن يىسىنە نازار اۋدارىڭىز. وندا ءيىس بولماۋى ءتيىس؛

- ويىنشىقتى ۇستاعان كەزدە قولدارىڭىزدا بوياۋ مەن جىلتىردىڭ ىزدەرى بار- جوعىن تەكسەرىڭىز؛

- سىنىپ قالمايتىن - پلاستيكتەن جاسالعان ويىنشىقتى ساتىپ الىڭىز؛

- وتكىر بۇرىشتارى، ينەلەرى، جەلىم قالدىقتارى بولماۋى كەرەك؛

ارنايى دۇكەندەردە ويىنشىقتاردى ساتىپ الۋ قاۋىپسىز بولاتىنىن ەستە ساقتاڭىز. سەبەبى ءسىز وندا مامانداردىڭ دۇرىس تاڭداۋ جاساۋعا كومەكتەسەتىن ساراپتامالىق كەڭەسىن الا الاسىز.

ەگەر تۇتىنۋشىلاردىڭ ءتاتتى سىيلىقتاردىڭ ساپاسى مەن قاۋىپسىزدىگى تۋرالى، سونداي- اق بالالار كيىمى مەن ويىنشىقتارى تۋرالى كۇمانى تۋسا، كوميتەتكە جانە ونىڭ اۋماقتىق بولىمشەلەرىنە جازباشا تۇردە نەمەسە 87172742704 تەلەفون نومىرىنە، ايماقتىق بولىمدەرگە حابارلاسا الادى. ايماقتىق بولىمدەردىڭ نومىرلەرى kooz.dsm.gov.kz/ru سايتىندا كورسەتىلگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى