قازاقپارات جەمقورلىق دەڭگەيىن تومەندەتۋگە قوسقان ۇلەسى ءۇشىن ماراپاتتالدى
ونىڭ بارىسىندا ءبىرقاتار اقتوبەلىكتەر وبلىس اكىمى مەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ اتىنان ماراپاتتالدى، دەپ حابارلايدى قازاقپارات ءتىلشىسى.
اتاپ ايتقاندا، جەمقورلىق دەڭگەيىن تومەندەتۋگە قوسقان ۇلەسى جانە اقپاراتتىق قولداۋ كورسەتكەنى ءۇشىن «قازاقپارات» ح ا ا- نىڭ اقتوبە وبلىسى بويىنشا مەنشىكتى ءتىلشىسى سامال ەندىبايەۆا، ارنايى باقىلاۋ توبىنىڭ مۇشەسى مۇحتاريتا ساعىندىقوۆا، عىلىمي- تاجىريبەلىك ورتالىق ديرەكتورىنىڭ ورىنباسارى دينا جامانبايەۆا، قالالىق ءبىلىم ءبولىمىنىڭ ادىسكەرى نۇرجىگىت جالعاسبايەۆ وبلىس اكىمىنىڭ العىس حاتىمەن ماراپاتتالدى.
سونداي-اق ب ا ق وكىلدەرى اراسىندا ۇيىمداستىرىلعان بايقاۋ جەڭىمپازدارى العىس حاتتار مەن باعالى سىيلىقتار الدى. ۇزدىك تەلەسيۋجەت ءۇشىن «حابار 24» تەلەارناسىنىڭ مەنشىكتى ءتىلشىسى اقساۋلە بايمەنشينا، ۇزدىك انتيكوررۋپتسيالىق تاقىرىپتاعى جاريالانىمدارى ءۇشىن «اقتوبە» گازەتىنىڭ ءتىلشىسى ارايلىم نۇربايەۆا، ۇزدىك ينتەرنەت- ماتەريال ءۇشىن «Bnews» اگەنتتىگىنىڭ مەنشىكتى ءتىلشىسى بايان ساعىمبايەۆا ماراپاتتالدى.
سونداي- اق، سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ العىس حاتىن «اتامەكەن» پالاتاسى ساراپتاۋ كەڭەسىنىڭ ءتوراعاسى ەسىمحان قۇرمانعازى، وبلىستىق ءماسليحاتتىڭ دەپۋتاتى تاتتىگۇل تالايەۆا، «اقتوبە» ا ك ك ديرەكتورىنىڭ ورىنباسارى ءانۋار اسىلوۆ، ق. جۇبانوۆ اتىنداعى ءاومۋ دەپارتامەنتىنىڭ ديرەكتورى قارلىعاش ساتىبالدينا، ارنايى باقىلاۋ توبىنىڭ مۇشەسى مانسۇر ەسقوجين يەلەندى.
مەملەكەتتىك قىزمەت ىستەرى اگەنتتىگىنىڭ ءتوراعاسى اليك شپەكبايەۆ قۇتتىقتاۋ سوزىندە اقتوبە وبلىسى جەمقورلىق دەڭگەيى ەڭ تومەن وڭىرلەردىڭ ءبىرى ەكەنىن اتاپ ءوتتى.
«بۇگىن ءبىز وبلىس اكىمىمەن «اقتوبە - ادالدىق الاڭى» جوبالىق كەڭسەسىنىڭ جارعىسىنا قول قويىپ، اشىلۋىنا قاتىستىق. ونىڭ باستى ماقساتى - تۇرمىستىق جەمقورلىقتى تۇبەگەيلى جويۋ. بۇل جوباعا مەملەكەتتىك ورگاندارمەن قاتار، قوعامداستىق وكىلدەرى دە بەلسەنە قاتىسادى دەپ ۇمىتتەنەمىن. جالپى العاندا، ەكىكۇندىك ساپار بارىسىندا اقتوبە وبلىسىنداعى سىبايلاس جەمقورلىققا قارسى قىزمەتتىڭ جۇيەلى جانە كەشەندى تۇردە جۇرگىزىلىپ جاتقانىن ايتا الامىن. بۇعان وسى جىلدىڭ 11 ايىنداعى كورسەتكىش دالەل بولا الادى»، - دەپ اتاپ ءوتتى اگەنتتىك باسشىسى.
وبلىس اكىمى بەردىبەك ساپاربايەۆ وڭىردە جەمقورلىقتى جويۋ بويىنشا جوسپارلى جۇمىستار جۇرگىزىلىپ جاتقانىن تىلگە تيەك ەتتى. وسىعان بايلانىستى كوپتەگەن مەملەكەتتىك قىزمەت كورسەتۋلەر تسيفرلىق فورماتتا جۇرگىزىلۋدە.
اۆتورى سامال ەندىبايەۆا
