ون ءبىر ماراپاتتىڭ يەسى اتانعان جۋرناليست ماقالالارىن ويدان شىعارىپ جازعان
بۇل ماقالالارى ءۇشىن 9 رەت ءوز ەلىندە جانە 2 رەت حالىقارالىق دارەجەدە ماراپاتتالعان. جۋرناليستىڭ جالعان اقپاراتتار تاراتىپ كەلگەنىن ا ق ش-تاعى زاڭسىز بوسقىندار تۋرالى مالىمەتتەر جيناعان ارىپتەسى كەزدەيسوق بايقاپ قالعان.
ونىڭ ارىپتەسى كلااستىڭ ماقالاسىنىڭ ءبىر بولىگى وسىعان دەيىن ا ق ش- تاعى ءبىر جۋرنالدا جاريالانعانىن وقىعان. ول ماقالا كەيىپكەرلەرىن تاۋىپ، سويلەسۋ كەزىندە ولار رەلوتيۋسپەن ەشقاشان كەزدەسپەگەنىن ايتقان. رەلوتيۋس باسىندا مۇنى مويىنداماعانىمەن، تەرگەۋ بارىسىندا كوپ جىلداردان بەرى ماقالالاردى ويدان شىعارىپ جازىپ كەلە جاتقانىن ايتقان.
ونىڭ ايتۋىنشا، وسى ۋاقىتقا دەيىن 14 ماقالا مەن سۇقباتتاردى قيالىنان العان ەكەن. ءبىراق باسىلىم جالعان ماقالالاردىڭ سانى ودان دا كوپ ەكەنىن مالىمدەدى. باسىلىم، الدىمەن، كلااس ماراپات العان ماقالالاردى تەكسەرگەن. ولاردىڭ جالعان ەكەنىن بىلگەننەن كەيىن، ونىڭ بارلىق ماقالاسىن تەكسەرەتىن ارنايى تەرگەۋ كوميسسياسىن قۇرعان.
رەلوتيۋستىڭ ايتۋىنشا، ول ماقالاردىڭ ساتسىزدىككە ۇشىراۋىنان قورقىپ ويدان شىعارىپ جازعان. ال العاشقى جالعان ماقالاسىنان كەيىن جولى بولىپ، اتاق-ابىرويعا جەتكەسىن سول بيىكتە قالۋ ءۇشىن باسقا دا ماقالالاردى ءدال سولاي جازۋعا ءماجبۇر بولعان. اتالعان جالعان ماقالالار اراسىندا «سوڭعى كۋاگەر» - امەريكاداعى ءولىم جازاسىنا كەسىلۋشىلەر تۋرالى، «ارىستان بالالارى» - ەكى يراك بالاسىن «يسلام مەملەكەتى» (بىرنەشە ەلدەردە تىيىم سالىنعان توپ) ەكسترەميستىك توبىنىڭ ۇرلاپ كەتۋى تۋرالى جانە «440» - گۋانتانامو تۇرمەسىندەگى تۇتقىندار تۋرالى اتىشۋلى زەرتتەۋ ماقالالارى بار.
وسى ماقالالار بەدەلدى ماراپاتتارعا ۇسىنىلعان جانە كەيبىرى وزىپ شىققان. ول جۋرنالمەن 2011 -جىلدان بەرى شىعارماشىلىق بايلانىستا بولىپ، سوڭعى 1,5 جىلدان بەرى باسىلىم ءتىلشىسى رەتىندە جۇمىس ىستەي باستاعان. سودان بەرى ونىڭ 60-تان ارتىق اۆتورلىق ماقالاسى جارىق كورىپتى. رەلوتيۋس گەرمانيادا «جىل جۋرناليسى» اتانعان.
ءتىپتى، Forbes ونى «30 جاسقا دەيىن جەتىستىككە جەتكەن مەدياتۇلعالار» قاتارىنا كىرگىزگەن. ايتا كەتەيىك، Spiegel جۋرنالىنىڭ نەگىزى 1947 -جىلى قالانعان. اي سايىن 725 مىڭ دانامەن شىعاتىن ەۋروپاداعى ەڭ بەدەلدى جۋرنالداردىڭ ءبىرى. ونىڭ 6,5 ميلليون وقىرمانى بار. جۋرنال ءوزىنىڭ ۇزاق جانە دالەلدى رەپورتاجدارى جانە زەرتتەۋلەرىمەن تانىمال.
