استانادا اۆتوبۋس جۇرگىزۋشىسى قانشا جالاقى الادى
ونى بۇگىن استانا اكىمدىگىندە وتكەن باسپا ءسوز ءماسليحاتىندا «استانا LRT» كولىكتىك باقىلاۋ دەپارتامەنتىنىڭ باسشىسى سايات شايمەردەنوۆ جاريا ەتتى، دەپ حابارلايدى قازاقپارات ءتىلشىسى.
«ورتا ەسەپپەن العاندا، بارلىق اۆتوپارك پەن تاسىمالداۋشىلارداعى جالاقى 250 مىڭ تەڭگە توڭىرەگىندە. بىرەۋلەر كونسۋلتانتسىز جۇمىس ىستەيدى، ولارعا ۇستەمەاقى بار، بىرەۋلەر ۆاليداتسيا جوسپارىن ارتىق ورىنداسا، وعان قوسىمشا بونۋس بەرىلەدى. ەندى بىرەۋى ەكىنشىسىنىڭ ورنىن اۋىستىرىپ، كوبىرەك جۇمىس ىستەۋى مۇمكىن. سوندا تومەنگى جالاقى 200 مىڭ تەڭگەدەن باستالىپ، 400 مىڭ تەڭگەگە دەيىن جەتەدى»، - دەدى ول.
ال ءوز كەزەگىندە «استانا LRT» باسشىسى بەكمىرزا يگەنبەردينوۆ ۇيىمدا قولدانىلاتىن جۇرگىزۋشىلەردى ىنتالاندىرۋ جۇيەسى جايىندا ايتىپ بەردى.
«ءتىپتى اۆتوپاركتەردە مىناداي جۇيە دە بار. جۇرگىزۋشىلەر باتىر، سۋپەرباتىر، قۇرمەت تاقتاسى دەپ بولىنەدى. ەشقانداي شاعىمى جوق، جول-كولىك وقيعاسىنا ىلىكپەگەن، بارلىق شارتتار مەن تالاپتاردى ورىندايتىن، ءوز جۇمىسىن جاقسى كورەتىن جۇرگىزۋشىلەر سۋپەرباتىر ساناتىنا ىلىگەدى. ارينە، ولاردىڭ جالاقىسى دا جاقسى»، - دەدى ول.
وسى ورايدا ب. يگەنبەردينوۆ ەلوردادا كاسىبي بىلىكتىلىگى جوعارى اۆتوبۋس جۇرگىزۋشىلەرىنىڭ جەتىسپەيتىنىن اشىق ايتتى.
«جۇرگىزۋشى تاپشىلىعى بار، ول اسىرەسە قوعامدىق كولىكتە ايرىقشا بايقالادى. جۇرگىزۋشىلەرىمىزدى اقتاعانىم ەمەس، ءبىراق، ءوزىم دە كولىك جۇرگىزەتىن بولعان سوڭ ولاردى تۇسىنەمىن. تاڭ اتقاننان كەش باتقانعا دەيىن ءبىر باعداردا جۇرەدى. جۇمىس بارىنشا اۋىر، كۇنى بويى ءتۇرلى كوڭىل-كۇيدەگى، ءارقيلى ەنەرگەتيكاسى بار مىڭداعان اداممەن كەزدەسەدى. جول كەسىپ، اۆتوبۋس جولاعىنا شىعىپ كەتەتىندەر دە بار. جۇرگىزۋشى اۆتوبۋستىڭ سىرتىنداعى احۋالدى دا، ىشىندەگى احۋالدى دا جول بويى ۇدايى باقىلاپ وتىرۋى كەرەك»، - دەدى ب. يگەنبەردينوۆ.
