شەشەندىك ونەر تۋرالى ەكى تومدىق كىتاپ جارىق كوردى
كىتاپتاردىڭ تانىستىرىلىمى بۇگىن، استاناداعى ۇلتتىق كىتاپحانادا ءوتتى، دەپ حابارلايدى قازاقپارات ءتىلشىسى.
«شەشەندىك ونەر» (VIII- IX توم) كىتابىندا قازاق حالقىنىڭ شەشەندىك ونەرىنىڭ فيلوسوفيالىق ءمان-ماعىناسى جايىندا باياندالادى. ول ەلباسىنىڭ «ۇلى دالانىڭ جەتى قىرى» اتتى ماقالاسىن قولداۋ ماقساتىندا جۇزەگە اسىرىلدى.
«بىزدە ونەر جانە فيلولوگيا ماماندارىن دايىندايتىن وقۋ ورىندارى بار. ءبىراق سونداعى جاستاردى وقىتاتىن قازاق ونەرىنىڭ تاريحى تۋرالى دۇنيەلەر جۇتاڭ. وسى ولقىلىقتىڭ ورنىن تولتىرۋ ماقساتىندا وسىدان 5 جىل بۇرىن «قازاق ونەرىنىڭ انتولوگياسى» دەگەن 25 تومدىق جوبانى قولعا الدىم. بۇعان دەيىن «قازاق ايتىسى» اتتى جەتى تومدىق دۇنيە جارىق كوردى. ەندىگى كەزەك شەشەندىك سوزدەر تۋرالى ەدى. ول جوسپار بويىنشا بەس تومدى قۇرايدى. سونىڭ بۇگىن ەكى تومىنىڭ تۇساۋى كەسىلۋدە»، - دەدى مەملەكەت جانە قوعام قايراتكەرى، كورنەكتى عالىم مىرزاتاي جولداسبەكوۆ.
ونىڭ ايتۋىنشا، الداعى ۋاقىتتا ونەر انتولوگياسىنىڭ جالعاسى رەتىندە جىرشى، جىراۋلار جانە ءان مەن كۇيلەرگە ارنالعان تۋىندىلار جارىققا شىعاتىن بولادى.
شارا بارىسىندا، سونداي-اق م. جولداسبەكوۆتىڭ «وي تولعاۋ» جانە «قالىڭ قازاقتىڭ قادىرلىسى» اتتى جاڭا تۋىندىلارىنىڭ تۇساۋى كەسىلدى.
«و يتولعاۋ» كىتابىندا ەل مەن جەر تاعدىرى، رۋحاني مۇرا، كىسىلىك تۇلعا تۋرالى ناقىل سوزدەر، سونداي-اق اۆتوردىڭ ۇزەڭگىلەس دوستارى، زامانداستارى مەن ءىزىن قۋعان ارىپتەستەرىنىڭ جىلى لەبىزدەرى بەرىلگەن.
ال «قالىڭ قازاقتىڭ قادىرلىسى» كىتابى اۆتوردىڭ ونەگەلى ءومىر جولى مەن مەملەكەت ىسىندەگى قادىرلى ەڭبەگى تۋرالى باياندايدى. سونىمەن قاتار وعان وتاندىق جانە شەتەلدىك عالىمداردىڭ عىلىمي ماقالالارى مەن مازمۇندى سۇحباتتارى ەنگەن.
تۇساۋكەسەر راسىمىنە ادەبيەت، ونەر جانە تاريح عىلىمدارىنىڭ كورنەكتى عالىمدارى، پارلامەنت دەپۋتاتتارى جانە ەتنومادەني بىرلەستىكتەر ۇيىمدارىنىڭ باسشىلارى قاتىستى.
ەسكە سالساق، بۇعان دەيىن م. جولداسبەكوۆتىڭ اۆتورلىعىمەن «قازاق ايتىسىنىڭ» VII تومى كوپشىلىككە تانىستىرىلعان بولاتىن.
