قازاقستاندا فيزيكا ءپانى كوميكس ارقىلى ۇيرەتىلە باستادى
جاڭا كىتاپ عىلىمعا قىزىعۋشىلىق تانىتقان 10-12 جاستاعى وقۋشىلارعا ارنالعان. جوبانى الماتىداعى اكادەميك شاحماردان ەسەنوۆ اتىنداعى قوردىڭ كومانداسى جۇزەگە اسىردى.
«اقپان ايىندا «بالالار اراسىندا عىلىم- ءبىلىمدى دارىپتەۋگە ءوز ۇلەسىمىزدى قالاي قوسامىز» دەگەن سۇراق تۋىندادى. يدەيا رەتىندە اتاقتى ياكوۆ پەرەلماننىڭ «زانيماتەلنايا فيزيكا» جۇمىسىن الۋعا شەشىم قابىلدادىق. تالقىلاۋ بارىسىندا بۇل بالالار ءۇشىن قىزىقتى بولۋ كەرەك دەگەن تۇجىرىمعا كەلدىك. ولار ءتۇرلى وقيعالار ارقىلى كۇندەلىكتى ومىردە كەزدەسەتىن فيزيكا زاڭدارىمەن تانىسادى»، - دەدى جوبا ۇيلەستىرۋشىسى نۇرسۇلتان نۇرمۇحانوۆ.
قۇراستىرۋشىلاردىڭ يدەياسى بويىنشا كوميكستەگى كەيىپكەرلەر جولىندا ۇنەمى فيزيكانىڭ زاڭدارىنا جولىعاتىن بولادى.
ءار شىعارىلىمدا ولار قازاقستان بويىنشا ساياحات جاساپ، جولاي وقىرمان بالاقايلاردى شارىن شاتقالى، كاسپيي تەڭىزى نەمەسە ءۇستىرت قورىعى سياقتى ەلىمىزدىڭ كورىكتى جەرلەرىمەن تانىستىرادى. كوميكستە عاجايىپتار مەن قوسىمشا تانىمدىق اقپاراتتار دا بار. مىسالى، بالالار الماتى وبلىسىنىڭ اتاقتى ميستيكاعا تولى قايىڭدى كولىنىڭ قالاي پايدا بولعانى جايلى بىلەتىن بولادى.
كوميكس سيۋجەتىنىڭ اۆتورى جانە قۇراستىرۋشىسى، Khan Comics ستۋدياسىنىڭ نەگىزىن قالاۋشى ورازحان جاقىپ قور جوباسىمەن جۇمىس بارىسىندا العان اسەرىمەن ءبولىستى.
«ءبىز عىلىمدى جاسوسپىرىمدەر ەكشنىنا اينالدىرا وتىرىپ، ستسەنارييدى ءوزىمىز جازىپ شىقتىق. قاساڭ فورمۋلالار نەگىزىندە ەڭ تالعامپاز اۋديتوريانى قىزىقتىراتىنداي سيۋجەت ويلاپ تابۋ - باستى قيىندىق بولدى! سونىمەن قاتار، جوسپارلانعان مەرزىمنەن اۋىتقىماي، ساپانى جوعارى دەڭگەيىن ۇستاۋ قاجەت بولدى. جيناقتىڭ باس سۋرەتشىسى - دانيار ورىنبايەۆ. سونداي- اق مۇندا بىرنەشە كولوريست جۇمىس جاسادى. قازىرگى تاڭدا ءبىز 4- شىعارىلىمنىڭ سۋرەتىن سالىپ جاتىرمىز، ال ستسەناريي بار جيناققا تولىقتاي جازىلىپ قويعان. بارلىعى 10 نومىردەن تۇراتىن بولادى. جيناقتىڭ باس كەيىپكەرى - ءتورت قاراپايىم جاس ءوسپىرىم. ولاردىڭ ءار قايسىسىنان قازاقستاندىق وقۋشىلار وزدەرىن جانە دوستارىن تانيتىن بولادى»، - دەدى ورازحان جاقىپ.
«ولار - ەشبىر سۋپەرقابىلەتى جوق بولسا دا، وتە قاراپايىم جاسوسپىرىمدەر. الايدا، بالكىم، الىبەكتى ەرەكشەلەۋگە بولاتىن شىعار. ول عىلىمعا عاشىق، ءوزى اشىق ەكتسيكلوپەديا سياقتى، كەيدە ءتىپتى اقىلگويسىپ كەتەدى»، - دەدى دانيار ورىنبايەۆ.
«فيزيكالىق كوميكستىڭ» العاشقى شىعارىلىمى مەملەكەتتىك جانە ورىس تىلدەرىندە 2000 دانا تارالىممەن باسىپ شىعارىلادى. شاحماردان ەسەنوۆ اتىنداعى قور تيراجدىڭ جارتى بولىگىن الماتى مەكتەپتەرى اراسىندا تاراتۋدى جوسپارلاپ وتىر.
2019 -جىلدىڭ قانتار ايىنان باستاپ كوميكس توپتامالارى ەلىمىزدىڭ ەڭ ۇلكەن كىتاپ دۇكەندەرىنىڭ سورەلەرىندە پايدا بولادى.
