قوس اڭىزدىڭ كەزدەسۋى: ديماش قۇدايبەرگەن دجەكي چانعا ەكىنشى رەت شاپان كيگىزدى
سالتاناتتى كەشتە ديماش دجەكي چانعا كەزەكتى رەت قازاقتىڭ ۇلتتىق كيىمىن سىيعا تارتتى.
«بالا كەزدەن ءسۇيىپ وسكەن اكتەرىم ماعان ءاردايىم كورىسكەندە باتاسىن بەرىپ، جول سىلتەۋدەن تايىنبايدى. بۇگىن اعامىزدىڭ جاڭا ءۇنتاسپاسىنىڭ تۇساۋكەسەرىندە بولدىم. قولىمدا دجەكي اعانىڭ بەرگەن سىيلىعى. ءداستۇرىمىز بويىنشا قازاقستاندىق زاماناۋي شاپاندى كيگىزدىم»، - دەپ جازدى ديماش الەۋمەتتىك جەلىدەگى رەسمي پاراقشاسىندا.
ءوز كەزەگىندە دجەكي چان قازاقستاندىق انشىگە «I am me» (اعىلش. بۇل - مەن ءوزىم) دەگەن جازۋى بار سۆيتشوت سىيعا تارتتى.
ديماش اڭىزعا اينالعان اكتەردىڭ قاراپايىمدىلىعىنا ءتانتى ەكەنىن جەتكىزدى.
«كوڭىلىڭىزگە، پەيىلىڭىزگە ۇلكەن راحمەت. كۇللى الەمدى اۋزىنا قاراتقان كىسىنىڭ وسىنشاما قاراپايىم بولىپ جۇرگەنى قاتتى قۋانتادى. ۇزاق عۇمىر تىلەيمىن»، - دەپ جازدى ديماش.
ءانشىنىڭ جانكۇيەرلەرى بۇل وقيعانى «قوس اڭىزدىڭ كەزدەسۋى» دەپ باعالادى.
ايتا كەتەيىك، الەمگە ايگىلى اكتەرگە سىيلانعان زاماناۋي شاپان الماتىلىق «قۇراق كورپە» برەندىنە تيەسىلى.
ەسكە سالا كەتسەك، ديماش قۇدايبەرگەن مەن دجەكي چان 2017 -جىلدىڭ اقپان ايىندا العاش رەت جۇزدەسكەن بولاتىن. بۇل ۋاقىتتا ديماش قىتايدا «Singer-2017» ءان بايقاۋىنا قاتىستى. كەزدەسۋدە اكتەر ديماشقا ءوزىنىڭ ەكسكليۋزيۆتى كۇرتەسى مەن ارنايى فيرمالىق ءان تىڭداۋ قۇرىلعىسىن سىيعا تارتتى. ال ديماش اكتەرگە قازاقتىڭ شاپانىن جاۋىپ، دومبىرا سىيلادى.
