جىگىتتىڭ جىگىت بولماعى
ءاربىر ەر ازاماتتىڭ ومىرىندەگى ءبىرىنشى ايەل - اناسى.
ۇل بالا جاستايىنان اناسىنا ەركەلەپ، ونىڭ مەيىرىمىنە قانىپ وسەدى. العاشقى ون ەكى جىل سولاي بولۋى قالىپتى. ارى قاراي انا مەن ۇلدىڭ اراسىنداعى بايلانىس سيرەي بەرەدى. ءبىراق سول بايلانىس بارىندە بىردەي ۇزىلە مە؟
ون ەكىگە تولعان سوڭ اناسىنان گورى اكەسىنە جاقىن بولا باستايدى. ەگەر اناسى - رۋحاني جەتىلگەن، مىقتى تۇلعا بولسا، ول ۇلىن وپ-وڭاي ەركىن ومىرگە جىبەرەدى. اناسى ۇلىن اكەنىڭ تاربيەسىنە تاپسىرادى. ەندىگى كەزەكتە جىگىت ءۇشىن ناعىز ازامات جاۋاپتى. وسىلايشا اكەنىڭ قايراتى ۇلىنا بەرىلىپ وتىرادى. ۇرپاقتان ۇرپاققا جالعاسادى.
ءبىراق ءبىزدىڭ زاماندا اركەز بۇلاي بولا بەرمەيدى. قازىرگى زامانعى انالار كىشكەنتاي قىز قالپىندا قالىپ، رۋحاني ەسەيمەي، جەتىلمەي قالعان. ول انا ەشكىمگە سەنبەيدى. جۇرەگى تولعان ۇرەي. مۇنداي انا ۇلىن ەشكىمگە سەنىپ تاپسىرمايدى. اكەسىنە دە. مۇمكىن بالانىڭ اكەسى باياعىدا اجىراسىپ تا كەتكەن بولۋ كەرەك. ۇلىنا كوز سالعان قىزعا دا سەنە المايدى. اناسى ۇلىنا ەركىندىك بەرمەيدى. ول ءۇشىن ءبارىن ءوزى شەشەدى. وسىنداي قىلىعىمەن ۇلىن ومىردە جولى بولمايتىن جىگىتكە اينالدىرىپ جاتقانىن سەزبەيدى دە. ءبىراق مۇنداي انا ەشتەڭە بىلگىسى كەلمەيدى. ول - انا. ءبىتتى. ۇلىنا ەشكىمدى جولاتتىرمايدى.
ال، شىن مانىندە بۇل انانىڭ بەيسانالى تۇردە تىم بولماسا ءبىر ادامعا كەرەك بولسام دەگەن نيەتى عانا. ويتكەنى، ءوزىن مۇلدە لايىقسىز، تۇككە تۇرعىسىز ناشار ادام سەزىنەدى. سوسىن وزىنە ساي بالانى وسىرەدى.
- وندا تۇرعان نە بار، - دەيدى انا. - مەن ءتىرى تۇرعاندا ۇلىمدى قاناتتىعا قاقتىرماي، تۇمسىقتىعا شوقىتتىرمايمىن، - دەيدى.
ەگەر اناسى ولسە، بالاسى دا ءولۋى كەرەك پە؟ بۇل انالارعا وسىنداي سۇراقتى قويعىڭ كەلەدى.
انالار!
بۇل ەلگە ەلىن قورعايتىن تولىققاندى ازاماتتار كەرەك. ۇلدارىڭ ەتەكتەرىڭە ورالىپ جۇرە بەرمەسىن، ولارعا تەزىرەك ەركىندىك بەرىڭدەر! ولارعا ەركەك بولۋعا مۇمكىندىك جاساڭدار! بالاڭدى جان جۇرەگىڭمەن جاقسى كور. ءوز جۇرەگىڭدەگى جىلاپ قالعان قىز نە ىستەيدى دەگەن ۇرەيدەن ارىل.
اناسى، ەگەر ۇل بالا ەرەسەك بولسا دا شەشەسىنىڭ قاس-قاباعىنا قاراپ وتىرسا، «پسيحولوگيالىق كۇيەۋ» شاماسىندا ءومىر سۇرسە، ول امال جوقتان ءىشىپ كەتەدى. تەك ماس كۇيىندە عانا اناسىنىڭ «وسپە! بالا بوپ قال!» دەگەن تىلەگىن ورىندايدى. سوندىقتان، جىگىتتەر، انالارىڭمەن ارالارىڭدى سۋىتۋ ءۇشىن ەسەيۋ كەرەك. اناسىنان ىرگەسىن بولەك سالىپ بارىپ قانا ەر ادام ومىرلىك جار تاڭداۋدا قاتەلەسپەيدى. ايتپەگەن جاعدايدا، اناسى ءبىرىنشى ايەل رولىنەن شىقپاي، بالاسىن كەلىنىنەن تارتىپ الادى.
اناسىنا ەسەيگەنىن دالەلدەگەن جىگىتكە جاقسى جار جولىعادى.
مارك يفرايموۆ
اۋدارعان شىنار ءابىلدا
