استانادا اياز اتانىڭ پوشتاسى ىستەي باستادى
وعان بالالار ءۇيىنىڭ 6-11 جاس ارالىعىنداعى تاربيەلەنۋشىلەرى كەلدى، دەپ حابارلايدى قازاقپارات استانا اكىمدىگىنىڭ سايتىنا سىلتەمە جاساپ.
رەزيدەنسيا الدىندا ولاردى قارسى العان انيماتورلار كۆەست ويىنىن ويناتىپ، پوشتا بولىمشەسىنە اكەلدى. ول جەردە بالالار جازعان حاتتارىن جاشىككە سالدى جانە بارلىعى وتىرىپ ورتاق حات جازدى. ورتاق حاتتا جاڭا جىلدىڭ جاقسىلىق، قۋانىش، باقىت اكەلۋىن تىلەدى. بۇل ۇلكەن حاتتى ەلف يت جەگىلگەن شانامەن اياز اتاعا الىپ كەتتى.
«جاستار» سارايى ديرەكتورىنىڭ ورىنباسارى يۋليا اميروۆانىڭ ايتۋىنشا، بالالاردىڭ قالاۋى جازىلعان سىيلىقتار ءتىزىمى اكىمدىككە تابىس ەتىلگەن.
«وسى جەردە ءبىرىنشى - التىنشى سىنىپتاردا وقيتىن وقۋشىلار كەلدى. بالالار ءۇيىنىڭ بارلىق تاربيەلەنۋشىلەرى اياز اتاعا حات جازدى. وتكەن جىلى دا وسىلاي جاسادىق، اركىم ءوزى قالاعان سىيلىعىن الدى. بىرەۋى كونكي، قۋىرشاق ۇيشىگىن سۇرايدى، ەرەسەك بالالاردىڭ تىلەگى كۇردەلى. مىسالى، ۆەلوسيپەد سۇرايدى. نەگىزىنەن، قىستا بالالار كونكي، شانا، شاڭعى العىسى كەلەدى. بىزدە اقكول كەنتىنىڭ ار جاعىندا ءوزىمىزدىڭ مۇز ايدىنىمىز بار، ونى ەرەسەك بالالار قۇيادى»، - دەدى بالالار ءۇيىنىڭ اعا تاربيەشىسى تاتيانا فەنينا.
بالالاردى استانا قالاسى مادەنيەت جانە سپورت باسقارماسى باسشىسىنىڭ ورىنباسارى ناريما مۇحامبەتالينا مەن «جاستار» سارايىنىڭ ديرەكتورى سەرگەي سولودوۆنيكوۆ جاڭا جىلمەن جانە الداعى دەمالىسپەن قۇتتىقتادى.
حاتتارىن تابىستاعان سوڭ بالالار اس ءىشىپ، الىپ الاڭدا سىرعاناق تەپتى، سۋرەتكە ءتۇستى.
ايتا كەتەرلىگى، اياز اتانىڭ ەرتەگىدەگىدەي رەزيدەنسياسى 30 -جەلتوقسانعا دەيىن جۇمىس ىستەيدى، كىرۋ تەگىن. ال «اياز اتانىڭ پوشتاسى»، «قىسقى دالا ويىن- ساۋىقتارى»، «اياز اتانىڭ قوناق بولمەسىنە» بيلەتپەن كىرۋگە بولادى.
