قازاقستاننىڭ قاي وڭىرىندە پاراقورلىق كەڭىنەن ەتەك جايعان
«جۇيەلى سىبايلاس جەمقورلىقتىڭ جولىن كەسۋ - ورگان قىزمەتىندەگى باستى مىندەت. قازىرگى كەزەڭدە وسى باعىتتا 79 دەرەك انىقتالدى. سونىڭ ەڭ كوبى قاراعاندى وبلىسىنىڭ ۇلەسىندە (8) ، ونىڭ ارتىنشا الماتى وبلىسى كەلەدى (7) . استانا قالاسى، اقمولا، شىعىس قازاقستان، قوستاناي وبلىستارىندا التاۋدان، اتىراۋ، باتىس قازاقستان جانە پاۆلودار وبلىستارىندا بەسەۋدەن وسىنداي فاكتىلەر تىركەلگەن» ، - دەدى اگەنتتىكتىڭ قوعاممەن بايلانىس جونىندەگى دەپارتامەنتىنىڭ ديرەكتورى ارمان بەردالين.
ونىڭ ايتۋىنشا، «كولەڭكەلى» ەكونوميكا سۋبەكتىلەرىنە لاۋازىمدى تۇلعالاردىڭ پانا بولۋ فاكتىلەرىن انىقتاۋ بويىنشا ايتارلىقتاي جەتىستىكتەرگە قول جەتكەن.
«مۇنداي قىلمىستىڭ سانى 2 ەسە ارتىپ، بۇرىن 66 بولسا، ەندى 130 قىلمىسقا جەتكەن. ال جاۋاپقا تارتىلعاندار 2,5 ەسە ارتتى - 34-تەن 97-گە دەيىن. ولار نەگىزىنەن ەكونوميكالىق كونترابانداعا دەمەۋشىلىك جاساۋ (52) ، ويىن بيزنەسىنە (13) جانە اكسيزدىك ونىمدەردىڭ زاڭسىز اينالىمىنا (7) پانا بولۋ فاكتىلەرىمەن بايلانىستى» ، - دەيدى ا. بەردالين.
بۇدان تىس، دەپارتامەنت ديرەكتورى بيزنەستى مەملەكەتتىك ورگانداردىڭ ارالاسۋىنان قورعاۋ ورگان قىزمەتىنىڭ باستى باعىتتارىنىڭ ءبىرى ەكەندىگىن اتاپ كورسەتتى.
«كاسىپكەرلەر قۇقىعىن قورعاۋ بىلتىرعىدان ەكى ەسەگە ارتتى - بىلتىر 190 تۇلعانىڭ قۇقىعى قورعالعان بولسا، بيىل 408 گە جەتىپ وتىر. وسى باعىتتا 236 قىلمىستىڭ جولى كەسىلدى. سول قىلمىستار بويىنشا 172 لاۋازىمدى تۇلعا جاۋاپقا تارتىلعان، قازىرگى دەيىن 78 ءى سوتتالدى. وسى باعىتتاعى جۇمىستاردىڭ ناتيجەلى بولۋىنا «بيزنەس جانە ينۆەستورلاردى قورعاۋ» جوباسىن ىسكە اسىرۋ بويىنشا اگەنتتىك بولىمشەلەرىنىڭ بىرلەسكەن قىزمەتى سەپتىگىن تيگىزىپ وتىر. جىل باسىنان بەرى جالپى قۇنى 6,4 تريلليون تەڭگە بولاتىن 229 بيزنەس جوبا باقىلاۋعا الىندى» ، - دەپ تۇيىندەدى ا. بەردالين.
