بريتانيا ۇكىمەتى ەۋروپالىق وداقتان شىعۋ تۋرالى كەلىسىم جوباسىن ماقۇلدادى
بۇل تۋرالى سارسەنبى كۇنى كەشكە ەل پرەمەر-ءمينيسترى تەرەزا مەي ءمالىم ەتتى، دەپ حابارلايدى «قازاقپارات» ح ا ا- نىڭ مەنشىكتى ءتىلشىسى.
«مينيسترلەر كابينەتىنىڭ ۇجىمدىق كەلىسىمى كەلەسىدەي: ۇكىمەت شىعۋ تۋرالى (ەۋروپالىق وداقتان - اۆت.) كەلىسىم جوباسىن قولدايتىن بولادى»، - دەدى ت. مەي كابينەت مۇشەلەرىمەن وتكەن بەس ساعاتتىق كەڭەستەن كەيىن جۋرناليستەرگە.
ونىڭ ايتۋىنشا، بريتاندىق مينيسترلەر كابينەتى اتالمىش قۇجاتقا قاتىستى «ەگجەي-تەگجەيلى ءارى قىزۋ پىكىرتالاس» وتكىزدى.
سونداي-اق ول «برەكسيت» بويىنشا كەلىسىم جوباسى لاۋازىمدى تۇلعالار مەن كەلىسسوزدەردى جۇرگىزۋشىلەردىڭ «مىڭداعان ساعاتتىق» جۇمىسىنىڭ ناتيجەسى بولعاندىعىن اتاپ ءوتتى.
بريتاندىق ۇكىمەت باسشىسى ماقۇلدانعان قۇجاتتىڭ ءماتىنىن بەيسەنبى كۇنى تاڭەرتەڭ پارلامەنتتە بايان ەتۋگە ۋادە ەتتى.
15- قاراشا كۇنى تاڭەرتەڭ، سونىمەن قاتار ەۋروپالىق كەڭەستىڭ پرەزيدەنتى دونالد تۋسك پەن ەۋروپالىق وداق تاراپىنان باستى كەلىسسوز جۇرگىزۋشى ميشەل بارنە مالىمدەمەلەر جاسايتىنى كۇتىلۋدە.
