قازاقستاندا كادەت سىنىپتارى قارىشتاپ دامىپ كەلەدى
دەپ حابارلايدى قازاقپارات ءتىلشىسى.
الماتى وبلىسىندا نەگىزى قالانعان «جاس پوليتسيا» كادەت قوزعالىسى سۇرانىسقا سايكەس دامۋ ۇستىندە. قازىرگى تاڭدا ءتورت جالپى ءبىلىم بەرەتىن مەكتەپتە 5 كادەت سىنىبى جۇمىس جاسايدى. پيلوتتىق جوبا رەتىندە العاشقى كادەت سىنىبى بىلتىر ىلە اۋدانى وتەگەن باتىر كەنتىنىڭ №7 ورتا مەكتەبىندە اشىلدى. بۇدان كەيىن وسىنداي سىنىپتار اۋداننىڭ باسقا ءۇش مەكتەبىندە اشىلدى. پوليتسيالىق باعىتتى ۇستانعان العاشقى كادەت سىنىبىن اشۋ يدەياسىن، كەيىننەن «جاس پوليتسيا» جوباسىن ودان ءارى دامىتۋعا وبلىس باسشىسى اماندىق باتالوۆ قولداۋ كورسەتتى.
«كادەتتەردىڭ العاشقى سلەتىن وتكىزۋ تۋرالى شەشىم قابىلداۋ كەزىندە ىلە اۋدانى وتەگەن باتىر كەنتىندەگى №7 ورتا مەكتەبى تاڭداپ الىندى. ويتكەنى، وسى مەكتەپتە قۇقىق قورعاۋ باعىتىن نەگىزگە العان العاشقى كادەت سىنىبى اشىلعان بولاتىن. ياعني، ەلىمىزدەگى «جاس پوليتسيا» قوزعالىسىنىڭ باستاۋ العان جەرى. ءىس- شارادا بالالار ءبىر- بىرىمەن كەزدەستى، ءارتۇرلى باعىتتا ءوز ونەرلەرىن ورتاعا سالدى. كادەت قوزعالىسىن دامىتۋ بويىنشا ويلارى مەن ۇسىنىستارىن ورتاعا سالدى. جالپى ايتقاندا، ورتاق مۇددە اياسىندا جاقىنىراق تانىستى»، - دەپ مالىمدەدى الماتى وبلىسى پوليتسيا دەپارتامەنتىنىڭ باسپا ءسوز قىزمەتى.
سونداي- اق، وبلىستىق سلەتكە شەكارا اسكەرى جەلىسى بويىنشا ءبىلىم الاتىن ىلە اۋدانىنىڭ №38 مەكتەبىنىڭ كادەتتەرى دە قاتىستى. ءىس- شارا بارىسىندا سلەتكە كەلگەن كادەتتەر قارۋ- جاراقتى بولشەكتەۋ جانە ونى قايتا قۇراستىرۋ، ساپتىق اندەردى ورىنداۋ، ساپتىق دايىندىق بويىنشا ءوز بىلگەندەرىمەن ءتانتى ەتسە، سوڭىندا كورەرمەندەرگە ءان مەن كۇيدەن شاشۋ شاشتى.
ايتا كەتەيىك، بيىل قازاقستان رەسپۋبليكاسىنىڭ ىشكى ىستەر ءمينيسترى پوليتسيا گەنەرال- پولكوۆنيگى قالمۇحامبەت قاسىموۆ ىلە اۋدانىنىڭ كادەتتەرىن قابىلداپ، كادەت قوزعالىسىنا وڭ پىكىر ءبىلدىردى جانە ءتالىم الۋشىلاردىڭ داعدىسى مەن دايىندىعىنا وتە جوعارى باعا بەردى.
«جاس پوليتسيا» جوباسى ءتيىستى ناتيجەسىن بەردى. ءبىلىم الۋشىلاردىڭ ۇلگەرىمى مەن قىزىعۋشىلىعى ارتىپ، ءتارتىبى جاقساردى. دەنە ءبىتىمىنىڭ دۇرىس قالىپتاسۋىمەن قاتار، ەلىمىزدىڭ شىنايى پاتريوتى بولۋىنا ىقپال ەتەتىن سىنىپقا قازىرگى تاڭدا اتا- انالار تاراپىنان سۇرانىس ارتىپ كەلەدى. وسىعان وراي، وبلىسىمىزدىڭ باسقا اۋداندارىندا دا كادەت سىنىپتارىن اشۋ جوسپارىمىزدا بار. ەڭ الدىمەن، ءۇشارال جانە قاپشاعاي قالالارىندا اشىلۋى مۇمكىن»، - دەپ اتاپ ءوتتى اتالعان ۆەدومستۆانىڭ باسپا ءسوز قىزمەتى.
اۆتور: سامال قابىشيەۆا
