وباما مەن بۋش ماككەينمەن قوشتاسۋ راسىمىندە سويلەدى
قارالى جيىندا سەناتوردىڭ قىزى مەگان ماككەين، ەكس- سەناتور دجوزەف ليبەرمان، ا ق ش- تىڭ بۇرىنعى مەملەكەتتىك حاتشىسى گەنري كيسسيندجەر، ا ق ش- تىڭ ەكس- پرەزيدەنتتەرى كىشى دجوردج بۋش پەن باراك وباما ءسوز سويلەدى. بۋش پەن وباما ا ق ش پرەزيدەنتى سايلاۋىندا ماككەينمەن باسەكەلەس بولعان.
2008 -جىلعى سايلاۋدا ماككەيننەن وزىپ، ا ق ش پرەزيدەنتى بولىپ سايلانعان وباما ماككەيندى ۇزدىك قاسيەتتەردىڭ يەسى رەتىندە سيپاتتادى. سەناتور تۋرالى ءازىل ارالاستىرا سويلەگەن وبامانىڭ سوزىنە جينالعان جۇرت بىرنەشە مارتە قول شاپالاقتاپ، كۇلىپ تە الدى. ءسوزىنىڭ سوڭىندا بايسالدى سويلەگەن وباما ءارقاشان امەريكالىق قۇندىلىقتاردى قورعايتىن ادام رەتىندە تانىلعان ماككەينگە ۇنەمى ءتانتى بولعانىن ايتتى.
جۇما كۇنى ا ق ش كونگرەسىنىڭ عيماراتى - كاپيتولييدىڭ روتونداسىنا قويىلعان مارقۇمنىڭ دەنەسى سالىنعان تابىتتى كافەدرالدىق سوبورعا اپارىپ قويدى. قارالى كورتەج جول- جونەكەي كەزىندە ماككەين دە قاتىسقان ۆەتنامداعى سوعىستا قازا تاپقاندارعا ورناتىلعان ۇلتتىق مەموريالى جانىندا كىدىردى. سول جەردە مارقۇمنىڭ ايەلى سيندي سوعىستا قازا تاپقانداردى ەسكە الىپ، گۇل قويدى.
اسكەريلەر كافەدرالدىق سوبورعا كوتەرىپ كىرگىزگەن تابىتتىڭ سوڭىندا جيىرماعا جۋىق ادام - كورنەكتى ساياسي قايراتكەرلەر، ماككەيننىڭ دوستارى مەن سەرىكتەرى ىلەسىپ ءجۇردى. ولاردىڭ ءتىزىمىن كوزى تىرىسىندە ماككەيننىڭ ءوزى جازىپ كەتكەن. بۇلاردىڭ اراسىندا بۇرىنعى ۆيتسە- پرەزيدەنت دجو بايدەن، نيۋ- يوركتىڭ بۇرىنعى مەرى مايكل بلۋمبەرگ پەن رەسەيلىك وپپوزيتسيونەر كىشى ۆلاديمير كارا- مۋرزا بولدى.
ا ق ش- تىڭ قازىرگى پرەزيدەنتى دونالد ترامپ قوشتاسۋ راسىمىنە قاتىسقان جوق، ول ماككەيندى جەرلەۋگە دە قاتىسپايدى. كوزى تىرىسىندە ترامپتى قاتتى سىناعان ماككەين ءوزىن جەرلەۋ راسىمىنە ترامپتى شاقىرۋعا تىيىم سالىپ وسيەت قالدىرعانى تۋرالى بۇعان دەيىن امەريكالىق باسىلىمدار حابارلاعان. ءوز سوزىندە سەناتوردىڭ قىزى پرەزيدەنت ترامپتىڭ «امەريكانى قايتادان ۇلى ەل جاسايىق» دەگەن باستى ۇرانىنا ءۋاج رەتىندە «دجون ماككەيننىڭ امەريكاسى» ءارقاشان ۇلى بولعان دەپ مالىمدەدى.
ماككەينمەن قوشتاسۋ راسىمىنە ترامپتىڭ قىزى يۆانكا جۇبايى دجارەد كۋشنەرمەن بىرگە كەلدى. بۇعان دەيىن جۇما كۇنى ا ق ش ۆيتسە- پرەزيدەنتى مايك پەنس سەناتورمەن قوشتاسۋعا كەلىپ، مارقۇمدى ەسكە العان بولاتىن.
قىركۇيەكتىڭ 2- كۇنى دجون ماككەيندى انناپوليس قالاسىنداعى (مەريلەند شتاتى) ءوزى وقىعان اسكەري- تەڭىز كۇشتەرى اكادەمياسىنىڭ زيراتىنا جەرلەيدى. جەرلەۋ راسىمىنە مارقۇمنىڭ تۋىستارى مەن جاقىندارى عانا قاتىسادى.
www.azattyq.org
