ەرەكشە فۋنكتسيالارعا يە «اقىلدى» قولساعاتتار
قالاعانىڭدى ورىنداپ بەرەتىن بۇگىنگى «اقىلدى» قولساعاتتارعا، ءتىپتى جانىڭدى ولىمنەن اراشالاپ قالا الاتىن فۋنكتسيالار ەنگىزىلگەن. توت باسپايتىن بولاتتان جاسالعان اكسەسسۋار فيتنەس- بىلەزىكتىڭ قىزمەتتەرىن اتقارا الادى.
سۋ استىنا سۇڭگىسەڭىز دە جۇمىسىن توقتاتپايتىن قولساعات ەڭ قاجەتتى اكسەسسۋارلار قاتارىندا. يتاليالىق Emporio Armani كومپانياسى Connected دەپ اتالعان جاڭا سمارت ساعاتتى تانىستىردى. جيناقى ديزاينمەن جاسالعان گادجەتتىڭ باعاسى - تەڭگەمەن ەسەپتەگەندە 110 مىڭ.
سۇر، قارا، كۇلگىن-سارى تۇسپەن ساتىلىمعا شىققان اكسەسسۋار 1,19 ديۋيم كولەمىندەگى ەكرانعا يە. سونىمەن قاتار، ساعاتتىڭ ورنالاسقان مەكەنجايىن ناقتى كورسەتەتىن GPS، NFC ميكروقوندىرعىلار ورناتىلعان.
ادەتتەگىدەي، جۇرەك قاعىسىنىڭ جيىلىگىن ولشەيتىن قوندىرعى جانە فيتنەسكە ارنالعان فۋنكتسيالار جۇمىس ىستەيدى. Swimproof تەحنولوگياسىنىڭ ارقاسىندا ساعاتتى قولعا تاققان كۇيى قورىقپاستان سۋعا شومىلا بەرۋگە بولادى. كومپانيا اتاۋلى دەۆايستى ونلاين تۇردە دە ساتىلىمعا شىعارىپ ۇلگەردى.
سونىمەن قاتار، جاقىندا رايان گوۆاردتىڭ يدەياسىنان تۋىنداعان iBeat Heart Watch اقىلدى قولساعاتى دا الەمدىك نارىققا كىردى. بۇل ساعاتتىڭ شىعۋ تاريحىنىڭ ءوزى قىزىق. وسىدان ءدال 3 -جىل بۇرىن رايان گوۆارد تۇسىندە بالا كۇنگى دوسىنىڭ قايتىس بولعانىن كورەدى. وسى قورقىنىش گوۆاردتىڭ جادىندا ۇزاققا دەيىن جاتتالىپ قالادى. ۇنەمى قالىڭ ويعا شومىپ جۇرەتىن ول اياقاستى ادامنىڭ جۇرەگى سىر بەرگەن جاعدايدا بىردەن بەلگى بەرەتىن قۇرىلعى ىزدەيدى. ءبىراق، ىزدەگەنىن تابا المايدى.
وسى ىزدەنىس اراعا 3 جىل سالعاننان كەيىن iBeat Heart Watch ساعاتىنىڭ جارىققا شىعۋىنا تۇرتكى بولادى.
گوۆارد جاساعان قۇرىلعى قاراپايىم ساعات سياقتى كورىنگەنىمەن ادامنىڭ جۇرەگى قىسىلىپ، جايسىز سەزىنە باستاعاندا دابىل بەرىپ، ولىمنەن اراشالاپ قالا الادى. وسى قىزمەتتى ورىنداۋ ءۇشىن ساعات سەكۋندىنا 100 رەت ءسىزدىڭ جۇرەك قاعىسىڭىزداعى اقپاراتتى جيناپ، قولدانۋشىعا كورسەتىپ تۇرادى. وقىس جاعداي ورىن الىپ، دابىل قاعىلعاننان كەيىن ساعات يەسى 10 سەكۋندتىڭ ىشىندە جاۋاپ قايىرماسا جاساندى ينتەللەكتپەن جابدىقتالعان قۇرىلعى اۆتوماتتى تۇردە جەدەل جاردەم شاقىرىپ، جاقىندارىڭىزعا حابار بەرەدى.
يدەيا اۆتورى رايان گوۆاردتىڭ ويىنشا، بۇل قۇرىلعى جاسى 50 دەن اسقاندارعا جانە جۇرەك اۋرۋىمەن اۋىراتىن ادامدارعا ارنالعان. ادام ولىمىنە اراشا بولۋ ءۇشىن جاسالعان بۇل ساعاتتىڭ نەگىزگى ارتىقشىلىعى اككۋمۋلياتورىنىڭ قۋاتتىلىعىندا. قۇرىلعى نەبارى 1 ساعاتتىڭ ىشىندە تولىقتاي قۋاتتالادى جانە وسى قۋات 4 كۇنگە دەيىن جەتەدى.
Massaget.kz
