ەلىمىزدە موڭعوليادان زاڭسىز اكەلىنگەن كولىكتەر بار - كوميتەت ەسكەرتۋ جاسادى
«بۇگىنگى كۇنى ەركىن ساۋدادا موڭعول حالىق رەسپۋبليكاسىنان كەدەندىك زاڭناما نورمالارىن بۇزا وتىرىپ اكەلىنگەن اۆتوموبيلدەر بار. زاڭ بۇزۋشىلار ىشكى ىستەر ورگاندارىندا تىركەۋ ەسەبىنە قويۋ ءۇشىن جالعان كەدەندىك قۇجاتتارىن پايدالانعان.
زاڭسىز ايلالار رەسەي فەدەراتسياسى جانە قازاقستان رەسپۋبليكاسى كەدەن قىزمەتتەرىنىڭ اقپاراتتىق جۇيەلەرىنىڭ دەرەكتەر قورىن، سونداي-اق قازاقستان رەسپۋبليكاسى ىشكى ىستەر مينيسترلىگىندە ەسەپكە الۋ تۋرالى دەرەكتەرىمەن سالىستىرۋ ناتيجەسىندە انىقتالدى. نەگىزىنەن 2001 - 2010-جىلدارى شىققان وڭتۇستىك كورەيا ءوندىرىسىنىڭ اۆتوموبيلدەرى (حۋنداي، كيا) اكەلىنگەن.
قازىرگى كەزدە كەدەندىك باجداردى، سالىقتاردى تولەۋدى قامتاماسىز ەتۋ ءۇشىن مەملەكەتتىك كىرىستەر ورگاندارىمەن كونتراباندالىق اۆتوموبيلدەردى كىدىرتۋ بويىنشا شارالار قابىلدانۋدا.
وسىعان بايلانىستى، ازاماتتاردى جۇرىلگەن كولىكتەردى ساتىپ الۋ كەزىندە ساق بولىپ، اۆتوموبيلدىڭ كەدەندىك تازارتۋدىڭ دۇرىستىعىن اۋماقتىق مەملەكەتتىك كىرىستەر ورگاندارىنا جۇگىنۋ جولىمەن تەكسەرۋگە ەرەكشە نازار اۋدارۋدى ۇسىنامىز»، - دەلىنگەن كوميتەت تاراتقان حابارلامادا.
