ۇلكەن الماتى كولىندە «سەلفيگە» ارنالعان ورىن پايدا بولادى
بۇگىن ۇلكەن الماتى كولىنىڭ ماڭايىندا حوستەل يەلەرى مەن قالالىق تۋريزم باسقارماسىنىڭ وكىلدەرى رەكرەاتسيالىق ايماقتىڭ تۋريستەرگە قولجەتىمدىلىگى ماسەلەسىن تالقىلادى.
مۇنىڭ الدىندا شاكير يسلامباكيەۆ ەسىمدى Facebook قولدانۋشىسى ءوز نارازىلىعىن بىلدىرگەن بولاتىن.
ەر ادامنىڭ ايتۋىنشا، ۇلكەن الماتى كولىنە قىدىرىپ بارعان شەتەلدىك ستۋدەنتتەردەن كۇزەتشىلەر 44 مىڭ تەڭگەسىن تارتىپ العان.
كەيىن ونىڭ جازباسىنا ىلە الاتاۋى ۇلتتىق پاركىنىڭ باسپا ءسوز قىزمەتى رەسمي جاۋاپ بەرگەن.
«مۇز سوگىلدى! كەرەمەت جاڭالىق! بۇگىن كوشپەلى جيىنعا قاتىستىم. جيىندى قالالىق تۋريزم جانە سىرتقى بايلانىستار باسقارماسى ۇيىمداستىردى. اكىمدىكتىڭ ءۇنسىز قالماعانىنا قۋانىشتىمىن!»، - دەيدى حوستەل يەسى شاكير يسلامباكيەۆ.
ونىڭ ايتۋىنشا، ەندى ۇلكەن الماتى كولىندە:
1) كولدىڭ اينالاسىنا دەيىن رۇقسات ەتىلگەن جەرلەردىڭ شەكاراسى ايقىندالاتىن بولدى.
2) وسى شەكارانىڭ پەريمەترىمەن قورشاۋ قويىلادى. ماڭىزدىسى، قورشاۋدىڭ ءوزى لاندشافتتى بۇزبايتىن بولادى.
3) ءار 50 مەتر سايىن قازاق، ورىس، اعىلشىن تىلىندە اقپارات تاقتالارى ورناتىلادى. ەرەجە بۇزعان جاعدايدا ايىپپۇلدار تۋرالى اقپارات ىلىنەدى.
4) ۇ ا ك اباتتاندىرۋ جوباسى دايىندالادى. «سەلفي» جاسايتىن ارنايى ورىن، سايالى ورىندار، الاڭدار جاسالادى. جاڭا جوبا جاقىندا قوعامدىق تالقىلاۋعا ۇسىنىلادى.
5) كول اينالاسىندا اۆتوتۇراق ماسەلەسى ءوز شەشىمىن تابادى.
6) كولدى قورعاۋ قىزمەتكەرلەرىنىڭ اراسىندا سىبايلاس جەمقورلىقتىڭ الدىن الۋ بويىنشا جۇمىس جۇرگىزىلەدى.
اۆتور: گۇلميرا عوسمانالي
